Apocalipse 7 - Bíblia

Israel-nerune 144 Mil Pejnurune Piranapni

¹ Waneya wane wkatanu netna quatro hiwejikalune Hoyakalu towrene tenhohne hajene, tshiji sreta quatro yopkakatshine, kanniphalu quatro sreta hichpajikatshri himaletatshine. Rimaletluna kanniphalu tshiji hma yapyawakanupa, mar powha koxa, hocha koxa hma yapyawakanupa.

² Hiyrunu satutnaka hiwejikaluru Hoyakalu towreru tenhohne hajeru neta, tkatshi hichpajyawaka sreta hichpajikatshri, Hoyakalu hiwekatshriko himaxikole hanikamtatshri. Waneya tsru tokanuyma riynumamtna hiwejikalune Hoyakalu towrerune tenhohne hajene quatro, towutlu henekkalune tshiji hiyrunu mar powha rumtujyawakapna.

³ Wla htshin-sapleta: — Xako, hi himtukanru tshiji, hi mar powha, hi hochako wimaxikolexinpotukna Woyakalute towrerune hijrotna h-marca-xinpotuko.

⁴ Waneya njemlu hi pejnu himaxikoletkalune hwa. Cento e quarenta e quatro mil himaxikoletkalune pejnu pa neru pejnu kananu israel-nerune.

⁵ Judá neru ptohi himaxikoletkalune doze mil. Rúben neru ptohi himaxikoletkalune doze mil. Gade neru ptohi himaxikoletkalune doze mil.

⁶ Aser neru ptohi himaxikoletkalune doze mil. Naftali neru ptohi himaxikoletkalune doze mil. Manassés neru ptohi himaxikoletkalune doze mil.

⁷ Simeão neru ptohi himaxikoletkalune doze mil. Levi neru ptohi himaxikoletkalune doze mil. Issacar neru ptohi himaxikoletkalune doze mil.

⁸ Zebulom neru ptohi himaxikoletkalune doze mil. José neru ptohi himaxikoletkalune doze mil. Benjamim neru ptohi himaxikoletkalune doze mil.

Hixolun-potu Yine Piranapni

⁹ Waneya wane wkatanu netatnaklu, netna yine hixolun-potu, mpoyaho hitakyahokletkone. Wannani ptowru tshijne hichpajikatshine, ptowru neruko, kakoje neruru hiyrunu ptowru nrutshi. Pohirtshi tuplawaklestsi hiyrunu Carneiro Whene tshinkalurustsi hyopkakakanatna. Mkatshri hopowalu klatalu makatatshine. Kasureru ranikamtna himyoyna.

¹⁰ Waneya hipokananu hsaplewamtna. Wla htshin-sapletna: — Pixa Woyakalutyi, pohirtshi tuplawakle tuplatatshriyi, wiwekkakjeryi pixa hiyrun-koxa Carneiro Whene tshinkaluryi.

¹¹ Waneya hiwejikalune Hoyakalu towrerune tenhohne hajene ptowruneka yopkakyehitlu pohirtshi tuplawakle yehi, tsrukakalune yehi hiyrunu hiwejikalune quatro yehi. Waneya pohirtshi tuplawaklestsi ripyokna, hihojna rutspaktshijitna. Rimalwutluna Hoyakalu.

¹² Wla htshinatkana: — Amém! Hoyakalunupni hihlewahchinikanru, hoyaknutshi, himatkalnutshi, himalwuru, kahwakpirlu, himukatlu, pixkontshi hike rixiniko mnikawnakatupa. Amém.

¹³ Waneya satu wanna tsrukakalune wla tshinno: — Katnihe nyi mkatshri klatalu hopowalu makatatshine? Hanhe ruchpajyana?

¹⁴ Waneya wla ntshinru: — Hi nimata seyni pixa himatlu. Waneya wale wla tshinno: — Nyi yine tsru salewaktshi potuko hichpajikatshinni. Carneiro Whene tshinkaluru hraha heromkatna himkalna hopowalu rerojikatkana klata rixyawakapa himkalna.

¹⁵ Wale tshinanu Hoyakalu tuplawakle yoptowaka sreta rawna. Hoyakalu towre hkamhajetna Hoyakalupjiya hohi, hoyetshno. Pohirtshi tuplawakle tuplatatshri wannayma hwanu.

¹⁶ Hi natshpatkana. Hi ronunnahatewatanutkana. Hi tkatshiko yoxjemtatanutkana.

¹⁷ Klu tshinanu Carneiro Whene tshinkaluru pohirtshi tuplawakle hanikajite hwatshri hohlutanna. Hkosekanna honha kihleru, hiwekkaklewatatshri-ha nwaka. Hiyrun-koxa Hoyakalu ptowru hiktehna hcheyixyana.