Apocalipse 6 - Bíblia

Mitshikananu Yonawahlo Steno Hosture Jimlaklu Piranapni

¹ Waneya netlu carneiro whene jimlakatkalu mitshikananu yonawahlo steno hosture. Waneya njemtokanutlu satu hiwejikaluru tokanu. Tsru tokantshi, rutlohle pixka tshinatshri. Wla htshina: — Puna!

² Hiyáhoni netatka. Waneya cavalo klatalo neta. Hiyrunu cavalo yapatshri kachritwa hanikamtatka. Waneya phuru sahye renekka. Hiyáhoni hyatka hallirewatatshri, rallirewaxyawakapa.

Hepi Rixinri Yonawahlo Steno Hosture Jimlaklu Piranapni

³ Waneya hepi rixinri yonawahlo steno hosture hjimlakatka. Waneya wan-rixinixka njemtokanutlu hepi rixinri hiwejikaluru tokanu. Wla htshina: — Puna!

⁴ Waneya hiyrunu satu cavalo wane hichpajyatka. Serolni wale. Tsru himukatlu renekka cavalo yapatshri kihle hwachlu hkonyawakaplu xye tshijne. Yine hkamnikajyawakapna, ruylakkajyawakapna. Hiyrun-koxa renekka yohlolewapi satu, tsruru potuko.

Mapa Rixinri Yonawahlo Steno Hosture Jimlaklu Piranapni

⁵ Waneya mapa rixinri yonawahlo steno hosture hjimlakatka. Waneya wan-rixinixka njemtokanutlu mapa rixinri hiwejikalune tokanu. Wla htshina: — Puna! Waneya netatka. Cavalo ksajiro neta. Cavalo yapatshri himyo ranikamxyalu nijittshi yahotapi.

⁶ Waneya tokantshi hima njema hiwejikalune quatro hanikajite hichpajikatshri, wan-tshinatshri: — Pa kilo trigo pahi, pa hohne kamrurtshi wenru psopa hiyrunu mapa kilo cevada pahi, pa hohne kamrurtshi wenru psopa. Halikaka nhihtshiha hiyrunu vinho-ha hi hsaletkakanu.

Quatro Rixinri Yonawahlo Steno Hosture Jimlaklu Piranapni

⁷ Waneya quatro rixinri yonawahlo steno hosture hjimlajinixka njemtokanutlu quatro rixinri hiwejikaluru. Wla htshina: — Puna!

⁸ Waneya netatka. Satu cavalo hakanhatka. Pwalolni. Cavalo yapatshri hiwakni, Hipuktshi. Hiyrunu Hipnatshine Hwiywaka tshinkaluru hapkatamta. Towuwlu satu quatro-te (1/4) renekkana xye tshijne hajene, ruylalewaxyawakapna yohlolewapiyma, natshiyma koxa ruylalewatanna, hipuktshiyma, nikalune kmatsyirune xye tshijne hwatshineyma koxa ruylalewatanna.

Cinco Rixinri Yonawahlo Steno Hosture Jimlaklu Piranapni

⁹ Waneya cinco rixinri yonawahlo steno hosture hjimlajinixka, altar hmana nexyana hiwejikalune Hoyakalu tokanu homkahru tshinanu, hiylatkalunni poyehi halixlerune.

¹⁰ Tsru tokanuyma hsaplewatna, wla tshinatshine: — Ha, Tsru Hixikatshriwa Hoyakalu, potuka hchinikanuru, halikakalutu hi pchini hohnehe mahata xawakni pjihyehixyawakapna xye tshijne hajene hiyrunu papnuyehixyawakaplu wihraha hkochpaklerna?

¹¹ Waneya satkaka mkatshri klatalu hopowalu renekka wanna ptowruneka. Waneya runkakkana pnutejijitshi rapnanuxyawakapna haté rikamrurewatanune hiyrun-koxa Cristo tshinanu hmoletanune ruylaxikowakapna wanna pixka rixa hiylalexikowakapna.

Seis Rixinri Yonawahlo Steno Hosture Jimlaklu Piranapni

¹² Waneya seis rixinri yonawahlo steno hosture hjimlajinixka netatkalu. Waneya waneru tsru hiyolik-tshijru. Hiyrunu tkatshi mapchahawata, hatatjewa mkatshri ksajiru, kpixnuru hichyatlu. Ha ksuru serolu rixa hrahtshi pixka.

¹³ Katahirine, tenhohne hwatshri tshij-hoho hijrujyana, figueira muna tujruksahixini pixka totsota sahiko, kanniphalu kowchokchehixinro pixka.

¹⁴ Waneya tenhohne hamhachatanatka, papel-mta poyitkaluru pixka hsahitan-honuka. Ptowru pejnu teno himriji hiyrunu ptowru wenu hanikajite hwatshijitatshri rawyawaka rajrijika.

¹⁵ Waneya xye tshijne pohirewatatshine, tsru hitakkalune, phurune, soldado-ne chefe-tene, tsrukakalune, towrertshine ptowruneka, mtowutkone ptowruneka hitawakapna hiyrunu teno mrijiwaka sotlu yehi hyohimaxyana.

¹⁶ Waneya himriji hiyrunu sotlu ranjitna, wla htshinatkana: — Wuya hix-hohowaka hapokanu. Hyohimatanunwu pohirtshi tuplawaka tuplajetatshri hma mexyawakanupwu hiyrunu Carneiro Whene tshinkaluru jihekannu yehi hyohimaxinwu.

¹⁷ Klu tshinanu wale hohne tsru hapnokatlewlu hohne hapokanutka hiyrunu kathe hakotanru rapnokatle?