Apocalipse 5 - Bíblia

Yonawahlomta Hiyrunu Carneiro Whene Pixkalutu Piranapni

¹ Hiyrun-koxa tuplawaka tuplatatshri potukle myo nexyalu satu yonawahlo steno ptowru sretako yonaxikalurutka, hitoko hiyrun-koxa maleka sreta. Sete hosture hwikatshro yonawahlo steno.

² Hiyrun-koxa netlu satu hiwejikaluru Hoyakalu towreru tenhohne hajeru hixkolu hipokananu saplewatatshri. Wla htshin-sapleta: — Katnihe himukatatshri yonawahlo steno hosture hjimlajixyawakapa, hkopralajyawakaplo?

³ Seyni hike himukatlu hi tenhohne hajeru, hi tshiji hajeru, hi tshiji hitokote hajeruko. Hikemka himukata kopralakletlo yonawahlo steno. Hiyrun-koxa hi rumukata yopukhaletlona.

⁴ Hiyáhoni ntshiyahpotutatka klu tshinanu hi rawa himukata yonawahlo steno kopralakletatshri, rethaxyawakaplo. Hiyrun-koxa hike himukata yopukhaletlo.

⁵ Waneya satu tsrukakalu wla tshinno: — Hi ptshiyahatanu. Hetanu! Leão tshinkaluru Judá neru klopicha, phuru Davi Klopicha tshinkaluru rekhixnawa himukatatshri rixyawaka yonawahlo steno sete hosture hjimlajixyawakapa hkotpujyawakaplo.

⁶ Halikakni, tuplawaka hanikajite, quatro hiwejikalune hanikajite hiyrun-koxa tsrukakalune hanikajite, nexyalu Carneiro whene tshinkaluru, yopkakatshri. Carneiro-ni hiylatkaluru pixka rixa. Sete hwalu hiyrunu sete yhal-koxlu. Sete yhaltshi yapkakletlu sete hiwejikalune Hoyakalunune, hyokanatanune tshiji ptowruka hyapyawakapna.

⁷ Waneya Carneiro whene tshinkaluru htuplawakle tuplatatshri nwaka hya. Yonawahlo steno htuplawakle tuplatatshri potukle myo hwatshri, hyoptota Carneiro Whene tshinkaluru.

⁸ Waneya wan-rixinixka quatro hiwejikalune hiyrunu tsrukakalune vinte e quatro pejnu yoptsojityehitlu Carneiro Whene tshinkalurustsi. Satkaka wanna himwakanatlu tokapikaka hiyrunu kastonolkaka ouro kamhikaluru katseplu phamlu pahiru. Phamlu pahiru yapkakletlu Hoyakalu nurrene ralixjene hanjihohnere pirana.

⁹ Waneya herotu chikale hchikaletna. Wla htshina chikaletna: — Pixa tsonu himukatatshriyi pixa yonawahlo steno pyoptoxyawaka hiyrunu sete hosture pjimlajyawakapa, pkotpujyawakaplo. Klu tshinanu hiylatkaluryi, pihraha hiyokkaluruyma panjitna yine Hoyakalu tshinanupa, ptowru neruko tshinanu, ptowru nru tshinanuko, ptowru yineru kakojeru tshinanu, ptowru tshijne hajene tshinan-koxa.

¹⁰ — Wane pixkakwu sacerdote-nerune wixyawakapa Woyakalute tshinanupa. Hiyrun-koxa tshiji wtowutanu pa hohne.

¹¹ Waneya netatka. Hiwejikalune Hoyakalu towrerune tenhohne hajene hixolune, Hoyakalu tuplawakle hiyrunu quatro hiwejikalune hiyrun-koxa tsrukakalune vinte e quatro htuplawaklekaka tuplasajrukletatshine neta. Wanna hixolune tokanu njema. Wanna ptowru pejnu, dez mil kata dez mil pejnuna hiyrunu hixo mil wane yohnika.

¹² Tokantshi hipokananuyma wla htshina yanumletna: — Pixa tsonu Himukatatshriyi Carneiro whene tshinkaluru, hiylatkaluru, hyoptoxyawaklu himukatlu, pohirewnalu hyoptoxyawaka, himatkalnutshi hyoptoxyawaka, mixkontshi, kahwakpirlu, halixkowlu, himalwuru, hyoptoxyawaka.”

¹³ Waneya ptowru hiyakotkaluru tenhohne hajeru, tshiji hajeru, tshiji hitokote hajeru, mar powha hwatshri hiyrunu ptowruka wane hajerkaka, njema wla tshinretna: — Himalwuru, kahwakpirlu, hoyaknutshi hiyrunu himukatlu, pohirtshi tuplawakle tuplatatshri tshinanupa hiyrun-koxa Carneiro whene tshinkaluru tshinanupa rixhohnekanaxyawakapni hike rixiniko mnikawnakatupa.”

¹⁴ Quatro hiwejikalune, Amém htshinna. Waneya tsrukakalune yoptsojityehitlu Hoyakalu hiyrunu Carneiro whene tshinkaluru yehi, waneya rimalwutna.