Apocalipse 4 - Bíblia

Himalwuru Tenhohneya Piranapni

¹ Hetanu! Hiphapto hitpukatshri nupjeta tenhohne hwatshri. Waneya niynumsakanatjeru tokantshi kowi hima pixka tshinatshri njema. Wla htshinno: — Hewi teno punanu. Waneya nekhitanyi hipirankaka hakanhatshripa.

² Hoyakalu Hiwejikaluru pixkonu nimwatka. Netawakletlu phuru tuplawakle tenhohne hitakkalurutka. Satu wane tuplakanata.

³ Tuplakanatatshri hoji yotshyahata sotlu kwenurune hatajnu pixka rixa, poleru, serolu. Hiyrun-koxa kchi tuplawaka sajrukatshro, esmeralda nikotle pixka rixa hatawnaleta.

⁴ Tuplawaka tnumne vinte e quatro tuplawakkaka hwatka. Hiyrun-koxa netna vinte e quatro tsrukakalune tuplatatshine klat-powalune. Hsahyena ouro kamhikaluru hsahyetna.

⁵ Pohirtshi tuplawakle ruchpajya rawrakle, tokantshikaka, hiyrunu rutlohle. Sete katalune, hatawnatshine, sete hiwejikalune Hoyakalununni, tuplawakkaka hinaple hwatka.

⁶ Tuplawaka hinaple rawatka hipowha pixkalutu garrafa kamhikolu katajir-potuko cristal pixka. Tuplawaka hanikajite swa, sajrukle ptowru sretako, rawna quatro hiwejikalune quatro jixirune, hixo yhalna. Hista sreta hiyrun-koxa hitjimne sreta rawayhaletna.

⁷ Mitshikananu hiwejikaluru leão pixka rixjiwuta. Hiwejikaluru hepi rixinri boi pixka rixjiwuta. Hiwejikaluru mapa rixinri jeji pixka rixhojita. Hiwejikaluru quatro rixinri tsru paktsha palnatshri pixka rixjiwuta.

⁸ Nyi quatro hiwejikalune kamejirunni, satkaka hiwejikaluru seis meji rawya. Hix-potu yhaltshi rawyana psol-maneko, maleka sreta hiyrun-koxa hitoko sreta. Hiyrunu psol-hohneko, psol-yetshnoko hi rutuka wla tshinretna: — Potukalni, potukalni, potukalni Tsru Hixikatshriwa Hoyakalu Ptowru Potuko Himukatatshri, mitshikawluru, xawakni hohne hiyrunu hinatshri hohnepa hwatshritka.”

⁹ Waneya ptowru katako nyi quatro hiwejikalune himalwuru chikalexinna, kahwakpirlu renejinixkaluna hiyrunu poyahnu htshininrina pohirtshi, tuplawaka tuplatatshri, hike rixiniko mnikawnakatu yehi,

¹⁰ waneya tsrukakalune vinte e quatro pejnu yoptsojityehitlu htuplawakle tuplatatshri hoji sreta hiwekhohnekanatatshri hike rixiniko mnikawnakatu yehi waneya rimalwutluna. Waneya hsahyena, ouro kamhikolu, tuplawaka hinaple rutspakna. Wla tshinatshine,

¹¹ — Tsru Hixikatshriwa Hoyakalu, pumukata yoptoletlu hoyaknutshi, kahwakpirlu hiyrunu hiyaklu klu tshinanu ptowru potuko hiyakotatshriyi. Pixako palujyawaka tshinanu rawa hiyrunu hiyakotkalurutkani.”