Apocalipse 3 - Bíblia

Tokantshi Cristo Halixatshine Hapatjetatshine Sardes Poktshi Hajene Tshinanu Piranapni

¹ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Sardes poktshi hajene kosekatshri: “Xyekni hinkaklu hixa tshinanu, wla htshina, sete hiwejikalune Hoyakalununni hiyrunu sete katahirine hanikatshri. Nimatlu hkamrure. Hiwekatshine hikahwakkalune seyni halikaka hipnatshinhi.

² Hislahinwa, hmixkotanru himwaleru hixetatshri psotsonu, hma mupniywaknupa wale psotsonu koxa. Klu tshinanu hi nukchiklu hkamrure Hoyakalu halukanru hike mmahaxikatu, Hoyakalu hetanu tshinanuya.

³ Hiyáhoni hichinikanretanru htshinikolu hyoptoleru, hjemleru. Wale pirana xako homkahpotutanu hehchinikanutanu. Klu tshinanu hma muslahiknuklunwa chinpotu napyehitanhi, katshowhuru hapokle pixka. Hi himatanu klu hora-ko napyehitanhi.

⁴ Seyni satkakhi hixajiji, Sardes poktshi hajenhi hi pitshotamkaluxnawa. Hitayma hyanna mkatshri klatalu makatatshine. Rumukatna klu tshinanu hike hma tshinanwakaxikowakanna tshinanni.

⁵ Hallirewatatshri mkatshri klatalu makatatshripni. Hiyrun-koxa hiwejikaluro steno hi ruchyahiwakaxiko. Seyni wale hiwaka nuphujetanu Nuru Hoyakalu hetanu hiyrunu hiwejikalune Hoyakalu towrene tenhohne hajene hetan-koxa.

⁶ “Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene.”

Tokantshi Cristo Halixatshine Hapatjetatshine Filadélfia Poktshi Hajene Tshinanu Piranapni

⁷ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Filadélfia poktshi hajene kosekatshri: “Xye pirana runkakhi Hoyakalu, potukal-potuko, halikak-potu, phuru Davi tshinkalurni chave-te himwatshri. Hkotpukka, hike hichyatlu. Ruchyaxini, hike kotpuklu.

⁸ “Nimatlu hkamrure. Hetanu! Hiphapto nkotpukyehixyahi. Hike himukata hichyaletlu. Kmixkonhi psotsonu. Hiyrun-koxa ntokanu homkahjeta hiyrunu hi hiknokatkalu nhiwaka halixikolu.

⁹ Hetanu! Tsru kamtshi Satanás hapatjeyehitatshine, judeu-ne tshinikatshinwa phuta seyni hweyawatna. Wanna halikaka hixa jixistsi nyoptsojitjixapinna, rimathexyawakapna nuchinikjethi.

¹⁰ Hislahatkalu ntokanu ntowuxyahi, hkahwakachaxyawakap-pirana hiyáhoni hit-koxa hepixanhi hma mexyawakanuplu salexikol-hohne hinatshripa, ptowru tshijne hajene yahoxikolu klu papkopa.

¹¹ Hjemanu! Nunhapkatanu. Hiyáhoni walekaka himwaleru hi hichotanu. Hike yineru mkonyawakanuplu himlujikolu hyoptotanrupa.

¹² “Hallirewatatshripa, Noyakalutepji stsihi nixkakanru. Hikeklu maleka ruchpakanutka. Wale hoho Noyakalute hiwaka nyonatanu hiyrunu Noyakalute poktshite hiwaka wale hoho nyonatanu. Wale poktshi Jerusalém poktshi herotetkalurupa tenhohne Noyakalut-yehi hichpajikatshripa. Hiyrun-koxa hitako nhiwaka herotu wale hoho nyonatanu.

¹³ “Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene.”

Tokantshi Cristo Halixatshine Hapatjetatshine Laodiceia Poktshi Hajene Tshinanu Piranapni

¹⁴ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Laodiceia poktshi hajene kosekatshri: “Xye pirana runkakhi Amém tshinkaluru, Hoyakalu pirana hiphujetatshri halikak-potu, mweyawakletu, Hoyakalu hiyakotanrukaka yinuwakatshri.

¹⁵ Nimatlu hkamrure. Nimathi hixa hi katshiklerunpothi, hi koxa hamerunpothi. Nalukamkahi katshiklerunpotu hixyawaka ho hamerunpothi.

¹⁶ Hiyáhoni pso hamnujiji hixyawaka tshinanu nonama naplijininhi. Klu tshinanu hi hampothi, hi koxa katshiklepothi.

¹⁷ Klu tshinanu hixa wan-tshinnawa: ‘Phurunwu, kihle hiweklewu hike wmahaxya.’ Seyni hi himathexnawa salewnatshinhi, kaheknanuwatatshinhi, hike mwikanhi, mayhalenhi, mamkanhi.

¹⁸ Ntowuthi ouro myapjetkotu hit-yehi hanjixyawaka, phurun-potu hixyawakapa. Hiyrunu mkatshri klatalu hit-yehi hanjixini hmakaxyawakaplu hma patewaxyawakanupa hmamkanu tshinanu. Hiyhale pniri hit-yehi hanjixini hsahayhalexinripa, hapkathojixyawakapa.

¹⁹ Nuchinikanune pejnu ntshihetjeta, nsaletjeta. Hiyáhoni jmererunephi hehchinikanuxyawakapa.

²⁰ Hjemanu! Hiphapto nwa. Nutpehiphaptoteta. Hiyáhoni katuktako jeminru ntokanu hiyrunu hkotpukhiphaptotexini, njihlokyehitanru wale. Hiphapto kotpukatshri niminkanu hiyrunu wale himinkano hita.

²¹ “Hallirewatatshri ntshanixanu rituplatanno npohirewnale tuplawakle, hita hallirewaxinri pixka, Nuru Hoyakalu towuwlu tuplawakle nituplaxyawaklu Nuru Hoyakalu pixka.

²² “Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene.”