Apocalipse 22 - Bíblia

¹ Hiyrun-koxa Hoyakalu towreru tenhohne hajeru hekhitno wenu Honha Hiweklu Heneklewatatshri hiwakatletatshri. Xye wenha katajha potuko, garrafa pixka. Hoyakalu hiyrunu Carneiro Whene Tshinkaluru tuplaxyawaka ruchpajyatka wale wenu.

² Tsru poktshi hapo hanikajite hiyrunu ptowru sreta wnahaluko rawa hahmuna Hiweklu Heneklewatatshri tshinkaluru. Doze-ru hisahi kakojeru. Ptowru ksurkaka hsahiwjeta. Hisure panerkaka hitskalakatshripni.

³ Wale poktshi hi rawanu Hoyakalu himtukleru. Wale poktshi rawanu Hoyakalu hiyrunu Carneiro Whene pohirewle tuplawakle. Hiyrun-koxa Hoyakalu towrene himalwutanru.

⁴ Hoyakalu hoji potuko retanna hiyrunu hijrotna Hoyakalu hiwaka yonatko.

⁵ Wane hi rawanu hoyetshno. Hiyrun-koxa wane hi ralujiko nikotapi, hi tkatshi nikotle ralukanna klu tshinanu Tsru Hixikatshriwa Hoyakalu nikotyehitanna. Wanna yine pohirewhohnekanatanutka hike rixiniko mnikawnakatupa.

Jesus Hi Hohamokpatka Runinri Piranapni

⁶ Waneya hiwejikaluru Hoyakalu towreru tenhohne hajeru wla htshinno: — Xyekaka tokantshi halikakalutu piranni hiyrunu rakanhanu halikaka. Tsru Hixikatshriwa Hoyakalu, htokanu hinkakletatshine hihchinikanu hepixatshri, yokanatlu htowreru hiwejikaluru tenhohne hajeru rekhixyawakapna htowrene xyekaka pirana chinpotukawa hakanhatshripa pirana.

⁷ Wla htshina Jesus: — Hyijnakotanu! Pchini tsonu nunanu! Kihle hchinikanurni hinatshripa pirana, xye steno yonatkaluru hwatshri homkahitatshri.

Hijretlu Hiyrunu Hinkaklukaka Hapkatatatshri Potukotka

⁸ Hita, João-no xye ptowruka njema hiyrunu netlu. Waneya nali jemletlu, nali hetletlu xye ptowruka waneya nihmamta tshiji nyoptsojityehitmaklu hiwejikaluru Hoyakalu towreru tenhohne hajeru, xye ptowruka nekhitjeru jixistsi, nimalwuxyawakaplu.

⁹ Seyni wale wla htshinno: — Hi wane pixanu, klu tshinanu hita pixje towrertshino hita. Pmoletanru Cristo tshinanu Hoyakalu tokanu hinkakletatshineymalutno hita hiyrunu xye tokantshi xye steno yonaxikaluru homkahitatshine pixkalutno hita. Halikaka Hoyakalu pimalwutanu!

¹⁰ Wla htshinno wane pnutetka: — Hi pyohimatanru tokantshi hinatshripa pirana xye steno hwatshri klu tshinanu hi howukchiniplu rakanhiywakapa xyekaka pirana.

¹¹ Hektutu kamhatshri, rixannu hektuntshi hkamhalepni. Hektu hchinikanuru, rixannu hektunu hchinikanupni. Kihleru kamhatshri rixannu kihleru kamhalepni. Hoyakalunu rixannu Hoyakalunu hixleta.

¹² Jesus wla tshina: — Hetanu. Pchini tsonu nunanu. Numluklewle hitaymaplu. Satkaka rumlujikolu hyoptotanu hkamrure pixka rixko satkaka.

¹³ Hitni mitshikananu hwatshrino hiyrunu hmahle potuko hwatshrino. Yinuwakatshrino hiyrunu hmahaxyawak-potuko hwatshrino, mitshikananu hwatshrino hiyrunu hmahle hwatshrino.

¹⁴ Kihle hchinikanurunni himkalna hopowalu herojikalune rumukata nikletluna hahmuna hiweklu heneklewatatshri sahi hiyrunu poktshi jihlojikowaka rumukata yapletanna.

¹⁵ Seyni poktshi malekate rawna kawene pa himtuknurune, kahontshine, kapoklewaklerune, jiylalewaklerune, mayawletshicha kahwakpiratatshine, hayloklewlu halukatshine hiyrunu weyawlu kamhatshine.

¹⁶ — Hita, Jesus-no yokanatlu ntowreru hiwejikaluru tenhohne hajeru ruphujexyawakaplu xyekaka pirana hixa Cristo tshinanu hapatjetatshinkakhi tshinanu. Hitni pohiru Davi-ni klopichno. Hitni hohisahi hatawnatshrino.

¹⁷ Hoyakalu Hiwejikaluru hiyrunu hnuruwatatshropa wla htshinna: — Puna! Hiyrun-koxa xye pirana jematshri wla tshina: — Puna! Honunnahatewatatshri hinanu. Hiyrunu katuktako haluka yoptoletanru honha hiweklu heneklewatatshri henekachal-ha.

Ralipre Hinkaklewlu

¹⁸ Hita João-no hinkaklewata, xako hanuktako yineru xyekaka tokantshi xye steno hwatshri hinatshripa pirana yijnakotatshri. Katukta pa pirana hajrijinri xyekaka tokantshi waneya Hoyakalu salewaktshi rajrijinri wale yineru xye steno hwatshri pirana tshinanu.

¹⁹ Hiyrun-koxa satu yineru ho katuktako pa pirana ruchyaxinipa, hinatshripa pirana xye steno hwatshri, Hoyakalu konanru walenumkapa hahmuna hiweklu heneklewatatshri, hiyrun-koxa walenumkapa hwikowaka Hoyakalu poktshite hwatshri, xye steno hwapiranatatshri yehi.

²⁰ Xyekaka pirana ptowruka hiphujetatshri wla tshina: — Halikaka chinpotukawa nunanu! Amém. Punanu, Tsru Hixikatshriwa Jesus!

²¹ Nanjitlu Wutsrukate Jesus henekachale hihlenu hixa ptowrunekhi tshinanupa.