Apocalipse 21 - Bíblia

Malehohnewaka Hiyrunu Tshiji Herotexikolu Piranapni

¹ Waneya netlu tshiji herotu hiyrun-koxa malehohnewaka herotu. Klu tshinanu mitshikawluru malehohnewaka hiyrunu mitshikawluru tshiji nikawnatka. Hiyrun-koxa mar powha hi hwatka.

² Waneya hita, João-no, hetlu poktshi, Hoyakalu nurreru poktshi, Jerusalém tshinikowaka poktshi herotetkaluru. Hoyakalu yehi, tenhohne hichpajikatshri tshij-hoho hapokatshri. Hihlepokotkaluru hnuruwatatshro pixka hihlepokotkaluro thanurutanrupa tshinanu pixka rixapoktshita.

³ Waneya tsru tokantshi njema pohirtshi tuplawakle hichpajikatshri hima, wla tshinatshri: — Hjemanu! Hoyakalu hwiywaka yin-yehi rawatka. Wannayma rawanu. Rayinetenepni. Hoyakalu potuko wannaymapa. Wanna Hoyakalutepni.

⁴ Hiyrun-koxa Hoyakalu cheyiktehatanna ptowruneko. Hikepni hipuktshi, hi wamontshiko, hi tshiyahluko, hi katshinoluko. Wale ptowruka hi hwanu klu tshinanu mitshikawluru hwakanatatshri nikawnanu.”

⁵ Waneya Hoyakalu, pohirtshi tuplawakle tuplatatshri wla tshina: — Hjemanu! Ptowru potuko nerotetanu! Waneya wale wla htshinno: — Pyonatanru xye klu tshinanu xye tokantshi halikakalutu, hakanhatshri pirana potukni.

⁶ Waneya wla htshinatkano: — Xye ptowruka halixatka. Hit-honra mitshikananu hajerno hiyrunu hapkatatatshri potuko hajerno, hyinuwajikol-potukno hiyrunu hmahaxyawak-potuko hajerno. Honunnahatewatatshripa nutahatanu. Honha hiweklu heneklewatatshri hichpakhaxikatshri hajer-ha nenekanru, henekachalur-potuko.

⁷ Hallirewatatshri yoptotanru xye hita tshinanuya. Hitapni Royakalutepno. Hiyrun-koxa wale nowhenepni.

⁸ Seyni jhamleholune, malixkane, hektutu kamhalu hamotatshine, jiylalewaklerune, kapoklewaklerune, kahontshine, mayawletshicha kahwakpiratatshine, ptowru pejnu kayloklerune wanna ptowruneka kwawaklena tshitshmero yehi, tshitshmero powha nwaka, enxofre yehi. Wane hapokatshinepa hepi rixinri hipuktshipni.

Jerusalém Poktshi Herotu Piranapni

⁹ Waneya satu wanna, hiwejikalune Hoyakalu towrerune tenhohne hajene sete, salewaktshikaka stono yehi himwatshine, wla tshinno: — Puna, nekhitapanyi hnuruwpiratatshro, Carneiro Whene tshinkaluru hnunropa.

¹⁰ Hoyakalu Hiwejikaluru hanikno. Waneya Hoyakalu towreru tenhohne hajeru satu himriji tenolu hitakno. Waneya rekhitno hijhakaluru poktshi tenhohne, Hoyakalu yehi hichpajikatshri wale honukla Hoyakalu poktshite Jerusalém tshinikowaka.

¹¹ Hoyakalu hoyaknu hatajnuyma ratawna. Sotlu kwenuru jaspe tshinkaluru pixka, katajir-potuko pixka rixa hatawnaleta wale poktshi.

¹² Satu tsru cerca tenolu potuko, hichyatlu poktshi. Doze jihlojikowakkaka rimwa cerca. Doze koxna hiwejikalune Hoyakalu towrerune tenhohne hajene cerca hiphaptote hinotatshine. Jihlojikowakkaka hichyapre rawa hiwaktshikaka yonatkaluru. Doze israel-nerune xkehi wane hwahiwakata.

¹³ Ptowru sreta cerca-teko rawa mapa jihlojikowaka. Hiyáhoni tkatshi hichpajyawaka sreta cerca-te mapa jihlojikowaka hwa. Tkatshi hichpajyawaka potukle sreta cerca-te mapa jihlojikowaka hwa. Kahnete sreta cerca-te rawa mapa jihlojikowaka. Hiyrun-koxa tkatshi himxijyawaka sreta cerca-te rawa mapa jihlojikowaka.

¹⁴ Poktshi cerca-te, doze sotlu tsrukakalu hoho hwa. Doze Carneiro Whene tshinkaluru nuretanune hiwakkaka, doze sotlu hyonatkatka.

¹⁵ Hiwejikaluru Hoyakalu towreru tenhohne hajeru, niynumsatjeru waneylu satu yahotapije ouro kamhikolu poktshi hyahoxinripa, poktshi hiphaptote hiyrunu poktshi cerca-te hyahoxinripa.

¹⁶ Poktshi quatro tsojrirutu. Rowuknu hiyrunu htsernu pixkakakluni. Hyahotpoktshitlu hyahotaprejeyma, hepi mil duzentos quilômetros psolu. Rowuknu, htsernu hiyrunu htennu pixkakakluni.

¹⁷ Hiyrun-koxa hiwejikaluru Hoyakalu towreru tenhohne hajeru yahotlu poktshi cerca-te. Cerca tsernu sessenta e cinco metros pa pixnunru, yine hix-yahtaljexyawaklu pixka rixa, Hoyakalu towreru tenhohne hajeru.

¹⁸ Poktshi cerca-te sotlute, sotlu kwenuru jaspe tshinkaluru kamhikolu. Tsru poktshi honra ouro hixirikaluru kamhikolu, katajru garrafa pixka.

¹⁹ Poktshi cerca-te hwahohleru sotlukaka, kwenuru, kihleru ruhlexika. Mitshikananu sotlu cerca hwahohleru jaspe kamhikolni. Sotlu hepi rixinri cerca hwahohleru safira kamhikolni. Sotlu mapa rixinri cerca hwahohleru ágata kamhikolni. Sotlu quatro rixinri cerca hwahohleru esmeralda kamhikolni.

²⁰ Sotlu cinco rixinri sardônio kamhikolni. Sotlu seis rixinri sárdio kamhikolni. Sotlu sete rixinri crisólito kamhikolni. Sotlu oito rixinri berilo kamhikolni. Sotlu nove rixinri topázio kamhikolni. Sotlu dez rixinri crisópraso kamhikolni. Sotlu onze rixinri jacinto kamhikolni. Sotlu doze rixinri ametista kamhikolni.

²¹ Poktshi cerca-te jihlojikowakkaka hichyaprekaka pérola kamhikolni, doze-na pérola-ne. Satkaka hichyapi satu pérola. Tsru poktshi hapokaka ouro kamhikolu, hixirikaluru potuko, katajru garrafa pixka, wan-rixa.

²² Hi satukna Hoyakalupji wane nexya. Klu tshinanu Tsru Hixikatshriwa Hoyakalu, ptowru potuko himukatatshri hiyrunu Carneiro Whene tshinkaluru wannakni Hoyakalupjine.

²³ Wale poktshi hi hijhalu tkatshi hiyrun-koxa hi ksuruko rujha klu tshinanu Hoyakalu hoyaknu hatnu nikotlu wane. Carneiro Whene tshinkaluru poktshi katalutekni wale.

²⁴ Ptowru tshijne hajene wale hatnu yanya. Hiyrun-koxa pohirtshine xye tshijne hajene ranikanruna hpohirewlena.

²⁵ Poktshi jihlokawaklekaka psol-hohneruka rutpuka. Hiyrun-koxa wane hi rawa hoyetshno.

²⁶ Ptowru tshijne hajene poktshi nwaka ranikanruna hpohiwlena hiyrun-koxa hpohirewlena.

²⁷ Hikepni hektuntshi, hi kapatmenuru kamhatshri, hi hayoklewatatshriko wane jihlokanu. Halikaka wale poktshi jihlokatshinepa, Carneiro Whene tshinkaluru yonawahlote steno hiweklu heneklewatatshri tshinkaluru hiwakatkaluru tsonu jihlokanu.