Apocalipse 20 - Bíblia

Tsru Kamtshi Satanás Hostuxikolu Mil Mhale Pejnu Piranapni

¹ Waneya netlu satu hiwejikaluru Hoyakalu towreru tenhohne hajeru tenhohne hichpajyawaka. Chave teno pnawaka hichyapi himyo ranijya. Hiyrunu tsru yomuwatsa, tsrukakalu himyo ranijya.

² Waneya hkachpotutlu dragão, wale honra himnu hitsruka, Tsru Kamtshini wale, Satanás tshinkalurni. Rostutlu. Mil mhale pejnu hostutkalurni wale.

³ Waneya hiwejikaluru Hoyakalu towreru tenhohne hajeru teno pnawaka ruknokatkalu Tsru Kamtshi. Waneya wane ruchyayehitlu, roho ripixyalu hma yokwijexyawakanupna yine ptowru tshijne hajene, mil mhale pejnu tsonu. Waneya wane pnutepa rumukata hicholetka pchini tsonu.

⁴ Hiyrun-koxa pohirtshi tuplawaklekaka neta. Wane tuplatatshine koxa neta. Towuwlu henekkalune retmayxaklerewaxyawakapna. Hiyrun-koxa yinni hiwejinri neta, kastaknojitkalunni Jesus hiphujexikolu pirana tshinanu hiyrunu Hoyakalu tokanu hinkaklexikolu tshinanu. Nyikaka kmatsyiru hiyrunu kmatsyiru yáhole mkahwakpiratkanni hiyrun-koxa kmatsyiru himaxikole jrottshi hitakkaluru ho myotshi hitakkaluru malukanni wanna. Hiyáhoni nyi yinni Cristo-yma riwekanna hiyrunu hpohirewatanna mil mhale pejnu.

⁵ Xyekni mitshikananu hipuktshi hichpajikatshri tshinkaluru. Seyni pimrinni hipnatshinni hi riwekanna haté mil mhale pejnu nikawninipa.

⁶ Kihle hchinikanurunepni hiyrunu Hoyakalununepni wanna mitshikananu hiweklutnaka kayatatshinepa. Klu tshinanu hipuktshi, hepi rixinri hi hkachitanna wanna. Sacerdote-nepni Hoyakalu tshinanu hiyrunu Cristo tshinanu. Hiyrun-koxa Cristo-yma hpohirewatanna mil mhale pejnu.

Tsru Kamtshi Satanás Hapnokaxikolu Piranapni

⁷ Mil mhale hiknohinipa waneya Satanás tshinkaluru hkachixikowaka yehi ruchoxikotka.

⁸ Waneya ruchpakanu ptowru nerkaka, xye tshiji ptowru sreta hwatshine hyokwijexyawakapa, waleni Gogue hiyrunu Magogue tshinikowaka. Yine ksatuji, mar powha wnaha hwatshri pejnu rapatjexinna hiylakaklu tshinanupa.

⁹ Tshij-hoho psoluka hyapanna waneya poktshi, Hoyakalu nurrene ralixjene yehi, halukkaluru poktshi hsajrukanna. Waneya tshitshmero tenhohne, Hoyakalu hwiywaka hichpajini, hyoxikanunna wanna yinepni.

¹⁰ Waneya Tsru Kamtshi hyokwijetjerna tshitshmero powha, enxofre yehi hitokote, ruknokkatka, kmatsyiru hiyrunu hoyakalu tokanu hinkakletatshri minje hwiywaka potuko. Wane hsaletpotuxíkona hohohne, hoyetshno hike rixiniko mnikawnakatupa.

Hapnokatlu Hinatshripa Hapkatatatshri Potuko Piranapni

¹¹ Waneya netlu satu pohirtshi tuplawakle tsru potuko. Klatlu. Hoyakalu wane tuplatatshri koxa neta. Tshiji hiyrunu tenhohne wale hetanu rasujyatka. Hiyáhoni tshiji hiyrunu malehohnewaka hi rukchijika hanukta hya. Hike hetatnaklu.

¹² Waneya hipnatshine neta. Wanna hipnatshine hijhakalune hiyrunu mujhakonpotu Hoyakalu hoji sreta hyopkakna. Waneya yonawahlo stenkaka kopralakka. Satutnaka yonawahlo steno kopralakka, hiwejikaluro steno tshinkaluru. Waneya hipnatshine hikolukkatka hkamhalerna pirana tshinanu, papel-mta hwapiranatatshri yonatkaluru tshinanu.

¹³ Hipnatshine mar powha hahyekatshine pejnu wane hkochpajikna. Hipuktshi hiyrunu hamhikowaka hwakanatatshine wane hkochpajikna. Satkaka wanna ptowruneka hikolukkatka hkamhalerna pirana tshinanu, papel-mta hwapiranatatshri yonatkaluru tshinanu.

¹⁴ Waneya hipuktshi hiyrunu hamhikowaka hwakanatatshine tshitshmero powha yehi hiknokkana. Xyekni hipuktshi hepi rixinri pirana.

¹⁵ Ptowru yineru hiwaka pejnu yonawahlo steno hiweklu hinkakletatshri myonhiwakatkotu, tshitshmero powha hiknokkotka.