Apocalipse 2 - Bíblia

Tokantshi Cristo Halixatshine Hapatjetatshine Éfeso Poktshi Hajene Tshinanu Piranapni

¹ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Éfeso poktshi hajene kosekatshri: “Xye tokantshi runkakleta katahirine sete hpotukle myo hanikamxikatshri sete katalu hanikapine, ouro kamhikolu hanikajite yapatshri, wla htshina:

² Hkamrure nimata. Nimatlu hkamrurewpotutatka ptowru mchiretannutshiyma. Hiyrunu nimatlu hektutu kkamhaklerune kamrure hi hyima. Himlukanutna jejine nuretkalune tshinikatshinwa seyni hi wan-rixna. Hetna kayloklerune rixyawakna.

³ Kahwakaklerunhi, ptowru salewaktshi hakotatshinhi. Nhiwaka himalwuxikolu tshinanu hkamrurewata hiyrunu hi hihrokatka.

⁴ Wanepnawaka nkahekhi psotsonu klu tshinanu hiknokatkalu mitshikananu hichiniklewle.

⁵ Hiyáhoni hichinikapanru xako mitshikananu hchinikanu hma pupjekanatkanuklunuwa waneya hehchinikanutanu. Mitshikananu hkamhajekanatanru kamrurtshi pixka hixanu. Klu tshinanu hma mehchinikanutkanuklununapa nunhapkatanu hix-yehi. Katalu hanikapi pixkalutu nkonanhi.

⁶ Seyni xye halikaka waneyhi. Nicolaítas kamrure hahnanuta hit-koxa hahnanuxyawaklu pixka.

⁷ Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene: Hallitatshripa nenekanu hnijyawakaplu hahmuna sahi, hahmuna hiweklu heneklewatatshri sahi, Hoyakalu hitaklucha kihler-potuko yehi hanikajite hwatshriya.”

Tokantshi Cristo Halixatshine Hapatjetatshine Esmirna Poktshi Hajene Tshinanu Piranapni

⁸ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Esmirna poktshi hajene kosekatshri: “Xye pirana runkakhi mitshikananu hwatshri, hiyrunu rapkatle hwatshri, hipnatshri kananu seyni hiwekatshritka.

⁹ Nimathetlu hsalewaklu. Nimatlu hike mwikanemkahi seyni halikaka phurunhi. Nimathetna heyikjene judeu-ne tshinikatshinwa seyni hi halikakni. Seyni tsru kamtshi Satanás maklutenni wanna.

¹⁰ Hi hpikanru salewaktshi hix-yehi hapokatshripa. Hjemanu! Halikaka tsru kamtshi Satanás satkaka hixa preso rutakjixanu hyahoxikowakapa. Dez hohne pejnu hsaletko. Seyni hi hihrokahchinikanutanu yahmaklu hipnanu. Waneyapa phuru hitakjetanru pixkalutu sahyi nenekanhi hiweklu heneklewatatshri.

¹¹ Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene: Hallirewatatshri hi hetanru hepi rixinri hipuktshi.”

Tokantshi Cristo Halixatshine Hapatjetatshine Pérgamo Poktshi Hajene Tshinanu Piranapni

¹² — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Pérgamo poktshi hajene kosekatshri: “Xye pirana runkakhi yohlolewapi ptowru sretako hakoxikatshri hinama honoxikatshri himwatshri.

¹³ Nimatlu hwiywaka, tsru kamtshi Satanás pohirewaxyawaka yehi. Seyni nhiwaka homkahle hi hiknokatka hiyrun-koxa hi hiknokatkalu halixlu pirana homkahpotuxyawaka. Antipas tshinkaluru nuphujtatjeru ptowutkolu potuko rupniniklunupapkonatka hix-yehi hiylaxikaluru, tsru kamtshi Satanás hwiywaka yehi, seyni hi hiknok-halixletatka.

¹⁴ Wanepnawaka psotsonu nkahekhi klu tshinanu hixaymalune rawna Balaão hasrukle homkahitatshine. Wale honra mitshi hasrukatkalu Balaque tshinkaluru hmajnakowkakjixyawakna israel-nerune, klu tshinanu mayawletshichakaka nikluru henejikolu hnikjixatkana yine hiyrunu rasrukatkana rapoklewaxyawakapna.

¹⁵ Hix-yehi koxa rawna nicolaítas hasrukle homkahitatshine.

¹⁶ Hiyáhoni hehchinikanutanu! Hma mehchinikanutkanuklunupa nunhapkatanu hixa nwaka waneya nkamnitapanna wan-hixjetatshine nonama hwatshri yohlolewapiyma.

¹⁷ Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene: “Hallirewatatshri, maná mimatyehitkotu nenekanru. Hiyrun-koxa nenekanru sotlu tshraji klatalu yonatkaluru hiwaktshi herotu mimatkotu. Hike yineru himatanru hiwaktshi seyni yoptotatshri tsonu himatanru.”

Tokantshi Cristo Halixatshine Hapatjetatshine Tiatira Poktshi Hajene Tshinanu Piranapni

¹⁸ — Xye pirana pyonanwakatanru hiwejikaluru Hoyakalu towreru tenhohne hajeru Cristo halixatshine hapatjetatshine Tiatira poktshi hajene kosekatshri: “Xye pirana runkakhi Hoyakalu Whene, tshitshmero pixka hixayhaletatshri hiyrunu yomuwa bronze hixirikkaluru hatajnu pixka hixatshri hiyrunu hatawnajixitatshri.

¹⁹ Nimatlu hkamrure Cristo tshinanu, hichiniklewle nimata. Nimatlu hepixlewle pimrine tshinanu hiyrunu halixle pirana nimata. Nimatlu hmachiretannu hakotachale hiyrun-koxa nimatlu xawakni hohne hkamrure hita tshinanu, hekamhale yohnikatka.

²⁰ Wanepnawaka nkahekhi psotsonu klu tshinanu hixa hetachajetlo suxo Jezabel tshinkaluro Hoyakalu tokanu hinkakletatshro phuta tshinikatshrowa seyni tasrukjetna yine hiyrunu tyokwijetna yine ntowrene rapoklewaxyawakapna hiyrunu hnijyawakapluna nikluru mayawletshicha henekachalurkaka.

²¹ Pchini hohnejijimka neneklo tehchinikanuxyawakamkapa tapoklewaxinri seyni hi taluklu.

²² Hiyáhoni xawakni hapoklewjetatshine jeko nuknokanro wala hiyrunu walayma himopatlewatatshine, tsru salewaktshi potuko yehi, hma mehchinikanutkanuklunupna hkamrureyna.

²³ Wala whenene nuylatanu. Hiyáhoni ptowruka Cristo halixatshine hapatjexikowakkaka hajene himatanu hitakni yineru hchinikanu hiyrunu yineru haji hetjetatshrino. Hiyrunu hixa satkaka wenutko hkamrure wenru pso.

²⁴ Seyni wla ntshinhi pimrine Tiatira poktshi hajenhi, hixa ptowruneka xye hasruklu momkahitkane hiyrunu hipiranacha pimrine kochtshekleru pirana, tsru kamtshi Satanás tsonu himukata hiphujetleru pirana, mimatkanhi, wla ntshinhi. Hi satuko hinolu nenekanhi wane pnutetka.

²⁵ Xye tsonu, himwaleru halikaka hi hiknokanu nmapokkanuko pchinika.

²⁶ “Hallirewatatshripa, kamrurtshi nalukanru kamhapotutatshri haté hmahaxyawaka papko potuko, towuwlu nenekanru pa nerkaka htowuwaxyawakapa. Towuwlu Nuru henejyano pixkalutu nenekanru wan-hixatshri yineru.

²⁷ Kanojeru yomuwajeyma htowuxinna. Kastonolu kajpa kamhikolu pixka rixa himlokkotanunna pa nerkakapni.

²⁸ Hohisahi nenekanru wan-hixatshri yineru.

²⁹ Kajnakopnahi hyijnakoxyawakapa, hyijnakotanru Hoyakalu Hiwejikaluru tshinyawakna Cristo halixatshine hapatjexikowakkaka hajene.”