Apocalipse 19 - Bíblia

Himuwlu Tsru Potuko Tenhohne Piranapni

¹ Waneya wane wkatanu tsru himalu, hixolune tokanu hetko njema. Wla tshinatshine: — Himalwutkalurni Hoyakalu! Hiwekkakalurni Hoyakalu! Wuphujetanru Hoyakalu royaknu tshinanu hiyrunu rumukatle tshinanu!

² Klu tshinanu Hoyakalu halikakni, potuka hchinikanru rapnokatlo hektutu kkamhaklero potuko suxo kapoklewaklero, ptowru tshijne himtukatshro tektunu tshinanu. Hoyakalu hiylatlo klu tshinanu tuylajekanatna Hoyakalu towrerune.”

³ Waneya hsaplewatatnakna. Wla htshinna: — Himalwutkalurni Hoyakalu! Tsru poktshi yoxikkaluru palnaphata hike rixiniko mnikawnakatupa!”

⁴ Waneya tsrukakalune vinte e quatro pejnu hiyrun-koxa hiwejikalune quatro, yoptsojityehitlu Hoyakalustsi waneya rimalwutluna Hoyakalu pohirtshi tuplawakle tuplatatshri. Wla htshinna: — Amém! Himalwutkalurni Hoyakalu!

⁵ Waneya pohirtshi tuplawakle ruchpakhimaxya satu tokantshi wla tshinatshri: — Himalwutanru Woyakalute hixa Hoyakalu towrerunhi, ptowru yineru, yine hijhakalune hiyrunu mujhakone, hiyrunu ptowru yineru Hoyakalu kahwakpiratatshine pejnu.”

⁶ Waneya satu tsru himalu njema, hixolune tokanu nikahwaklu, hatatjewa tsru hokanu njema ho tsru rutlohle hima pixkalutu njema wla tshinatshri: — Himalwutkalurni Hoyakalu! Klu tshinanu Tsru Hixikatshriwa Hoyakalu ptowru himukatatshri towuwata!

⁷ Wumuwatanu! Wpoyikowatanu! Wpohiwkakanru Hoyakalu! Klu tshinanu rapokpapkoluta Carneiro Whene tshinkaluru hnunrowaxyawakapa. Suxo hanunrotleropa hihlepokotkatka hnunrowlu tshinanupa.

⁸ Mkatshri tenekka tmakaxyawakaplu, linho-mta, kihler-potuko, psalo saxpalemtalu, katajir-potuko. Xye linho-mta hyapkaklu Hoyakalu nurrene ralixjene kamrure, kihleru, potukalu.

⁹ Waneya Hoyakalu towreru tenhohne hajeru wla htshinno: — Xye pyonatanu: “Tshanixkalune Carneiro Whene tshinkaluru hnunrowle nikle hapokatshinepa, halikaka poyikowatatshinepa.” Hiyrun-koxa Hoyakalu towreru tenhohne hajeru wla htshinno: — Xyekni Hoyakalu tokanu halikak-potuko.

¹⁰ Waneya Hoyakalu towreru tenhohne hajerumka nyoptsojityehita nimalwuxyawakaplu seyni wale wan-tshinno: — Hike, hi wane pixanu! Hit-honra pixje kamrurewatatshrino, Hoyakalu towreru, pmoletanune Cristo tshinanu, Jesus hiphujetatshineymalutno. Hiyáhoni Hoyakalu himalwutanu halikaka! Klu tshinanu halikaka pirana Jesus hiphujetleru pirana, Hoyakalu tokanu hinkakletatshine mixkotjeru.

Cristo Hallitanna Hkamnitjene Piranapni

¹¹ Waneya netlu tenhohne kotpukkaluru. Hetanu! Satu cavalo klatalu hakanhatka. Cavalo tji yapatshri hiwakni Ptowutkolu Halikakalutu. Potuka hchinikanurni, retamayxaklerewatawa yahotkaklu hkamhiywakapa.

¹² Hiyhale tshitshime pixka rixa hatawnaleta. Hiyrun-koxa híxolu pohirtshi sahyekaka hsahyeta. Khiwaklu yonatkaluruya. Hike himatlu wale hiwaka seyni wale tsonupka himatlu.

¹³ Mkatshri hmakatleru, hrahtshi hyonrikka. Hhiwaka, Hoyakalu Tokanu tshinkaluru.

¹⁴ Hiyrunu soldado-ne tenhohne hajene homkahjetlu. Cavalo-ne klatalune hyapna. Mkatshri linho-mta tseyo saxpaleru, klat-powranuru hmakatna.

¹⁵ Wale nama yohlolewapi hakotatshri potuko honoxya. Yohlolewapiyma ruylakna yine, ptowru tshijne hajeneka. Htowutanna hipokananu, yomuwaje pa chikonurutu pixkalutuyma htowutna. Hkatsretanunna yinepni, uva katsrekjexikowaka-paji hwatshine pixka rixanna yinepni rimathexyawakapluna yine Hoyakalu ptowru potuko himukatatshri, hahnanuwle.

¹⁶ Hiyrun-koxa himkalu hiyrunu hitpali raw-yonhata. Wla htshin-yonhata: “Pohirtshine Pohire hiyrunu tsru hixikatshinwa Hitsrukatni.”

¹⁷ Waneya netlu satu hiwejikaluru Hoyakalu towreru tenhohne hajeru tkatshi hoho yopkakatshri. Waneya tsru tokanuyma wla htshinatkana ptowru kamejirune teno yapatshine: — Hinanu. Hapatjetanu tsru niklu yehi Hoyakalu hitakanru.

¹⁸ Hinanu hnikapyawakaplu pohirtshinni hitu, soldado-ne kosekatshinni hitu, soldado-nni hitu, cavalo-nni hitu hiyrunu cavalo-nni yapakanatatshinni hitu hiyrun-koxa ptowrunek-yinni hitu, towrertshinni hitu, mtowutkonni hitu, yinni hijhakalunni hitu, yinni mujhakonni hitu hnikanu.

¹⁹ Waneya wane wkatanu netlu kmatsyiru, pohirtshine xye tshijne hajene hiyrunu wanna soldado-tene hixolune yahoxyawakaplu cavalo yapatshri hiyrunu wale soldado-tene.

²⁰ Seyni kmatsyiru kachitkatka hiyrunu Hoyakalu tokanu hinkakletatshri minjeni, wale honukla himyekaklewatatshrikaka kmatsyiru hetanu kamhajekanatatshri. Wale kachitkatka kmatsyiruyma. Himyekaklewatatshrikaka hkamhaleru tshinanu hyokwijekanatna yine kmatsyiru himaxikle himwatshine, wanna kmatsyiru yáholu kahwakpiratatshine. Hiyáhoni tshitshmero powha yehi, enxofre katshowuphalu yehi ruknokkatkana nyi hepi, hiwekatshineko.

²¹ Waneya pimrinepni ruylatkonna yohlolewapi, cavalo yapatshri nama honoxikatshriyma. Waneyakni ptowru kamejiru hinanuwata wannani hitu tshinanu.