Apocalipse 18 - Bíblia

Tsru Poktshi Pohitkaluru Babilônia Tshinikowaka Himtuwnalepa Piranapni

¹ Waneya wane wkatanu netlu satu hiwejikaluru Hoyakalu towreru tenhohne hajeru, tenhohne hichpajikatshri. Tsru himukatlu himwatshrini hiyrunu royaknu hatatlu tshiji.

² Hixko saplewle rixa, wla htshin-sapleta: “Tsru poktshi pohitkaluru Babilônia tshinikowaka yotkakatka! Poyahnu hyotkakatka! Kamtshine hwiywaka rixa, ptowru hiwejikaluru hektutu hwiywaka yohimaxikowaka rixa hiyrunu ptowru kamejiru kananuru, heyikkalurupji rixatka.

³ Klu tshinanu ptowru tshijne hajeru hirlu katsh-halu, himtuklewatatshri tapoklewle tapiklewaxya tshinanu. Pohirtshine xye tshijne hajene hapoklewata walayma. Hiyrun-koxa maronewatatshine, xye tshijne hajene pohirenni ptowru hixatshri halukkaluru wala yehi hwatshri.”

⁴ Waneya satu tokantshi njema tenhohne hichpakhimaxikatshri, wla tshinatshri: — Nonerune wala yehi hasujini. Tektunu hmepirexyawakanupa hiyrunu hma salexikowakanupa walayma.

⁵ Klu tshinanu tektunu t-tsepoxnawa haté tenhohne rapkata. Hoyakalu hi hamtaklu hektutu tkamhalerukaka.

⁶ Papnutanro tixa hapnokatlewlexyawaka pixka. Tkamhaleru pixa nwaka tkamhinri pso, psatkakyehitanro hepi kata wane pso. Hirapi stono tutakhatanru, hepi kata putakhaxinro.

⁷ Kihleru hiweklu texini talixkoxiniklunwa, wane pso salewaktshiko pixkakanro. Klu tshinanu wla ttshinahchinikanuta: “Hita pohirewatatshrono, pohirtshi tuplawakle tuplatatshrono. Hi hipnahnurutatshrono hita hiyrunu hikeklu hohne wamontshi netanu.”

⁸ Hiyáhoni wale tshinanu t-salewnale, hipuktshi, wamontshi hiyrunu natshi hakanhanu pa hohne pchini hohnejiji wale ptowruka tetanu. Hiyrunu tshitshmeroyma tnikaxikolupa psoluyaka. Klu tshinanu himukatatshri potuklu Tsru Hixikatshriwa Hoyakalu tapnokatjeru.

Tsru Poktshi Pohitkaluru Babilônia Tshinikowaka Hamotatshine Wamonnu Piranapni

⁹ Pohirtshine, xye tshijne hajene, hapoklewatatshine, kihle hiweklu hetatshine wala kapoklewakleroymalune, hitshiyahatanro, rikaheknanuwatanrona tyoxijikolupha rexinipna.

¹⁰ Tsalexikolu pikatshine tshinanni howuka hyopkakachatanna. Wla tshinachatatshinepni: — Kwamonuru potuko! Ha, kwamonuru potuko tsru poktshi pohitkaluru Babilônia tshinikowaka, poktshi honukla tsrukakalu potuko! Klu tshinanu satu hora-jiji yaka tsonu papnokatle kachitanatkayi.

¹¹ Waneya kmaronewaklerune hitshiyahatanro hiyrunu riwamonuwnanrona klu tshinanu hike wane wkatanu hanjitanru rejnunkatna.

¹² Hike hanjitanru ruchanremkana ouro, prata, sotlujikaka kwenur-potu, tuwutu pérola-ji. Hiyrunu mkatshri phayamtalu linho-mta, hi mkatshri seroluko, hi hepramtalu seda-mtako, hi carneiro pixi serolu kamhikoluko, hi hahmuna kihleruko, hi rapkajere kamhikolu pajiko, hi hahmuna kwenuru kamhikolu pajkaka, hi bronze kamhikaluru, hi yomuwa, hi sotlu chpata kwenuruko ranjitkatkana.

¹³ Hi nijittshi yapjeruko canela tshinkaluru, hi phamluphaluko, hi phamluhaloko, hi phamlu pahiriko ranjitkana. Hike hanjitanru vinho-ha, hi azeite-ha, hi trigo pahi hixirikkaluruko, hi trigo-jiko, hi pratshineko, hi carneiro-neko, hi cavalo-neko, hi tshiji yapatshrokaka cavalo kosetanroko, hi towrertshichakakako, hi yine hiwejinriko ranjitna yine.

¹⁴ Jichanrewaklerune wla htshinanwakatluna tsru poktshi: — Pet-sotanrekaka, palukanrukak-potuko nikawnatka. Ptowru hixatshri kihleru pohirewnalu hiyrunu ptowru hixatshri kihlekakalu pimwakanatanru pamhinina. Hikeklu hohne rukchikko.

¹⁵ Waneya hichanrewlu kyinuwakleyalune, tsru poktshini tshinanu pohirewnatshine, howuka hyopkakna, tsru poktshi hapnokaxikolu hamlenu tshinanu. Ritshiyahatanruna, riwamonuwatanruna. Wla htshinna:

¹⁶ — Ha, kwamonuru! Kwamonur-potuko tsru poktshi klu tshinanu mitshikananu mkatshri kihleru psalo saxpaleru, mkatshrimta serolu, mkatshrimta carneiro pixi kamhikolu-mta serolu, ouro, sotlukaka kwenuru hiyrunu pérola-ji mkatshri hihlexikaluru hmakatjekanatna mitshi! Seyni satu hora-pka tshinanu tsonu, ptowru ppohirewnale tsru potuko pamhinina!

¹⁷ Hiyrun-koxa ptowru tsro kanawa kosekatshri, tsro kanawa yapatshine koxa, hiyrunu tsro kanawkaka kamrurewaxikatshine hiyrunu pimrine mar powha kamrurewaxikatshine ptowruneka howuka hyopkakna.

¹⁸ Waneya tsru poktshi yoxijikolupha rexinixkana, hsaplewpotutna. Wla htshin-sapletna: — Hi rawa xye pixkalutu tsru poktshi!

¹⁹ Waneya tshiji pahi hpolojiwuxnawana. Hsaplewatna. Htshiyahatna. Wla htshinna: — Hi pa wamonnukananru! Hi pa wamonnukananru tsru poktshi pirana! Klu tshinanu wale poktshi pohirewnale tshinanu ptowru kkanawateru, mar powha hwatshri mitshikananu hpohirewnatka. Seyni satu hora-pka tshinanu tsonu tnikawnapotutanatka.

²⁰ Hiyáhoni xawakni himuwatanu tenhohne hwatshinhi, Hoyakalunerune, nuretkalunhi hiyrunu Hoyakalu tokanu hinkakletatshinhi. Klu tshinanu Hoyakalu hapnokatlu wale tsru poktshi, rixjekanaxyawakhi tsru poktshi pixka rixlu.

Hikeklu Hpanawaxiko Babilônia Poktshi Piranapni

²¹ Waneya satu hiwejikaluru Hoyakalu towreru tenhohne hajeru hixkolu homuklu satu tsru sotlu, hinolu potuko. Waneya mar powha ruknokatkalu sotlu. Wla htshina: — Wla pso mixkonuyma ruknokkona tsru poktshi Babilônia tshinikowaka. Hikeklu hohne rukchikkonatka.

²² Hikeklu harpa hima wane jemikotka, hi pimri tokluru himako jemko, hi tumleji hima jemko, hi kowi hima jemko, pixa Babilônia-yi hitokoteya. Ptowru hixatshri kamhakaluru hikeklu rukchikkotka pix-yehiya. Pix-yehi hikeklu hohne hjemikotka kamrurewatatshine sejire.

²³ Hiyrun-koxa hikeklu lamparina wane nikoxinixka. Hnunrowatatshri ho hnuruwatatshro tokanu, hikeklu pix-yehi hjemikotka. Hichanrewatatshine pix-yehi yapjetatshine ptowru tshijne hajene hichanrewatatshine yohnik-himukatatshine rixapna mitshi. Klu tshinanu pkahontshiwle ptowru tshijne hajene hyokwijekanata.

²⁴ Tsru poktshi Babilônia hapnokatka klu tshinanu wane rawa Hoyakalu tokanu hinkakletatshine hraha hiyokkaluru hiyrun-koxa Hoyakalu nurrene ralixjene hraha hiyokkaluru. Halikaka ptowru yinerni hraha xye tshijne hajeru hiylatkaluru Babilônia poktshi hwahrahata.