Apocalipse 17 - Bíblia

Kapoklewaklero Tshinkaluro Piranapni

¹ Satu wanna sete hiwejikalune Hoyakalu towrerune tenhohne hajene, sete stono salewaktshi yehi hanikatshine, hiynumsatno waneya wla htshinno: — Punanu. Nekhitanyi hanu tixa hapnokatletka tsru pohitkaluro kapoklewaklero, wala honira tsru poktshi hixo honhastsi hwatshroni.

² Walayma rapoklewatna xye tshijne pohirene. Ptowru tshijne hajeru himetatka tapoklewle pohwaka tshinanu.

³ Waneya niwejinri ranijyatkano kahnete poktshiri yehi. Waneya wane nexyalo sato suxo kmatsyiru serolu hoho tuplatatshro. Hixo hiwaktshi, Hoyakalu heyikleru wale hoho yonatka. Sete jiwurutu hiyrunu dez hwalutu.

⁴ Suxo kapoklewaklero netanro, mkatshri ksaji seronuru hiyrunu serolu potuko tmakata. Ouro hiyrun-koxa sotlujikaka kwenur-potu hiyrunu tuwutu, pérola tshinkaluru-ji tumuhlewata. Tomyo tkachikanaxyalu satu copa stono katseplu chinikantshi kananuru pirana, tmayxajinri tapoklewle pirana.

⁵ Tojrota raw-yonhata wla tshinatshri: “Yohimakanatkaluru Pirana, Tsru Poktshi Babilônia Tshinikowaka Pirana, Kapoklewaklerone Hinro Hiyrunu Xye Tshijne Mayxaklukaka Hasrukatshro.”

⁶ Waneya netlo suxo kapoklewaklero himetatshro, Hoyakalu nurrene ralixjene hraha pohwaka tshinanu hiyrunu Jesus homkahlu tshinanu hiylatkalunni hraha pohwaka tshinanu. Hiyáhoni nexinixkalo nimyekpotutatka, hi nimat-hichinikanuwatatka.

⁷ Waneya hiwejikaluru Hoyakalu towreru tenhohne hajeru wan-tshinno: — Klu tshinanhe pimyekatka? Xawakni nunkakanyi suxo pirana mimatakanatkotu pirana. Hiyrun-koxa nunkakanyi kmatsyiru, sete jiwurutu hiyrunu dez hwalutu, tutjitjeru pirana.

⁸ Kmatsyiru petanru hiwekakanata seyni xawakni hi riweka. Teno pnawaka hamhikowak-yehi hkanijinipa waneya ruylatko. Hiyáhoni yonawahlo steno hiwekkakalune hiwakkaka yonaxikowaka myonhiwakatkone, xye tshijne hwatshine pejnu himyekanu rexinipluna kmatsyiru. Klu tshinanu riwekakanata, xawakni hi riweka seyni ruphujewnapa.

⁹ Himatkalnutshi raluka xyekaka rimatjemyawakapa yineru: — Sete jiwtshikaka, sete mriji suxo kapoklewaklero tuplaxyawaka piranni. Hiyrunu sete pohirtshine hyapkakleta.

¹⁰ Cinco wanna pohirtshine nikawnatka. Seyni satupka phurutka satu hi hakanhawa. Hiyrun-koxa rakanhinipa pchini tsonu rawanu.

¹¹ Hiyrun-koxa kmatsyiru hiwekakanatatshri seyni xawakni hi riwekanatka pirana, pohiru oito rixinripa. Pohirune sete hkosekjeneymalutni wale. Seyni hamhikowaka hyanuna.

¹² — Dez hwakaka petanru, dez pohirtshinni wanna. Hi hpohirewnana wanna nyi dez pohirtshine seyni towuwlu hyoptotapanna hpohirewaxyawakapna satu hora-pka tsonu kmatsyiruymapa.

¹³ Nyi pohirtshine pa hchinikanurunni. Hiyáhoni renekanruna kmatsyiru hpixkonna hiyrunu htowuwlena.

¹⁴ Carneiro Whene tshinkalurumka hkamnitanna seyni rallitanna klu tshinanu wale honukla ptowru tsru hixikatshriwa hitsrukatni wale, Carneiro Whene tshinkaluru. Pohirtshine pohirni wale. Romkahitjene, waleymalunni wanna htomhalenni wanna. Wanna nuretkalune koxa hallitanna. Poyehi halixlerunni wanna.

¹⁵ Hiyrun-koxa Hoyakalu towreru tenhohne hajeru wla htshinno: — Honha petanru kapoklewaklero tuplaxyawaka, yine hixolunkaka, kakoje neruru hiyrunu pa nrukaka yanumaxikatshine hyapkaka.

¹⁶ Dez hwakaka petanru hiyrunu kmatsyiru hahnanutanro kapoklewaklero. Ptowru potuko hkonanrona, mamkato rixkaklona. Tohitu hnikanna hiyrunu tomanni hyoxikanna tshitshmeroyma.

¹⁷ Klu tshinanu Hoyakalu henekahchinikanutna, pa hchinikanu rixyawakna Hoyakalu halukanru hkamhiywakna. Hiyáhoni wale tshinanu hpohirewaxyawakna renekanruna kmatsyiru, rali hakanhalexinipa tokantshi Hoyakalu tshinyawaka pejnu.

¹⁸ — Suxo kapoklewaklero petanro, tsru poktshi pohitkaluru potuko, ptowru pohirtshine towutatshri tyapkakleta.