Apocalipse 16 - Bíblia

Mitshikananu Tshiji Saletatshri Piranapni

¹ Waneya tsru tokantshi hima njema hiwejikalune Hoyakalu towrerune tenhohne hajene hiynumsatatshri. Hoyakalupji hichpakhimaxya. Wla htshina: — Xawakni hyanu, tshij-hoho hipkajinri sete stono hwatshri, Hoyakalu jhekanu yehi.

² Waneya wane hya mitshikananu Hoyakalu towreru tenhohne hajeru. Rupkaklu histono hwatshri tshij-hoho. Hiyáhoni hanolu kakchiru, katshinolu potuko hapokyehitna wanna yine ptowrunnika kmatsyiru himaxikole himwatshinni hiyrunu kmatsyiru yáholu himalwutatshinni hoho rapoka hanolu.

Tshiji Saletatshri Hepi Rixinri Piranapni

³ Waneya hiwejikaluru Hoyakalu towreru tenhohne hajeru hepi rixinri, hipkaklu histono hwatshri mar powha hoho. Hiyáhoni honha mar powha hwatshri hrahtshi rixnatkawa, hipnatshrini hrahni pixka. Waneya ptowru mar powha hwatshri hiwekatshri hipnanatka.

Tshiji Saletatshri Mapa Rixinri Piranapni

⁴ Waneya hiwejikaluru Hoyakalu towreru tenhohne hajeru mapa rixinri, hipkaklu kastonolu hwatshri wenkaka hiyrunu ptowru ruchpakhaxyawakaka hoho hiyáhoni hrahtshi rixnatkawa.

⁵ Waneya njemtokanutlu hiwejikaluru Hoyakalu towreru tenhohne hajeru, honha towutatshri wla htshina: — Potukalyi pixa Tsru Hixikatshriwa Hoyakalu, xawakni hohne hwatshriyi, mitshikawluru hwatshri hiyrunu hike rixiniko mnikawnakatu hajeryi. Potukalyi xyekaka papnokaxyalu tshiji hwatshinni tshinanu.

⁶ Klu tshinanu pnurrene palixjene hiyrunu ptokanu hinkakletatshine hkochpakahrahatatkana. Hiyáhoni hrahtshi putna. Rapnutkana halikaka.

⁷ Waneya satu tokantshi njema. Kapajiru henekachalu yoxikkaluru hitajikowaka hichpaktokanuxya wla tshinatshri: — Ha, Tsru Hixikatshriwa Hoyakalu, halikak-potuklu hiyrunu potukal-potuko papnokatlekaka papnokaxyana yinni.

Tshiji Saletatshri Quatro Rixinri Piranapni

⁸ Waneya hiwejikaluru Hoyakalu towreru tenhohne hajeru quatro rixinri, hipkaklu histono hwatshri tkatshi hoho. Hiyáhoni tkatshi himukatlu renekka hjimyawakapna yine tshitshmeroyma.

⁹ Ralhakakanna yine tsru hameruyma. Waneya yine hektutu htshinanwakatluna Hoyakalu xye salewaktshikaka towutatshri. Seyni hi rehchinikanutna yinepni, hi rimalwutluna Hoyakalu royaknu tshinanu.

Tshiji Saletatshri Cinco Rixinri Piranapni

¹⁰ Waneya hiwejikaluru Hoyakalu towreru tenhohne hajeru cinco rixinri, hipkaklu histono hwatshri kmatsyiru pohirtshi tuplawakle hoho. Hiyáhoni hpohirewnale mapchahapa, psol-tshijne potuko. Waneya yinni hachkanrutanu tsru tshino retanruna tshinanu.

¹¹ Hiyrun-koxa tsru tshino hjemanruna tshinanu hiyrunu rutsrerna tshinanu hektuwaka htshinanwakatluna Hoyakalu, tenhohne hajeru. Wanepnawaka hi rehchinikanutna hkamrurna hektutu tshinanna.

Tshiji Saletatshri Seis Rixinri Piranapni

¹² Waneya hiwejikaluru Hoyakalu towreru tenhohne hajeru seis rixinri, hipkaklu histono hwatshri tsru wenu Eufrates tshinikowak-hoho. Hiyáhoni wenha hipriha ruhlepokhapoxyawakaplu pohirune tkatshi hichpajyawaka sreta hatnu hapotepa.

¹³ Hiyrun-koxa mapa hiwejikalune kananurune neta, tlolo pixka rixmanetna. Satu dragão nama hichpajya, satu kmatsyiru nama hichpajya hiyrunu hoyakalu minje tokanu hinkakletatshri nama ruchpajya satu.

¹⁴ Nyi hiwejikalune, kamtshinni wanna. Himyekaklewatatshrikaka kamhatshine wanna. Xye tshijne pohirene nwaka hiyrunu xye tshijne hajene ptowruneka nwaka yatshinni, rapatjekajyawakapna yinepni hiylakkaklu nwaka, Hoyakalu Ptowru Himukatatshri, tsru kahwakpirlu hohne tshinanu.

¹⁵ “Hjemanu! Halikaka katshowhuru hinre, munkakletu pixka nixa hinretanu hita. Hiyáhoni kihlehchinikanurupni yineru, wale hohne kahwakatshri, himkalu hihlepokotatshri. Mamkatu phujewaka myapyawakanupa, hma patewaxyawakanupa.”

¹⁶ Hiyáhoni rapatjekakanunna wanna yinepni Armagedom tshinikowaka hebreu tokanuya.

Tshiji Saletatshri Sete Rixinri Piranapni

¹⁷ Waneya hiwejikaluru Hoyakalu towreru tenhohne hajeru sete rixinri, hipkaklu histono hwatshri malehohnewaka yehi. Waneya tokantshi tsru himalu potuko Hoyakalupji, tenhohne hwatshripji, pohirtshi tuplawakle yehi, hichpaktokanuxyatka, wla tshinatshri: — Ralixatka!

¹⁸ Waneya rawatka rawrakle, tokantshi himkaka, rutlohle hiyrunu tshiji hiyoliklu tsrur-potuko. Xye tshij-hoho rawka pchinikna yine xye hi rawapa hiyolik-tshijru wane psolutu.

¹⁹ Tshiji hiyolikle tshinanu wale tsru poktshi mapa hkaniprexnanwa. Hiyrun-koxa ptowru tshijne poktshikaka nikatkatka. Tsru poktshi Babilônia tshinikowaka hi hamtakkatka Hoyakalu hetanuya hiyáhoni katsh-halu copa stono hwatshri pixkalutu, Hoyakalu jhekanu tsru potuko, rutahatanna Babilônia poktshi hajenepni.

²⁰ Hiyrun-koxa ptowru mar powha hwatshijitatshri nikawnatka hiyrunu ptowru teno mrijiwaka ramhachatatka.

²¹ Waneya sotluha tenhohne hichpajikatshri, yine hoho rapokatka. Tsru tshrajhakakalu, quarenta kilo pa hinnu hetkolu satkaka sotluha. Waneya yine hektuwaka htshinanwakatluna Hoyakalu sotluha hsalexyawakna tshinanu, klu tshinanu tsru potuklu xye salewnalu.