Apocalipse 15 - Bíblia

Tsru Salewnalkaka Hapkatatatshri Piranapni

¹ Waneya wane wkatanu netlu satu hetkaluru, tsru potuko himyekaklewatatshri. Waleni sete hiwejikalune Hoyakalu towrerune tenhohne hajene, sete tsru salewaktshi hapkatatatshri hanikatshine. Klu tshinanu ralipretkani Hoyakalu jhekanu.

Cristo Hiwekkaklene Chikale Piranapni

² Waneya netlu tsru mar powha pixkalutu, garrafa phuta kamhikolu, tshitshmeroyma yapjetkaluru. Hiyrun-koxa netna yine, kmatsyiru hiyrunu kmatsyiru yáholu hallitatshine. Kmatsyiru hiwaka número-te hallitatshinekni wanna. Mar powha, garrafa kamhikolu phuta stsi hyopkakakanatna. Harpa-kaka Hoyakalu henejyana htokakanatna.

³ Hchikaletluna Moisés-ni, Tsru Hixikatshriwa Hoyakalu towreru chikale hiyrunu Carneiro Whene tshinkaluru chikale. Wla htshina chikaletna: — Tsru Hixikatshriwa Hoyakalu ptowru potuko himukatatshriyi. Pkamrure pkamhaleru tsru potkakni hiyrunu himyekaklewatatshrini! Ptowru tshijne hajeneko pohirtshine ppohityi pixa. Pkamrure pnurexnawa, halikakalutni, potukal-potuko!

⁴ Kathe hi pikanyi pixa, Tsru Hixikatshriwa Hoyakalu? Hiyrun-koxa kathe hi himalwutanyi poyaknu tshinanu? Klu tshinanu pixa tsonupka potukalyi. Ptowru tshijne hajene hinanwakatanyi rimalwuxyawakapyina. Klu tshinanu hiphujetkalurutkani pkamrure, potukal-potuko.”

Hoyakalu Tshiji Saletatshri Yokanaxyawaka Piranapni

⁵ Waneya rali chikaletletna, netlu Hoyakalu hwiywaka tsonu hruko, nikalumtapji hwatshri kotpukka tenhohneya.

⁶ Waneya hiwejikalune Hoyakalu towrerune tenhohne hajene sete-ne, sete salewaktshi hanikatshine, Hoyakalupji ruchpajyana. Mkatshri katajiru, klatal-potuko, linho kamhikolu hmakatna hiyrunu histatna ruwtoka ouro kamhikolu.

⁷ Waneya satu quatro rixinri hiwejikaluru henekna hiwejikalune Hoyakalu towrerune tenhohne hajene sete-ne, sete stono Hoyakalu jhekanu yehi, ouro kamhikolu, Hoyakalu honra hike rixiniko mnikawnakatu hiwekatshri.

⁸ Waneya Hoyakalupji katseplu kaphalu Hoyakalu hoyaknu tshinanu hiyrunu ruyákole tshinanu. Hiyáhoni hike yineru himukata jihlokletlu Hoyakalupji, hiwejikalune Hoyakalu towrerune tenhohne hajene sete-ne, sete salewaktshi tshiji hma msaletkanu pchinikna.