Apocalipse 14 - Bíblia

Hiwekkakalune Chikale Piranapni

¹ Waneya netatkalu. Carneiro Whene tshinkaluru neta Sião mriji tshinikowak-hoho yopkakatshri. Wale ymalune cento e quarenta e quatro mil yine wale hiwaka hiyrunu Ruru hiwaka himwatshine pejnu. Hijrotna hyonaxikatka.

² Waneya satu hima njema tenhohne hichpajikatshri. Tsru hokanu sejire pixka htshinhimata hiyrunu rutlohle hima pixka htshina. Tokantshi hima njemanru hixo harpa tokle pixka htshinhimata.

³ Cento e quarenta e quatro mil yine, pohirtshi tuplawakle sreta, hiwejikalune quatro hiyrunu vinte e quatro tsrukakalune yoptowaka sreta rawna. Herotu chikalu hchikaletna. Halikaka wanna cento e quarenta e quatro yine, tshiji hwakanatatshine hiwejikane tsonuko himukata himatletlu chikaltshi hchikaletanruna.

⁴ Nyi jejine, cento e quarenta e quatro mil yine pejnu, suxone mapokmanetkanewa, wannani powrahchinikanurune. Nyi jejine Carneiro Whene tshinkaluru homkahitatshinni hanuktako hyini wale. Nyi yin-yehi hanjixikalunni. Wanna honra mitshikananu henekachalu pixkalune Hoyakalu tshinanunepa hiyrunu Carneiro Whene tshinkaluru tshinanunepa.

⁵ Hikeklu rayoklewatna. Hike mixkanni, potukalunni.

Mitshikananu Hiphujetkaluru Tokanu Piranapni

⁶ Waneya satu hiwejikaluru Hoyakalu towreru tenhohne hajeru neta tenhohne palnikatshri. Kihle piranalu potuko hiwekkaklewatatshri pirana hike rixiniko mnikawnakatupa pirana hiphujetatshrini wale. Ptowru tshijne hajeru tshinanupa, ptowru nerkaka tshinanupa, ptowru yineru ptohkaka tshinanupa, ptowru nrukaka tshinanupa hiyrunu ptowru yin-yehi tshinanupa.

⁷ Waneya hipokananu hyanumata, wla htshina: — Hkahwakpiratanru Hoyakalu, hiphujetanru royaknu himalwuruyma. Klu tshinanu rapnokatjixle papko hapokatka. Himalwutanru tenhohne, tshiji, mar powha hiyrunu honha hichpakhaxyawaka hiyakotatshri.

Tokantshi Hiphujetlewatatshri Hepi Rixinri Piranapni

⁸ Waneya satu hiwejikaluru Hoyakalu towreru tenhohne hajeru hepi rixinri, mitshikananu hiwejikaluru Hoyakalu towreru tenhohne hajeru hatjini hya, wla htshina: — Rallitka, rallitka tsru poktshi Babilônia tshinikowaka! Tkamhaleru hapoklewlu katsh-halu himtuklewatatshri potuko, ptowru tshijne hajene tutahata.

Tokantshi Hiphujetlewatatshri Mapa Rixinri Piranapni

⁹ Waneya hiwejikaluru Hoyakalu towreru tenhohne hajeru mapa rixinri homkahitna hiwejikalune Hoyakalu towrerune tenhohne hajene hepi kosekatshine. Waneya hipokananu hyanumata, wla htshina: — Katukta kmatsyiru ho kmatsyiru yáholu himalwuta hiyrunu hanurukta himyo ho hijrota, kmatsyiru himaxikole yoptoxikatshri,

¹⁰ wale yineru rutka hirkaluru Hoyakalu jhekan-ha pixkalutu. Katsh-halu myapjetkotu hirapi stono hiyokkalurupa, Hoyakalu jhekanu hiratshinepni wanna. Hiyrunu walepni salewnapotutanuna tshitshmeroya, enxofre-yma hiwejikalune Hoyakalu towrerune tenhohne hajene potukalune hetanuya hiyrun-koxa Carneiro Whene tshinkaluru hetanu.

¹¹ Tshitshipha hsalewniywakna yehi hichpajikatshri, ratskophatanu hikeklu hohne mnikawnakatupa. Hi hohohne hi hoyetshnoko rapnanutanuna wanna ptowrunepnika kmatsyiru ho wale yáholu himalwutatshine pejnu hiyrunu wanna ptowruneka wale hiwaka himaxikole yoptotatshinepni wan-rixkonna.

¹² Hiyáhoni Hoyakalu nurrene ralixjene haluklu rakotachaxyawakna, Hoyakalu tokanu yonatkaluru romkahpotuxyawakna hiyrunu Jesus ralixachaxyawakna.

Tokantshi Hiphujetlewatatshri Quatro Rixinri Piranapni

¹³ Waneya nyijnakotlu tokantshi tenhohneyalutu wan-tshinatshri: — Xye pirana pyonatanu. Kihlehchinikanurunepni hipnatshine xye hohne pnutpatka Tsru Hixikatshriwa Cristo hiwaka tshinanu hipnatshine. — Hehe, halikakni! — htshina Hoyakalu Hiwejikaluru. — Rapnanutanuna hkamrureyna hiyrun-koxa hkamrurna hkamhajekanatanruna hpohitanna.

Ramikolu Piranapni

¹⁴ Waneya netatkalu. Netlu satu hohimkohi klatalu hiyrunu hohimkohi hoho tuplatatshri neta, jeji nikahwaklu. Pohirtshi sahye, ouro kamhikolu, hijiwu hwa hiyrunu hitaklu hamapi hakotasputatshri himyo hkachixya.

¹⁵ Waneya satu hiwejikaluru Hoyakalu towreru tenhohne hajeru Hoyakalupji hichpajya. Hsaplewata hohimkohi hoho tuplatatshri nwaka. Tsru saple rixa, wla htshin-sapleta: — Pamanu pamapreyma. Klu tshinanu ramikolu klu papko hapokatka pamyawakaplu tshiji hwatshine klu tshinanu ralixatka tshiji hajeru ramikowakapa.

¹⁶ Waneya hohimkohi hoho tuplatatshri hamlu tshiji, hitaklu hamapiyma.

¹⁷ Waneya satu hiwejikaluru Hoyakalu towreru tenhohne hajeru Hoyakalupji, tenhohne hwatshripji hichpajya. Wale koxa himwalu hitaklu hamapi hakotasputatshri.

¹⁸ Waneya hiyrunu satu hiwejikaluru Hoyakalu towreru tenhohne hajeru, tshitshi hislahatshrini wale. Kapajiru henekachalu yoxikjexikowaka hinaple ruchpajya. Hsaplewata tsru saple rixa hitaklu hamapi hakotasputatshri himwatshri nwaka. Wla htshin-sapleta: — Putakle hamapi hakotasputatshriyma pamanru uva hawkaka tshiji hajeru. Klu tshinanu ralixatka uva-ji tshiji hajeru.

¹⁹ Waneya hiwejikaluru Hoyakalu towreru tenhohne hajeru hamlu uva tshiji hwatshri, hitaklu hamapiyma, tshij-hoho hajeru. Waneya ruknoklu uva katsohapi yehi, Hoyakalu jhekanu yehi ruknokna.

²⁰ Tsru poktshi maleka sretate uva katsrekjexikowak-yehi hkatsrexika waneya hrahtshi wane hichpajya. Hrahtshiha trezentos quilômetros howuknu hiyrunu haté cavalo-ne jri tslu pa tennu rapoka hrahtshi.