Apocalipse 13 - Bíblia

Kmatsyiru Mar powha Hichpajikatshri Piranapni

¹ Waneya netlu kmatsyiru mar powha kanjikatshri. Dez hwalu hiyrunu sete jiwlu. Hihwakaka rawa dez pohirtshi sahye pixkalutu. Hijiwkaka rawa yonatkaluru Hoyakalu nwaka hektuwaka tshinatshri.

² Kmatsyiru netanru mhenoklu pixka rixmanetatka. Seyni hijixi urso jixi pixka rixa, hinama leão nama pixka rixa. Waneya Tsru Kamtshi dragão waleko hpixkonu reneklu, hpohirewnale reneklu hiyrunu tsru towuwlu reneklu.

³ Satu kmatsyiru jiwu hipnaphutata seyni ruhlewatatnaka. Hiyáhoni ptowru tshijne hajene himyeka kmatsyiru tshinanu. Romkahitatkaluna kmatsyiru.

⁴ Hiyáhoni rimalwutluna Tsru Kamtshi dragão klu tshinanu tsru pixkontshi reneklu kmatsyiru. Hiyrun-koxa kmatsyiru rimalwutna. Wla htshina himalwuretluna kmatsyiru: — Hanurhe kmatsyiru pixkalutni? Kathe hakot-kamniretlu?

⁵ Waneya ritshitka kmatsyiru tokantshi hektutu hyanumaxyawaka, htserpiranaxnawa. Renekka wan-rixyawaka quarenta e dois ksuru pejnu.

⁶ Hinama hyanumaxyalu hektutu tokantshi Hoyakalu nwaka. Hektutu htshinanwakatlu Hoyakalu hiwaka hiyrunu Hoyakalu hwiywaka hektutu htshinanwakata hiyrun-koxa wanna ptowruneka tenhohne hwatshine hektutu htshinanwakata.

⁷ Himukatlu renekka Hoyakalu nurrene ralixjene hkamnixyawakapa, rallixyawakapna. Hiyrunu towuwlu renekka ptowru nerune, ptowru nrukaka yanumatatshine hiyrunu ptowru tshijne hajene htowuxyawakapa.

⁸ Ptowru tshiji hwatshine, katuktako hi khiwaka Carneiro Whene tshinkaluru, hiylatkaluru papel-te stenoya xye tshijne hiyakotkoklunukananuko, hiweklu heneklewatatshri steno mwa hiwakatkatu, himalwutanru kmatsyiru.

⁹ Kajnakopnalu yijnakotanu.

¹⁰ Kachitkalunepa, kachitkalurunepni. Yine nuretkalune hiylatkalunepa pejnu halikaka ruylatkona. Hiyáhoni Hoyakalu nurrene ralixjene haluklu rakotachaxyawakna hiyrunu ralixachaxyawakna.

Kmatsyiru Tshiji Hitokote Hichpajikatshri Piranapni

¹¹ Waneya netlu satu kmatsyiru tshiji hichpajikatshri. Hepi hwalutni carneiro whene pixka. Seyni htokanu dragão tokanu pixka htshinya.

¹² Mitshikananu kmatsyiru himukatleyma pixka rixa kamrurewleta hepi rixinri kmatsyiru, mitshikananu kmatsyiru hetanuya. Hiyrun-koxa htowutjetlu tshiji hiyrunu tshiji hwatshine ptowruneka rimalwuxyawakapluna mitshikananu kmatsyiru, hiylajiwuphutatkalurutka seyni ruhlewatatnaka.

¹³ Tsru himyekaklewatatshrikaka hkamhajeta. Haté tenhohne rujrukkajyalu tshitshmero tshij-hoho, ptowru yine hetanu.

¹⁴ Hyokwijetna tshiji hwatshine ptowruneka himyekaklewatatshrikaka hkamhaleruyma, rumukatle renejikolu tshinanu, mitshikananu kmatsyiru hetanu. Runkakjixna xye tshijne hajene mayawletshicha hkamhiywakapna kmatsyiru mayawleya, yohlolewapi kastakjiwuxikalurutka seyni hi rupna.

¹⁵ Kmatsyiru hepi rixinri, yoptopixkonuta kmatsyiru mayawle rinniphakajyawakapa, hyanumaxyawakapa hiyrunu pixkontshi rimwiywakapa ruylaxyawakapna ptowru yine mayawletshicha mimalwutkane pejnu.

¹⁶ Waneya hkamhakjixna yine ptowrunek-yine hijhakalune ho mujhakone ho phurune ho towutachatkalune ho hichotkalune wanna ptowruneka, hpotukle myona ho hijrotna rutak-himaxikolexikolupna.

¹⁷ Hiyáhoni hike himukata maronewletanu, hi rumukata hichanrewletanna mitshikananu kmatsyiru himaxikole mimwakane. Rimaxikole waleni kmatsyiru hiwaka ho h-número-te pejnu.

¹⁸ Xyekni himatkalewlu. Jimatkaleru hitakyahokanru kmatsyiru número-te hi pejnuru. Klu tshinanu wale número-te yapkakletlu jeji hixannu. Waleni seiscentos e sessenta e seis.