Apocalipse 12 - Bíblia

Suxo Hiyrunu Kamtshi Dragão Tshinkaluru Piranapni

¹ Waneya tsru himyekaklewatatshri tenhohne rakanhiya. Sato suxo tkatshi makatatshro hiphujewna. Ksuru tojixi hpuko hwa hiyrunu pohirtshi sahye t-sahyeta doze katahiri hwa sahyetlo.

² Kamchiro suxo. Mturu tshino tshinanu t-saplewjeta. Klu tshinanu tmatuwhenpirata.

³ Waneya satu himyekaklewatatshri tenhohne rakanhiyatnaka. Satu dragão tsruru, serolu hiphujewna. Sete jiwuru, dez hwalutu. Sete jiwlu sahyi pohirtshi sahye, hsahyetna.

⁴ Hihchimtayma hkosetlu satupka mapate katahirine (1/3) tenhohne hajerkaka waneya tshij-hoho ruknoklu. Waneya suxo matuwhenpiratatshro hoji sreta hyopkaka Tsru Kamtshi dragão hnijyawakapmaklu towhene hmatuxiniklunupa mturu.

⁵ Waneya tmatuwhenetatka. Jejni. Xyepni ptowru tshijne towutatshripni, hike majnaknutshi hetachatatshripni. Hkochtshekkatka toturu. Hoyakalu yehi ranikkatka. Hoyakalu tuplawakle yehi rutakka.

⁶ Waneya suxo potshkewaka tya hasukleta. Hoyakalu hihlehnapuxyalo nwaka tya. Wane tohluxiko satu mil duzentos e sessenta hohne pejnu.

Yahotkaklu Tenhohne Hwatshri Piranapni

⁷ Waneya tsru hiylakkaklu hwa tenhohne. Miguel tshinkaluru hiyrunu repirene hiwejikalune Hoyakalu towrerune tenhohne hajene yahotlu Tsru Kamtshi dragão hiyrunu hmaklutene kamtshine. Hiyrun-koxa Tsru Kamtshi dragão hiyrunu hmaklutene kamtshine yahotkakamka.

⁸ Ramtakna Tsru Kamtshi dragão hiyrunu repirene kamtshine. Waneya wane wkatanu hi rukchika hwawakletkana tenhohneya.

⁹ Hiyáhoni Tsru Kamtshi dragão tsru kananu, wale honukla himnu hitsruka, Tsru Kaylokleru tshinkaluru, Satanás hiwakatletatshri, ptowru tshijne hajene yokwijetatshri, tenhohne malekate ruknojika. Tshij-hoho ruknokkatka wale hiyrun-koxa hmaklutene kamtshine waleyma ruknokatkana.

¹⁰ Waneya satu tokantshi njema tsru himalu tenhohne hichpajikatshri wla tshinatshri: — Xawakni kananu rapokatka hiweklu hohne, himukatlu, Woyakalute pohirewaxyawaka hiyrunu hnurreru Cristo himukatle towuwle hapokatka. Klu tshinanu wmoletanune Cristo tshinanu jihyehitatshri Hoyakalu yehi hohohne hiyrun-koxa hoyetshno hjihyehitjerna, hiknokkatka.

¹¹ Wmoletanune Cristo tshinanu hallitlu Tsru Kamtshi Carneiro Whene tshinkaluru hraha himukatle tshinanu hiyrun-koxa halikakalutu tokantshi runkakletjetanruna tshinanu. Hiyrun-koxa ralpokoxinwana rupniywakapna. Riweklena hi ramotpotutna.

¹² Hiyáhoni hpoyikowpotutanu tenhohne hiyrunu tenhohne hwatshinhi. Seyni wamonuwatatshinepni tshiji hwatshine hiyrunu mar powha hwatshine, klu tshinanu kamtshi Satanás hix-yehi rujrukatka. Rahnanuwata tsru kamtshi klu tshinanu rimatlu hi hix-hohne waneylu.

Kamtshi Dragão Kojwajyawaklo Suxo Piranapni

¹³ Waneya rimathexinixka Tsru Kamtshi dragão tshij-hoho ruknojikowakatka hyinuwaka saletletlo suxo, jeji matkakatshro.

¹⁴ Seyni suxo hepi mejro, tsru paktsha meji pixkalutu tenekka tumukata palnalexyawakapa, talpokohnapuxikolu potshkewaka nwaka tyiywakapa. Wane tohluxiko mapa mhale hanikaji pejnu hohne, tma kojwajikowakanupa himnu tshinkaluru tshinanu.

¹⁵ Hiyáhoni himnu tshinkaluru suxo hatjini raplikhatlu honha, tsruhalu wenu pixka, tsruha hanijyawakamkaplo.

¹⁶ Seyni tshiji hepixatkalo suxo. Hiyáhoni tshiji haplaknamata hnikloklu tsruhalu himnu tshinkaluru haplikhatanru.

¹⁷ Waneya himnu tshinkaluru hahnanuwatatka suxo tshinanu. Hiyáhoni hya hkamnixyawakapna pimrine toklopichane, Hoyakalu tokanu towre hiyrunu halikakalutu pirana Jesus hiphujetleru pirana homkahitatshine.

¹⁸ Tsru Kamtshi dragão ksatu mar powha hwatshri hyopkaka.