Apocalipse 11 - Bíblia

Hoyakalupji Yahotaxikolu Piranapni

¹ Waneya yahotapije nenekka kanojertshi pixkalutu. Waneya wla htshinnona: — Ppalnanu. Pyahotanru hi psolu Hoyakalupji, kapajiru henekachalu yoxikkaluru hitajikowaka hi pso hiyrunu putakyahokanna yine himalwutatshine Hoyakalupji hwatshine hi pejnu.

² Seyni Hoyakalupji maleka sreta hwatshri kwa petachatanu, hi pyahotanru wale klu tshinanu wale honra judeu mixkane renekka. Hoyakalu poktshite hkapnikapahitanna quarenta e dois ksuru pejnu.

Hepi Hiphujtatatshine Hinatshripa Piranapni

³ Hepi nuphujtatjene mkatshri saco mapa kamhikolu makatatshine nyokanatanu. Waneya Hoyakalu tokanu runkakletanna mil duzentos e sessenta hohne pejnu.

⁴ Hepi hiphujtatatshine yapkakletlu hepi oliveira muna hiyrunu hepi nikotapi hwawakle, Hoyakalu ptowru tshijneka Tsru Hixikatshriwate hoji sreta, yopkakhohnekanatatshinni.

⁵ Satu yineru haluka saletlexinipna nyi hepi jiphujetaklerune, tshitshmero hichpaknamaxinna hkamnitjene hnikaxyawakapna. Hiyáhoni katukta haluka saletletmakna wla rixa hiylaletkonna.

⁶ Kpixkonna tenhohne ruchyaxyawakapna, hina hmixyawakanupa Hoyakalu tokanu runkakletjexyawakna pchinika. Hiyrun-koxa kpixkonna honha htowuxyawakna, hrahtshi rixnatkawa. Kpixkonna ptowru hixatshri salewakluyma tshiji rumtujyawakapna, hi pejnu katakta raluka wan-hixletna wan-rixna.

⁷ Waneya rali hinkaklewlexinipna hiphujetatshine hepi waneya kmatsyiru teno pnawaka hichpajikatshri kamnitanna, ralliretanunna, ruylatanunna.

⁸ Himanepnina poktshi hijhakaluru hapo yine yapjehijhakalur-potu hiknokachatkona, Wutsrukate Cristo cruz hitajikowaka poktshi. Xye poktshi Sodoma poktshi hiyrunu Egito tshijne pixkalutni.

⁹ Ptowru tshijne hajene, pa nerkaka, pa nrukaka yanumaxikatshine, ptowru hixatshri neru hetamanetanna map-hohne hanikaji. Hi ritshi kapnatko manetkana.

¹⁰ Hpoyikowpotutanna yine tshiji hajene nyini hipnatshinni tshinanni. Hmeyiwatanna henekachalkaka renekkakanna klu tshinanu nyi hepi Hoyakalu tokanu hinkakletatshine saletpotukanatna xye tshiji hajene.

¹¹ Waneya map-hohne hanikaji hiknohinixka hinnipha hiweklu heneklewatatshri Hoyakalu yokanreru jihlokmanetna. Hpalnana, hyopkakna. Hiyáhoni hpikpotutatkana wanna hetatshine.

¹² Waneya tsru tokantshi hjemna tenhohne hichpakhimaxikatshri, wla tshinatshri: — Hewi teno hapokanu. Hiyáhoni wanna hepi tenhohne hyatkana. Hohimkohi hoho hyapna hkamnitjene hetanuko.

¹³ Waneklukawa potuko tsru hiyoliklu tshiji rixa. Waneya satupka dez-te (1/10) tsru poktshi psojite yawnapjitana. Hiyoliklu tshiji tshinanu sete mil yinni hipnana. Pimrine hpikpotutanna. Hiyáhoni Hoyakalu tenhohne hajeru rimalwutna.

¹⁴ Hepi rixinri salewaktshi hiknohatka seyni hjemanu, salewaktshi mapa rixinri hi hohamokapa.

Sete Tixinri Kowi Hima Piranapni

¹⁵ Waneya hiwejikaluru Hoyakalu towreru tenhohne hajeru sete rixinri kowitatka. Waneya tsru himkaka hjemka tenhohneya wla tshinatshri: — Xye tshiji hajeru pohirtshikaka Wutsrukate Hoyakalunpatka hiyrunu hnurreru Cristo-npatkani. Hiyrunu wale pohirewahohnekanatanu hike rixiniko mnikawnakatupa.

¹⁶ Waneya tsrukakalune vinte e quatro, htuplawaklena pohirtshi tuplawakle tuplatatshine, Hoyakalu hoji sreta hwatshine, hyoptsojityehitluna Hoyakalu hiyrunu hihojna tshiji rutspakna. Hoyakalu rimalwutna.

¹⁷ Wla htshina himalwuretluna Hoyakalu: — Wimalwutyi Tsru Hixikatshriwa Hoyakalu ptowru potuko himukatatshriyi, mitshikananu hwatshriyi, xawakni hohne hwatshriyi, hike rixiniko mnikawnakatupyi. Wimalwutyi klu tshinanu pumukatle tsru potukoyma pyinuwaka pohirewleta.

¹⁸ Xye tshijne hajene malixkane hahnanuwpotuta. Klu tshinanu rapnokaxikolna hohne hapokatka. Hiyrunu hipnatshinni hetmayxaklexikolu papko hapokatka. Rapokpapkoluta ptowrene, ptokanu hinkakletatshine, pnurrene palixjene, phiwaka kahwakpiratatshine, yahmaklu mujhakonni yahmaklu hijhakalun-potu seyni rumlujikolna henekkalunepni. Rapokpapkoluta hnikaxyawakapna yine xye tshijne himtukjetatshine.

¹⁹ Waneya Hoyakalupji tenhohne hwatshri hitpukatka. Wane rexika Hoyakalupji hitokote hwatshri kapajiru Hoyakalu kojiretle pirana hwiywaka paji. Wanekananru rawrakle, tokantshi himkaka, rutlohle, tsru hiyoliklu tshiji, hiyrunu tsru potu sotluji teno hichpajikatshri.