Apocalipse 10 - Bíblia

Hoyakalu Towreru Tenhohne Hajeru Hiyrunu Yonawahlo Steno Piranapni

¹ Waneya satu hiwejikaluru Hoyakalu towreru tenhohne hajeru hixkolu neta. Tenhohne hserpijya. Hohimkohi pixka rixamkaluta. Kchitpo hijiw-hoho hwa. Hihoji tkatshi nikotle pixka rixa hiyrunu hiksuje tshitshmero stsihi pixka rixa.

² Yonawahlo steno mtserutu kopralatkaluru himyo ranijya. Hijixi hpotukle sreta mar powha hkatsrexya, pa sta sretate jixi tshiji hkatsrexya.

³ Waneya tsru plama hsaplewaxya leão hahlal-le pixka. Waneya rali saplewlexinixka sete rutlohle himkaka yanumatatka.

⁴ Waneya rali yanumletatka rutlohle tshinyawaka nyinuwaka yonretmaka seyni waneklu potuko tokantshi njema tenhohne hichpajikatshri, wla tshinatshri: — Pihnanutpotutanru tokantshi htshinyawakna sete rutlohle. Hi pyonatanru.

⁵ Waneya hiwejikaluru Hoyakalu towreru tenhohne hajeru netanru, mar powha hiyrunu tshij-hoho katsretatshri, tenhohne hyotukamyota himyo hpotukle sreta.

⁶ Waneya hkojiretna yine Hoyakalu hiwaka tshinanu. Hoyakalu honra hiwekatshri hikeklu hohne mnikawnakatupa, tenhohne, tshiji, mar powha hiyrunu ptowru potuko wane hajeru hiyakotatshrikni. Wla htshinatka Hoyakalu towreru tenhohne hajeru: — Hi hohamokaplu hnikawniywakapa hohi.

⁷ Hiwejikaluru Hoyakalu towreru tenhohne hajeru sete rixinri kowixinipa waneya Hoyakalu nikatanru rixahchinikanuxyawaka hkamhiywakapa, yohimakanatkaluru pirana, runkajyatkana htowrene, Hoyakalu tokanu hinkakletatshine mitshikawlune.

⁸ Waneya plamtshi niynumsakanatjeru, tenhohne hichpajikatshri hima, njematnaka. Wla htshinno: — Hajewa. Pyoptotapanru yonawahlo steno mtserutu kopralatkaluru hiwejikaluru Hoyakalu towreru tenhohne hajeru, mar powha hiyrunu tshij-hoho katsretatshri, myo hwatshri.

⁹ Waneya hiwejikaluru nwaka Hoyakalu towreru tenhohne hajeru nwaka nyatka. Waneya wla ntshinru: — Yonawahlo steno mtserutu penekanno. Waneya wla htshinno: — Pyoptotanru, pnikanru. Pinanwaka kapsaplu seyni pinama potshwaplu wrolha pixka.

¹⁰ Hiyáhoni nyoptotlu yonawahlo steno mtserutu hiwejikaluru Hoyakalu towreru tenhohne hajeru myoya waneya nniklu. Nonama potshwa rixa, wrolha pixka. Seyni nali nikloklexinixkalu yonawahlo steno mtserutu, kapsa nanwaka nixa.

¹¹ Waneya wla htshinatkanona: — Pujhalu punkaklexyawakatnaklu Hoyakalu tokanu hixolune tshijne hajene yehi, kakojenerurune yehi, kakojeru nrutshi yehi hiyrunu pohirtshine yehi.