Apocalipse 1 - Bíblia

¹ Twu steno raw-yonhata Jesus Cristo hixyawakapa pirana. Hoyakalu yokanatlu xye pirana ruphujexyawakapa rekhixyawakapna htowrene howukchini mapokatpatka pirana. Cristo yokanatlu htowreru hiwejikaluru tenhohne hajeru xyekaka pirana rimatkajyawakaplu htowreru, João tshinkaluru.

² João tshinkaluru hinkakletlu ptowruka retanru pirana hiyrunu hewi hyonaxikatka ptowruka runkakle pirana Hoyakalu hinkakle pirana, halikakalutu pirana Jesus Cristo hiphujetleru pirana.

³ Kihle hchinikanurunephi xye yonha hethatatshinepa. Kihle hchinikanurunephi xye hinkaklu pirana hinatshripa pirana hiphujetatshri jematshinepa, xye yonatkaluru pirana homkahitatshinepa, kihle hchinikanurunephi. Klu tshinanu hi howukchini xye ptowruka hix-yehi hakanhini.

Halikkaluru Sete Hapatjewaka Tshinanu Piranapni

⁴ Hita, João-no, nyonanwakatna Sete, Cristo halixatshine hapatjewaka, Ásia tshijne hajene. Kihle hchinikanurunephi hiyrunu kihle hwachalu henejikowakapa Hoyakaluya hwahohnekanatatshri, xawakni hohne hwatshrini, mitshikawni hiyrunu wale pnut-hohne hwatshrip-koxni. Hiyrunu Hoyakalu tuplaprestsi hwatshine sete hiwejikalune tshinanuya koxa.

⁵ Hiyrun-koxa Jesus Cristo tshinanuya xye pirana hiphujetatshripa potukalu. Mitshikananu hiwekatshrini wale ptowruneka hipnatshine tskalaya hiyrunu ptowru pohirtshine Tsru Hixikatshriwatni wale. Wuchinikjerni wale, hixa tshinanu cruz rupniyatka ruknokhektunuxyawakapwu hihraha hiyokle tshinanu.

⁶ Hiyrunu ruyakotwu sacerdote-ne neru wixyawaka Ruru, Royakalute kamrure wkamhiywakapa. Hiyáhoni Jesus Cristo renejikowaka ptowru hoyaknutshi hiyrunu ptowru towuwlu ptowru hohne mnikawnakatupa. Amém.

⁷ Hetanu. Hohimkohi hoho rapojinipa. Ptowrunek-yine potuko hetanru, haté ruylatjene yohlolewapiya hetanru. Ptowru tshijne hajene tshiyahatanu wale tshinanu. Halikakni. Amém.

⁸ Hitni mitshikananu hwatshrino hiyrun-koxa hmahle hwatshrino. Yinuwakatshrino hiyrunu hmahaxyawak-potuko hwatshrino htshina Tsru Hixikatshriwa Hoyakalu, ptowru himukatatshrino, xawakni hohne hwatshrino, mitshikawluru hwatshri hiyrunu xawakni hohne pnutpatka hwatshrino.

João Tshinkaluru Hetleru Hetkaluru Piranapni

⁹ Hita João-no, hix-molekoxno Cristo tshinanu hiyrunu Hoyakalu pohirewaxyawaka hajer-koxno. Hapakapno ptowru salewaktshi tshinanuya hiyrunu kahwakachaklerno Jesus Cristo tshinanuya. Waneya mar powha hanikajite hwatshijitatshri Patmos tshinikowaka nwakanatatka. Kachitkalurukananno klu tshinanu Hoyakalu tokanu nunkakletjekanata hiyrunu Jesus Cristo pirana hiphujetkaluru nunkakletjekanata.

¹⁰ Tsru Hixikatshriwa Cristo hohnerni, Hoyakalu Hiwejikaluru hepixamtno. Tsru plama njema. Notji sreta ruchpaktokanuxya. Kowi hima pixka htshina.

¹¹ Wla htshinamta, — Petanrukaka pyonpiranatanu papel-mtaya. Waneya pyokanatanro yonawahlo Cristo halixatshine hapatjexyawakkaka hajene nwaka, sete-ne. Éfeso poktshi nwaka, Esmirna poktshi nwaka, Pérgamo poktshi nwaka, Tiatira poktshi nwaka, Sardes poktshi nwaka, Filadélfia poktshi nwaka, Laodiceia poktshi nwaka.

¹² Waneya nuprotakatka nexyawakaplu niynumsatjeru katni, waneya netlu sete katalu hanikapine, ouro kamhikolu.

¹³ Waneya katalu hanikapine hanikajite nexyalu yineru pixkalutu mkatshri hopowalu makatatshri, hijix-potuko rapokamkata. Hista hostutka himkalu poyehitatshri ouro kamhikolu.

¹⁴ Hijiwutsa klatlu ovelha pixi pixka ho neve hlatnu pixka. Tshitshime mero pixka rixayhaleta.

¹⁵ Hijixi hatawna, yomuwa bronze hixirikalurutka hatajnu pixka, hatatjewa forno hwakanatatshri hatajixikolu. Htokanu tsru hokanu sejire pixka htshina.

¹⁶ Hpotukle sreta myo ranijyalu sete katahirine. Hinama ronoxya yohlolewapi hepi sretako hakoxikatshri. Hihoji tkatshi nikotle pixka rixa, hnikotpotuxini tkatshi.

¹⁷ Waneya nexinixkalu, hijixistsi nyawnamxya, hipnatshri pixka. Waneya hyosurukkanotatka hpotukle myo, waneya hit-hoho rutakamyota. Wla htshinno: — Hi ppikanu, Hitakni yinuwakatshrino, rapkatle hwatshri koxno.

¹⁸ Hiwekatshrino. Hipnatshrikananno. Seyni petanu, hiwekhohnekanatatshrino hike rixiniko mnikawnakatupni. Ntowutlu hamhikowak-yehi hiyrunu hipuktshi ntowuta.

¹⁹ Hiyáhoni pyonatanru ptowru potuko petanrukaka pirana. Pyonatanru xawakni hakanhatshri pirana petanru hiyrun-koxa hinatshripa pirana petanru.

²⁰ Sete katahirine petlene npotukle myo nanikamxinri hiyrunu sete katalu hanikapine, ouro kamhikolu pirana mpohijetanutukananu nuphujetanu. Sete katahirine, hiwejikalune Hoyakalu towrerune tenhohne hajene wannani Cristo halixatshine hapatjexikowakkaka hwatshinni. Sete katalune hanikapi, yapkakletlu sete hapatjewakkaka.