2 Tessalonicenses 2 - Bíblia

Jeji Tsru Hektunuru Hiphujewniywaka Piranapni

¹ Waneya wanjipotuthi Cristo tshinanu wmoletanune, Wutsrukate Jesus Cristo hapojinpatnaka pirana tshinanu hiyrunu waleyma wapatjexinpatka pirana tshinanu, wla hixanu.

² Ho satu hiwejikaluru tokanu hix-yehi hapojinipa ho satu hinkaklewlu ho satu yonawahlo hix-yehi hapojinipa, Cristo hapojinri hohne hapokatka tshinatshri hi himyekahchinikanutanu, hi hkojwakahchinikanutanu yáholu hixa yonre htshinko.

³ Hike yineru xako yokwijetanhi satkaka pirana tshinanu. Klu tshinanu hi rumukata hapoklehohneta Cristo hapojinri hohne Hoyakalu hiknokatshinetka hixolune yine makanhaknuklunuwa hiyrun-koxa jeji tsru hektunuru makanhaknuklunuwa, hamhikowaka hwatshri.

⁴ Hkamnitanru ptowru hixatshri hoyakalu tshinikatshriwa hiyrunu htserutpiranyehixinwa ptowru hixatshri hoyakalu tshinkalurutka ho himalwutkaluru phuta yohnik-hixahoxikatshriwa. Waneya Hoyakalupji potuko htowutanu, Hoyakalu htshininwa.

⁵ Hi he hichiniklu hix-yehi nwakanaxini mitshi xye pirana nunkakatkahi?

⁶ Xawakni hixa himatatka kluneru tsonu himaletlu tsru hektunuru papko hakanhiywakapa.

Jesus Nikatanru Tsru Hektunuru Piranapni

⁷ Klu tshinanu hektuntshi kamrure hwamka seyni hi phujetanuwaka rixa kamrurewleta. Seyni rimaletjeru, hpaklu himaletletlu haté hkochtshekoklunupa himaletatshri.

⁸ Waneyapa tsru hektunuru hiphujewnanu. Seyni Tsru Hixikatshriwa Jesus hinniphayma tsonu hiylatanru. Hiyrun-koxa Cristo himapokanru tsru ruyákole hatawnatshri potuko hnikaxinri tsru hektunurupni.

⁹ Tsru hektunuru tsru kamtshi Satanás tshinkaluru pixkonuymako rapokanu. Ptowru hixatshri pixkontshiyma hiyrunu hetkalurkakayma hyokwirewata himyekaklewatatshriyma.

¹⁰ Hamhatshine rakota yokwijretanu ptowru hektuntshi piranayma klu tshinanu hi ralukatkaluna halikakalutu pirana, halukkaluru potuko pirana, riwekkajikowakamkapna, malukkane.

¹¹ Hiyáhoni Hoyakalu wan-hixkakatkana hpupjepotuxyawakapna, weyawlu ralixyawakapna.

¹² Hiyahokni wan-hixatshine, halikakalutu pirana malixkane hiyrunu hektuntshi hamotatshine, rukolukanuwnatkana.

Nuretkalune Hiwekkajikowakapa Piranapni

¹³ Seyni wumukata poyahnutletanru Hoyakalu hixa tshinanu Tsru Hixikatshriwa Hoyakalu hamotanune Cristo tshinanu wmoletanune tshinanu. Klu tshinanu hyinuwaklekananuko Hoyakalu nuretatkahi hiwekkajikolupa, Hoyakalu Hiwejikaluru powraxyawakhi tshinanni hiyrunu halikakalutu pirana halixyawaka tshinanni.

¹⁴ Wale tshinanu wunkakle tshinanu, kihle piranalu potuko hiwekkaklewatatshri piranaya htshanixatkahi, hikchijyawakaplu Wutsrukate Jesus Cristo hoyaknu.

¹⁵ Hiyáhoni xawakni Cristo tshinanu nmoletanune, poyehi halixlephi, hi hicho homkahretanru wunkakle pirana, hasrujikolu ho tokantshi tshinanuya ho wyonawahle tshinanuya.

¹⁶ Hiyáhoni xawakni waleko Wutsrukate Jesus Cristo hiyrunu Hoyakalu, Wuru wuchinikjeru hiyrunu hapnanuhchinikanru hikeklu mnikawnakatupa heneklewatatshri hiyrun-koxa kihleru kahwakachalu renekachale tshinanu,

¹⁷ kihle hchinikanurunephi. Wan-hixatshinephi poyehi hchinikanurunephi ptowru kamrurtshi kihleru hiyrunu ptowru tokantshi kihleruya.