2 Pedro 3 - Bíblia

Jesus Hapojinripa Piranapni

¹ Nuchinikanune, xyekni hepi rixinri yonawahlo hixa nwaka nyokanrero. Nyi hepi yonawahlo tshinanu naluka komyekahchinikanrethi hihchinikanu kihleru, potukalu, xyekaka pirana hichinkapyawakapa.

² Tokantshi mitshikawluru, Hoyakalu tokanu hinkakletatshine, Hoyakalu nurrene tokanu hichinikanu hiyrun-koxa hixa Wutsrukate Jesus Wiwekkakjeru nurrenwu, tokanu hijretle hichinikanu.

³ Xye hapka himatanu, hnikawnahohnexini klu papko, runanna Hoyakalu tokanu heyikatshinepa wannako hichinikanu halukanru homkahitatshinepa.

⁴ Wla htshinanna heyikatshine: Ha Cristo hapojinri hohnepa runkakletleru, hi hetko rapokanu. Klu tshinanu wutsrukatenni hipninri hohneni haté xawakni hi psojikna yokmanatka. Ptowru potuko rixannukni xye tshiji hiyakoxikolu klu haté xawakni.

⁵ Seyni hi rujha himatletluna mitshikawa Hoyakalu hiyakoleru tenhohne hiyrunu tshiji htokanu tsonu tshinanu. Psoji tshiji hitokha rutaka hiyrun-koxa psoji tshiji honha malekate rutaka, htokanu tshinanu tsonu.

⁶ Xye tshiji mitshikawako hiyakotkaluru nikawnatka honha hichyatapyawaklu tshinanu.

⁷ Seyni xawakni tshiji, tenhohne, xye papko hwatshriwa, himretkalurni wale himako tokantshi himukatle tshinanutnaka hnikatko tshiji tshitshmeroyma. Ruslahka tshiji haté rapokhohnexinipa, Hoyakalu malukkane, hapnokaxikolu hohnepa hnikatkonna yinepni.

⁸ Nuchinikanune, hi mimatkane pixka hixanu. Seyni himatanu Tsru Hixikatshriwa Hoyakaluya satu hohne hatatjewa mil mhale pejnu rixahotlu hiyrun-koxa mil mhale pejnu pa hohnepka rikahwaklu Hoyakalu.

⁹ Satkaka yineru kahwaklu Tsru Hixikatshriwa Hoyakalu hi haluka kamhaletatkalu htshinyawaka pixka. Seyni hike. Kchinikanurni wale. Klu tshinanu hi raluklu ramhiywakamkapa yineru hi satuknako, seyni walemka haluklu ptowru yineru rehchinikanuxyawakapa.

¹⁰ Klu tshinanu Tsru Hixikatshriwa Cristo hininri hohnepa hapokanu, katshowhuru hapokle pixka rixa hapokletanu. Waneklu papkopa tenhohne herutkotka tsru sejirtshiymapa. Xye hohne hikamrurewleru hiprahkanu tsru hameru tshinanu. Xye tshiji hiyrun-koxa ptowru kamhakaluru, xye tshiji hwatshri, nikawnanu.

¹¹ Xye ptowruka, tshiji hwatshri, tenhohne hwatshri koxa nikawnanu hiyáhoni hi he rekhithi hanu hixahchinikanutatshinpatkahi chinikantshi potukawaka pirana tshinanu hiyrunu Hoyakalu homkahlu pirana tshinanu?

¹² Hoyakalu hohnepa kahwakkalunephi hiyrunu wale hohne hapokatshripa halukpotutatshinephi. Wale hohnepa tenhohne halhanu, ramhanu. Xye hohne hikamrurewleru hiprahkanu tsru hameru tshinanu.

¹³ Seyni hix-yinwu, Hoyakalu tshinyawakatka tshinanu, tenhohne herotexikolu hiyrunu tshiji herotexikolu wkahwakanu. Wane rawanu potuknutshi tsonu.

Cristo Hapojinri Kahwakatshinepwu Piranapni

¹⁴ Hiyáhoni nuchinikanune, xyekaka hapokatshripa kahwakatshine tshinanu jmererunephi. Kihlehchinikanurunephi Cristo-ya, hi psojikna hektuntshiyma hikchikko, hike mixkanephi.

¹⁵ Hichinikanru Wutsrukate Cristo kahwakachale renekpapkotna yine riwejyawakapna tshinanu. Wane potuko htshinatka wuchinikanru Paulo tshinkaluru, Cristo tshinanu wmoletanru. Wale wane htshinatkahi yonawahloya rimatkale Hoyakalu henejyalu tshinanu.

¹⁶ Xye pirana hkochtshekjeta Paulo ptowruka hyonawahleya. Pa pirankaka kyapreru rimatjemikowaka. Masrukkone hiyrun-koxa mpoyehi halixlene pupje hasruklewlexyalu xyekaka pirana. Waneko pixka rixluna pimrikaka Hoyakalu tokanu yonatkaluru, hiyáhoni wannako hamhakajnawa.

¹⁷ Nuchinikanune, xyekaka pirana himata hiyáhoni hislahinwa hix-koxa, hma mkosejikowakanupa halixle poyehiru hichoxyawakapa, majnakowatatshine pupjere hapo hma momkahixyawakanupa.

¹⁸ Seyni halikaka Wutsrukate Jesus Cristo, Wiwekkakjeru hepixle hiyrunu Cristo himathetle tseruwnikatshinephi. Wale pohitko xawakni hohne hiyrun-koxa hike rixiniko mnikawnakatupa hohne koxa hpohitko.