2 Pedro 2 - Bíblia

Hixacha Hasruklewletatshine Piranapni

¹ Seyni waneklu papko rawakanatna hixacha hasruklewletatshine yine tskala. Hixa tskala koxa rawanutnakna hixacha hasruklewletatshine. Yohimawaka himtuklewatatshri pirana rasruklewaxinna hixa tskalaya. Haté Tsru Hixikatshriwa Jesus, Hiwekkaklewatatshri mixkatu htshinanruna, Jesus hanjirenemkatkani seyni wane htshinanwakatluna. Hiyáhoni chinpotukawa rapnokatkona wannako htshinanna.

² Hixolune yine wannako rixannuna himtuklewatatshri romkahjethonukna. Hiyáhoni wanna tshinanu Hoyakalu pirana halikakalutu hapatka.

³ Tokantshi yokwirewatatshriyma rujhaluna pa hixanu hkayaxyawakapna hixa tshinanuya, wanna tsonu hichinijnawakwa tshinanu. Hoyakalu mitshikawako ralpokotatkalu rapnokaxikolupna seyni xawakni rapnokaxikolna hi howukatka. Hiyrunu ramhiywakapna hi malpokotkatutkani.

⁴ Hoyakalu hi hetachatna majnakowatatshine htowrerune hiwejikalune tenhohne hajenekananu seyni tshitshmero ruknokna. Yomuwatsa hostutkalunni, mapchahawak-yehi rimrexikna rapnokaxikolna hohnepa tshinanu.

⁵ Hiyrun-koxa Hoyakalu hi hohnetlu mitshikawluru tshiji seyni hahyekachalu hyokanahohotanna yinni, Hoyakalu malukanni. Halikaka Noé tshinkaluru, oito rixinri, potukawaka pirana jinkakletakleru, riwekkaka Hoyakaluya.

⁶ Wane koxa rixlu Sodoma tshinikowaka poktshi hiyrunu Gomorra tshinikowaka poktshi. Hnikatlu, tshitshi pahi rixkaklu. Poktshine rapnokata rimathexikowakapa klu rixkona yine wkatanu hiwekatshinepa hektutu kamhatshinepa.

⁷ Seyni Ló tshinkaluru, potuka hchinikanuru, riwekkaka Hoyakalu. Ló honukla kojwakahchinikanjekanata yine mpotukane, hektutu hkamhalerna tshinanu.

⁸ Klu tshinanu xye jeji potuka hchinikanuru retlu hiyrunu hjemlu rawatskalatanune kamrure hkamhajekanatanruna hinanchitkaluru. Hiyáhoni ptowru hohneruka Ló hiwejinri potukalu kojwakka.

⁹ Hoyakalu honra himat-hiknohkakna yine potukalune yahtaletlewlu yehiya hiyrun-koxa rimat-himretna yine mpotukane rapnokaxikolu hohnepa tshinanu rapnokaxikolupna yine.

¹⁰ Wanna mantshi halukanru homkahpotutatshine, hektutu halujikolu halukatshine, towuwlu heyikatshine potu rapnokatkonna. Tserutahchinikanuxikatshinwa wanna. Wannako hchinikanu tsonu haluka kamhaletatshinni. Hiyrun-koxa hi hpika hektuwaka tshinanwakletna pohirtshine.

¹¹ Seyni hiwejikalune Hoyakalu towrene tenhohne hajene, nyi yohnik-himukatatshinni hiyrunu nyi yohnik-pixkonurunni wanna. Wanepnawaka hi tsru jihyehre hkamhayehitna nyi yine Hoyakalu hoji sretaya.

¹² Nyi kmatsyirune pixkalune, mahchinikanune. Nyi pixkalune rixikowakapnina hkachitkona ruylaxikowakapna wanepnawaka rapatluna hmimatjemanutna pirana. Nyi nikaxikolupa psoluko rumtuknuymana.

¹³ Hkaylerupna hma potuknuna wenru. Rukchikhihlenrerna tsonu hkamhahohnekanatna phujewakay-potuko. Pitshotlewatatshinni, hektunni wanna. Wan-hixatshine phutako poyikowjejeta kyokwijeklerune rixyawakna tshinanu. Hixayma hnikjetna.

¹⁴ Himopatlewlu romkahitna hiyhaleymana ptowru papkoko. Hi rumukata hicholetluna hektuntshi. Mpoyehi hchinikanune rutsekna. Wanna tsonu repixikolna ruchinikanretna. Hektuntshi whenenni.

¹⁵ Ruknokluna hatnu hapo potukalu. Pupjetatshinni wanna. Mitshikawlurni Balaão-ni, Beor-ni tshinkalurni whenni hchinikanu romkahitna tiyiro raluka yoptoletna hektutu hkamrurna wenru.

¹⁶ Waneklu papko mitshi Hoyakalu htshihetjetni Balaão-ni hmajnákonu tshinanu. Satu jumento myanumatkatu hiynumatniru, hinamtatshri pirana hinkakletatshri Balaão-ni. Yineru tokanu potuko hyanumaxya jumento. Hiyáhoni jumento himaletmaklu hinamtatshri pirana hinkakletatshri hipukalnu.

¹⁷ Nyi yine hakopha popriru pixkalunni hiyrun-koxa hohimkohi tsru kanniphalu haniklene pixkalunni. Hamhikowaka mapchahawaka hwatshinepni hike rixiniko mnikawnakatupni.

¹⁸ Klu tshinanu tokantshi halukkaluru phuta hyanumjexinrina ralixkotjetna pirana, mantshi haluklerukaka chinikantshi mimaletkotu hkosetna hajeyri hektuntshi yehi hasukpiraxikatshinewa.

¹⁹ Runkakletmakluna ruchoxikowakatka yineru pirana seyni wanna potuko hektutu, himtuklewatatshri towrerunni wanna. Klu tshinanu kluneruktako towutlu yineru, wale tshinanu towrertshi koxni wale.

²⁰ Klu tshinanu xye tshijne hchinikanu himtuklewatatshri rali hasuklexyatkana, Hiwekkaklewatatshri Wutsrukate Jesus Cristo himathetle tshinanuya. Waneya wane pnute hsatojyawakapna, hkachixikowakpatnakna hnikawnalepa reyinuwakle yohnik-hektunuplu.

²¹ Potukalu tokantshi runkajikolna rimatjemlerna pirana hiknokatshine, kihlemkana wan-hixatshine himka rimatachatanruna potukawaka hapo pirana.

²² Seyni wan-rixkana yapkaklu halikakalutu tshinyawaka pixka. Wla htshina: “Kawe satokanwakatlu waleko raplire.” “Porco koxa katkaluru satokanwakatlu posujpalu rupruruxyawakaplu.”