2 Pedro 1 - Bíblia

Hali Hichiniklune

¹ Hita Pedro Simão tshinkalurno, Hoyakalu towrerno. Jesus Cristo nurrerno hita. Hixa pixkalun-koxhi hixa. Halixlu hike pixka mixkatu yoptotatshinhi Hoyakalu potuknu tshinanu hiyrunu wiwekkakjeru Jesus Cristo tshinanu. Hixa tshinanni xye yonawahlo.

² Nanjitlu Hoyakalu hepixle hiyrun-koxa hapnanuhchinikanru htseruxyawakapa hix-yehi hwatshri, himatkaltshi Hoyakalu pirana tshinanuya hiyrun-koxa himatkaltshi Wutsrukate Jesus pirana tshinanuya.

Himukatlu Hoyakalu Henejyana Cristo Halixatshine Piranapni

³ Ptowru potuko halukkaluru hiweklu tshinanupa, wpotukatjerupa tshinanu wenekka, Hoyakalu hoyaknu himukatatshri tshinanuya. Tshanixkalunwu royaknu hwahohoxyawakapwu hiyrunu potukalune wixyawaka, Cristo himaxikolu tshinanu.

⁴ Xye tshinanu, Hoyakalu hinkakletlerkaka himukatatshri potuko, halukkaluru potu, wunkakka. Wan-hixatshinwu, Hoyakalu hchinikanuymalunwu. Xye tshijne halukleru sreta hichpajikatshinetkawu hiyáhoni xye tshijne himtukkakatshri wasujyatka.

⁵ Waneya wane pnutepa. Halukpotutanru kamrurtshi kihleru, halixlu hepixatshripa. Waneya kamrurtshi kihleru haptowrutanru himatkaltshi.

⁶ Waneya himatkaltshi haptowrutanru hislahmanexikolu. Waneya hislahmanexikolu haptowrutanru hkahwakachale. Waneya hkahwakachale haptowrutanru Hoyakalu homkahlu potuko.

⁷ Hoyakalu potuko homkahle haptowrutanru Cristo tshinanu moletkakatshine hichinijikolu. Cristo tshinanu moletkakatshine hichinijikolu haptowrutanru hamotlewlu.

⁸ Klu tshinanu xyekaka hwini hixa hiyrunu hix-yehi hmixkowaxini xyekaka, hi mkochpakkanephi Wutsrukate Jesus Cristo himaxikowaka tshinanu hiyrunu hi hmahijerutanu wale himaxikowaka tshinanu, xyekaka hmixkotjerupa tshinanu.

⁹ Seyni xyekaka mwikatu mayhaletni wale. Wi potuko tsonu hetatshrini wale. Hiyáhoni hi ruchinikanretlu rektunu mitshikawluru hpowraxikolutka.

¹⁰ Nomolene Cristo tshinanu, hiyahokni jmererunpotuphi hpoyehixyawakaplu htshanixikolu hiyrunu hnurexikolu. Klu tshinanu wan-hixini hi hihrokanu, hikepni.

¹¹ Wan-hixatshinephi hepixko halikak-potuko hjihlojyawakaplu Wiwekkakjeru Wutsrukate Jesus Cristo pohirewaxyawaka hike rixiniko mnikawnakatupni.

Pedro Yonanwakaxyawakna Yine Klu Hikolukle Piranapni

¹² Wale tshinanu hi nutuk-hichinikapkakletanhi xyekaka pirana. Wane nixjeta yáholu himatlu xyekaka pirana hiyrunu tokantshi halikakalutu hapokatshritka hpoyehixika. Seyni nuchinikapkakhi.

¹³ Halikaka xye nomane nwaka pchinika, nukchikhihlenutlu nuchinkapkajyawakhi xyekaka pirana jmereyalunephi.

¹⁴ Klu tshinanu nimatlu xekoyaka xye nomane nuchotanu. Wutsrukate Jesus Cristo tshinakanaxyawakno pixka, nixko.

¹⁵ Hiyáhoni xawakni wane pnute, nupninipa wane pnutepa, naluklu xyekaka pirana hichinijikowakapa ptowru hohneruka. Wale nujhapotutanu.

Tsru Himukatatshri Potukni Hoyakalu Tokanu

¹⁶ Wutsrukate Jesus Cristo pixkonu pirana hiyrunu rapojinri pirana wunkajinixkahi mitshi, hi tsrunni pirana, yineko hchinikanu pirana, chinikantshi heneklewatatshri pirana phuta wtshinatkahi mitshi. Klu tshinanu hix-honra rumukatle ptowru potuko himukatatshri hetatshinpotukwu.

¹⁷ Klu tshinanu Ruru Hoyakalu himalwutlu Jesus hiyrunu royaknu reneklu mitshi, tokantshi Hoyakalu yehi hichpajikatshri, Jesus yehi hapokatshri mitshi, wla tshinatshri: Xyekni noturu nalukanru potuko. Wale poyikowkakno.

¹⁸ Xye tokantshi tenhohne hichpajikatshri wjema, himriji nuretkaluru wwakanaxini mitshi Jesus-yma.

¹⁹ Xye wunkakle hiphujetkaluru hapokatshripa potu. Hiyáhoni halukalur-potni kajnakolune hixyawakapa. Katalu mapchahawaka nikotatshri pixkalutni wunkakle wuphujetjereru hoyetshnoko pchini. Hohi sahi pixkalutu nikothajithi haté rumrerejinpotuko.

²⁰ Halikaka himatanru xye. Tokantshi hiphujetkaluruya Hoyakalu tokanu yonatkaluru hwatshri, hi satukna tokantshi hiphujetkaluru satu yineru hchinikanu hichpajikatshrini.

²¹ Klu tshinanu tokantshi hiphujetkaluru mitshikawluru, hi yineru halujyawaka tshinanni. Seyni halikaka jejine, Hoyakalu nurrene hinkakletlu Hoyakalu Hiwejikaluru hinkajyatkana tokanu.