2 Coríntios 9 - Bíblia

Paulo-ne Hanijyawaklu Henekachlukaka Judeia Hajene Tshinanu Piranapni

¹ Hoyakalu kotspalatanune Judeia tshijne hajene hepixikolu piran-halikaka xawakni hike pirana mahata nyonyehixyawakhi.

² Klu tshinanu nimatlu jmerhi wanna hepixyawaka. Ntserutpiranathi Macedônia tshijne hajene tshinanuya. Nunkakletlu hixa halixatshine Acaia tshijne hajenhi pirana kapeta mhalni kananuko rujhaluna repixlewaxyawakna ntshina mitshi. Hiyáhoni hixo yineru jmere kamhaletka hixa hmernu pirana hjeminixkana.

³ Hiyáhoni nyokanatna Cristo tshinanu wmoletanune wma muhlepiranyehichaxyawakanuphi kihlewaka henekachlu hapatjexikolu pirana tshinanu. Wane mitshi ntshinapna hixa halpokoxyawaklu hepixlewaxyawakapa.

⁴ Klu tshinanu Macedônia hajene himotsaxinipno waneya rukchikanunhina malpokotkanepnihi waneya wpatewatanu. Hix-potu patewatanu klu tshinanu wmahijeru munanhaletatkahi.

⁵ Hiyáhoni wale tshinanu hijhakalurni Cristo tshinanu wmoletanune nyokanhapkaxyawaka hixa nwaka hyiywakapna. Ralpokokjixyawakapluna henekachale hinkakletleru mitshi. Hiyáhoni wane napojinpatka ralpokotkotka henekachalu waneya ptowru yineru himatanru henekachalewle hi htowuxikowakni hixako hmernu tshinanni.

⁶ Xyekni naluka tshinreta, psotsonu hitaklu hitakatshri psotsonu rama seyni tsru hitaklu hitakatshri tsru potuko rama.

⁷ Satkaka yineru hihchinikanuyma potuko renekachalewatanu. Hi mpomaluklenurutuko hi koxa htowutko henekachluya. Klu tshinanu Hoyakalu hikchikhihlenutlu popoyikoner-potuko heneklewaxiklu.

⁸ Hiyrun-koxa hmahakanaxinrikaka pnut-potu rumukata heneklethi Hoyakalu hike hma mujhiywakanpatka haté hixetatshri himukata hwalexya klu kamrurtshi kihleruktako tshinanu.

⁹ Wane htshina Hoyakalu tokanu yonatkaluru: “Tsru potuko hmahaxinrina renekachatna Hoyakalu hike mwikane. Hiyrun-koxa ruhlenu hikeklu hohne nikawnanu.”

¹⁰ Hiyrun-koxa Hoyakalukni hitataji heneklewatatshri rutajikowakapa. Hiyrun-koxa pão nikkalurupa heneklewatatshrini. Waneko pixka rixanhi hix-koxa ptowru hitataji halukkaluru pixkalutu renekanhi. Htseruwnakakanru tsrupotpákolu honantshi, hixa henekachale tseruwnaleko pixka.

¹¹ Ptowru potuko hepixiko, jeneklewaklerune hixyawakapa. Hiyáhoni hixolune himalwutanru Hoyakalu henekachle waniklerupa tshinanu.

¹² Klu tshinanu xye hkamhaleru hi Hoyakalu kotspalatanune hike mwikane repixyawaka tshinanu tsonni seyni wan-rixkakhi Hoyakalu hpoyahnuxyawakapluna wanna koxa.

¹³ Wanna himalwutanru Hoyakalu hixa hepixle tshinanu hiyrun-koxa henekachle tshinanu kajnako hixle tshinan-koxa hiyrunu Cristo pirana kihle piranalu potuko hiwekkaklewatatshri pirana homkahixyawaka tshinan-koxa. Hiyrun-koxa rimalwuhetkotanruna Hoyakalu hixa henekachlepa tsrur-potuko tshinanu wannako htshinan-koxna hiyrun-koxa pimrine ptowruneka tshinanupa.

¹⁴ Hiyrun-koxa ranjihohneyehihetkotanhina tsru hichinijikoluyma Hoyakalu henekahchinikanuxya tshinanhi.

¹⁵ Hoyakalu wpoyahnutanu renekachale tsrur-potuko hike pixka mixkatu tshinanu.