2 Coríntios 8 - Bíblia

Henekachalewatanu Ptowru Poyikowluyma Piranapni

¹ Hiyáhoni wmoletanune Cristo tshinanu, wimatkakpirathi Hoyakalu hihlenu henekachalewle pirana, Cristo halixatshine hapatjetatshin-yehkaka Macedônia tshijne poktshikak-hajene tshinanu.

² Halixatshine wane hajene tsru salewaktshikaka riknohna. Seyni hpoyikonu tshinanna hike mwikanmakni seyni henekachalu renekachalewatna ptowru rumukata hikchiklelerna.

³ Nunkakhi rumukata hikchiklelerna haté rumukaxyawakna pnute renekachalewatna wannako hihchinikanuymana.

⁴ Ranjipotutwuna renekachalna wyoptoxyawaka rumukata hepixlewlexyawakapsona Hoyakalu kotspalatanune Judeia hajene tshinan-koxa.

⁵ Wpoyahohoxyawaka pnute rixna Macedônia tshijne hajene halixatshine. Mitshikananhapka Tsru Hixikatshriwa Hoyakalu renejnawana waneya wane pnute Hoyakalu halujyawaka hkamhapiraxyawaka tshinanna hix-koxa Paulo-nwu renejnawana.

⁶ Hiyáhoni wanjitlu Tito tshinkaluru xye kamrurtshi yinuwakatshri wane hyiywakapa repixyawakaphi hix-koxa xye kihle piranaluya hpoyahokajyawakaplu.

⁷ Hekhixnawa ptowru pirana potuyako hixa kosejyana pimrine, halixlu piranaya, hinkaklewlu piranaya, himatkalnuya, pimrine haluk-hepixlexyawaka pirana, hixa hichinijyawaka piran-koxa. Henekachalu heneklewlu piran-koxa hijhalu hkosejyawaka.

⁸ Hi nujhalu nyokanrewaxyawaka seyni naluk-himatkaklethi pimrine hmernu pirana xye henekachlu hapatjexikolu tshinanu. Hiyáhoni himathexinwa ho halikaklahe pimrine hichinika ho hike.

⁹ Klu tshinanu hixa himatpiranatlu Wutsrukate Jesus Cristo hihlenu henekachalewle pirana. Phurukananni Cristo seyni hixa tshinanu hike mwikatutkani, hike hmimwalnutka pohirewkakatkahi hixa.

¹⁰ Xyekni nohchinikanu xye pirana tshinanu: Hitaho kihle potlu hpoyahokajyawaklu kapeta mhalni hyinuwaka kamhalleru. Hi koxa hyinuwaka kamhalechatlu seyni haluka koxlu.

¹¹ Hiyáhoni xawakni wale kamrurtshi hpaklutanru haté hnikatanru. Jmererunephi xawakni mitshikananu pixka. Hiyáhoni hpoyaho hikchiklexyawaka pso heneklewatanu.

¹² Klu tshinanu henekachalu raluk-heneklewlexini yineru, Hoyakalu yoptotlu renekachale rumukata hikchikleleru tshinanu. Hoyakalu hi haluklu yineru hma mimwanutuko renekachlewaxyawaka.

¹³ Hi pimrin-potu hihlewaxyawaka tshinanupni waneya hixapni mahaxinnatka. Seyni pixkakakane hixinripni.

¹⁴ Xawaknikawa hixetleru himukata hepixlexinna wanna hmahaxinriyna. Hiyáhoni hixa hmahaxinri pa hohne wanna himukata hepixlexinhi wanna rixetlerna tshinanu. Hiyáhoni pixkakakanephi.

¹⁵ Wane htshina Hoyakalu tokanu yonatkaluru: “Hix-potuko nikkaluru hapatjetatshrimka, hi rixexya. Hiyrun-koxa psotsonu hapatjetatshri hike hmahaxya.”

Tito Tshinkaluru Hiyrun-koxa Rimotsane Piranapni

¹⁶ Nimalwutlu Hoyakalu klu tshinanu Tito tshinkaluru renekahchinikanuta hixa Corinto hajenhi repixyawakapa. Hixa Paulo-nwu pixka rixa hichiniklethi.

¹⁷ Klu tshinanu halikakni Tito yijnakotlu wtshinyalu. Seyni jmerpotuklu Tito hixa repixyawaka hiyáhoni waleko hihchinikanu tshinanu hixa nwaka hyahapkatatka.

¹⁸ Waleyma wyokanatlu satu wimole, ptowruneko Cristo halixatshine hapatjetatshin-yehkaka kihle piranyehiyalu, Jesus Cristo pirana kihle piranalu potuko hiwekkaklewatatshri pirana tshinanu.

¹⁹ Hi wale tshinanu tsonu Tito rimotsatanu seyni Cristo halixatshine hapatjetatshin-yehkaka hnurexika hixayma rixyawakapa xye kamrurtshi halukkaluru hkamhiywaka tshinanupa. Tsru Hixikatshriwa Hoyakalu himalwuxikowaka tshinanu. Wekhixnawa wepixlewpiraxyawaka.

²⁰ Hiyáhoni wane wixa hike yineru mjihyehixyawakanupwu henekachalu wapatjemxyawakapa.

²¹ Klu tshinanu waluka kamhaletlu kihleru hi Wutsrukate Hoyakalu hetanu tsonu seyni ptowru yine hetan-koxa.

²² Wannayma wyokanatanru Cristo tshinanu wmoletanru. Hixo kata wetlu jmere kamrurewle rixyawaka. Waneya xawakni pnut-potu jmeretkalu klu tshinan-hima hixa hmunanha.

²³ Tito tshinkaluru pirana haluk-himatlexini waleni wikamrurewatanru repixyawakaphi. Hiyrun-koxa pimrine rimotsane pirana haluk-himatlexini wannani Cristo halixatshine hapatjetatshin-yehkaka yokanatanunni Cristo himalwuxikolu tshinanu.

²⁴ Hiyáhoni pimrine Cristo halixatshine hapatjetatshin-yehkaka himatpiranyehixiniphi hekhitanna nyi Cristo tshinanu moltshine hichinijyawaka hiyrunu hi wmahijerutanu kihle piranyehirune pirana wunkaklexini.