2 Coríntios 7 - Bíblia

¹ Nuchinikanune nimatletlene, xye ptowruka Hoyakalu hinkaklexyapiranwu hixanni. Hiyáhoni xawakni hpowraxinwa ptowru hixatshri wimane pitshotatshriya hiyrun-koxa wsamenru. Potukalun-potu wixinwa ptowru hohneruka Hoyakalu kahwakpiraxikol-tshinanu.

Paulo Hichinijyawakna Corinto Poktshi Hajene Piranapni

² Hikchikahwawakletanwu hihchinikanuya wwiywakapa. Hi satukna hixa wyotneta. Hi satukna hixa wumtuka. Hike yineru wkonapahixanutechata.

³ Hi wane ntshina, njihyehixyawakaphi. Klu tshinanu wane mitshi ntshinatkahi hixakni wuchinikpotutanunhi hiyáhoni hike kotspalkakanwu ho wupnini ho wiwejini.

⁴ Hixa nmunanhapotuta hiyrun-koxa ntserutahchinikanuxnawa hixa pirana tshinanu. Napnanuhchinikanuta hiyrun-koxa numuwpotuthonuka ptowruka wsaletjeru tshinanuya.

⁵ Macedônia tshijne wapokkawaka hi wapnanuta. Ptowru sretako wexyalu kojwaklu, yahotkaklu hiyrun-koxa wpikle weta hitok-hajiya.

⁶ Seyni Hoyakalu honukla kojwakahchinikanutatshri hepixatshri, Tito tshinkaluru hapokle tshinanu htserutahchinikanutatkawu.

⁷ Hi Tito hapokle tshinanu tsonni seynikta hixa Tito hpoyikotahchinikanuxyawaka pirana tshinan-koxni. Runkakno hixa pirana. Hix-hima hichinikno. Hix-hima wamonuwata hita nopirana tshinanu haté hit-hima himatshwahpirata. Hiyáhoni xye pirana tshinanu xawakni pnut-potu numuwata.

⁸ Hi nehchinikanuta yonawahlo hixa nwaka nyokanreru tshinanu. Netkamkalo yonawahlo nyokanatanro pchini hohnejiji twamontakamkahi nehchinikanutanmaka.

⁹ Seyni xawakni npoyikowata yonawahlo nyokanatanro tshinanu hi twamontakhi seyni halikaka hwamonnu hehchinikankakatkahi. Hoyakalu hixkajyawaklu hwamonnu tshinanu hehchinikanutatka hiyáhoni hi psojikna wumtukatkahi.

¹⁰ Klu tshinanu wamonuwnalu Hoyakalu henejyahi hehchinikankaklewata riwekkakko pupjekanatatshri. Wale tshinanu hi wwamonuwnanu hixa. Seyni wamonuwnalu xye tshijne heneklewle hipuktshi reneklewata.

¹¹ Haha hetanu hanu rixhi Hoyakalu hwamonuwnal-tshinanu: mchikohchinikanune rixkakhi, hiyáhoni hijhahapkatatkalu hekhixyawaklu hi ntshinyawaka mitshi pixka hixatshinhi. Hi psokananru hamlehonutshi, hi psokananru hetwamonuxyano, hi psokananru hixa hichiniklewle. Hekhixnawa hapnokathapkaxyawaklu hektutu. Ptowru potuko hekhixnawa potukalunetkahi hixyawaka xye piranaya.

¹² Hiyáhoni xawakni yonawahlo nyonanwakathi seyni hi nyonatlo hektutu kamhatshri tshinanni, hi koxa rumtuklerutka tshinanu nyonatlo. Halikaka nyonatlo Hoyakalu hekhipotuxyawakaphi hi psokananru hichinijyawu.

¹³ Hiyáhoni xye pirana tshinanu wpoyikowata. Hi xye tshinanu tsonni seyni wumuwata Tito tshinkaluru poyikowle tshinanu. Klu tshinanu wjempiranyehithi hanu hixa poyikowkakletatkalu Tito hiyrun-koxa hixa hapnanuhchinikankaklexyawaklu pirana.

¹⁴ Tito nunkakatka hixa pirana kihlewaka ntshinanwakathi. Hiyrun-koxa hi npatewata kihlewaka pirana ntshinanwakaxyawakhi. Ptowru hohneruka halikaka pirana wunkakhi. Hiyáhoni hixa pirana kihleru wunkaklu Tito halikaka piranni.

¹⁵ Pnut-potu ruchinikhi ruchinijinri kajnakolunhi hixyawaka pirana hiyrun-koxa tsru pikluyma hima hyoptotatkalu kahwakpirruyma koxa.

¹⁶ Hiyáhoni npoyikowata klu tshinanu psol-potuko nmunanhiyhi.