2 Coríntios 6 - Bíblia

¹ Hiyáhoni hixa rikamrurewatanunwu hanjithi Hoyakalu kamrureya: Hi himnanhinri Hoyakalu hihlenu wale honukla renekatkahi Hoyakalu.

² “Hyijnakotanru Hoyakalu tshinyawaka: Hijhiniklunru hohneno nyijnakothi, Nepixatkahi hiwekkajikolu hohne tshinanuya.” Hyijnakotanu. Xawakni halikaka hipapkolutkani hyoptoxikowaka Hoyakalu hepixle. Xawakni potuko hihohnerutkani hiwekkajikowaka hixa.

³ Hi waluklu satu yineru het-himtuknuxyawaklu wkamrure hma mukolukanuwniywakanupa wkamrure tshinanu.

⁴ Seyni ptowru piranako wekhithi Hoyakalu kamrurewyehitatshinwu wixyawaka. Hi wkaheknanuwata wsalewnini, wmahaxinri tshinanuya hiyrun-koxa wkojwawninri tshinanuya.

⁵ Wuylakjetka, kapna wyochmakjetka, sejirtshiyma wsaletjetka. Wkamrurewpotjeta, mamkanwu, wnatshita.

⁶ Wuphujetlu Hoyakalu kamrurewyehitatshinwu wixyawaka. Wpotuknu tshinanuya, wimatkalnu tshinanuya, wsalewaklu wakotle tshinanu hiyrun-koxa wuhlenuhchinikanu tshinanu. Hoyakalu Hiwejikaluru hoho wyapa hiyrun-koxa hichiniklewlu halikakalutu potuko tshinanu wane wixa.

⁷ Hinkaklu halikaka tokantshirutu, Hoyakalu pixkonuya, winotjerni potuknutshi hchinikanu wkamnitjene ptowru sretako hichpajikatshine tshinanu, wpotukle sreta, pa sta sreta koxa.

⁸ Kihle piranyehirunwu hiyrun-koxa hektu pirana yehirunwu. Kihle piranalu wtshinanwakatka, weyikka koxa. Halikaka pirana hinkakletatshinwu seyni kayloklerune wkahwakka.

⁹ Mimatletkone pixkalunwu hiyrun-koxa himatletkalune pixkalun-potwu. Hipnatshine pixkalunwu seyni hetwu hiwekatshinewawu haté xawakni. Hapnokatkalunwu seyni hi wuylatka.

¹⁰ Wamonuwnatshine hikahwakkalunwu seyni hi wutuk-poyikowleta. Hike mwikane pixkalunwu seyni hixolune yine wpohirewnakaka. Hatatjewa mejnunkatenwu seyni halikaka ptowru potuko wimwa.

¹¹ Wuchinikanune wimatletanune Corinto poktshi hajene, wunkakpotuthi hixa, wuchinikpotuthi.

¹² Hi hkahwakanu wma muchinijyawakanhi seyni hix-hetko halikaka hi hichinikjetwu hixa.

¹³ Nowhenene pixka nixa yanumsayehrethi. Wuchinijyawakhi pixka hixa hichinikletanwu hixa.

Malixkane Wma Miyanyawakanupa Piranapni

¹⁴ Hi malixkaneyma hyananu. Hanhe xawaka rumukata pixkakaklu hixleta halikakalutu pirana weyawluyma? Hanhe xawaka rumukata pixkakaklu hixleta katalu, mapchahaluyma?

¹⁵ Hiyrun-koxa hanhe xawaka rumukata Cristo-yma pa hchinikanurutu rixyawaka kamtshi? Hanhe xawaka rumukata pixkakaklu hixleta Cristo halixatshri malixkatuyma?

¹⁶ Hanhe xawaka rumukata pixkakaklu hixleta Hoyakalupji mayawletshichayma malixkane munanhaleru? Klu tshinanu hixakni Hoyakalu Hiwejikalurupjiwu. Klu tshinanu Hoyakalu potuko hali wan-tshinretatka: “Wanna hitokote nwanu, wanna nyanini. Royakalutepnona. Wannapni nayinetene.”

¹⁷ Tsru Hixikatshriwa Hoyakalu wan-tshina hiyrunukotnaka: “Hiyáhoni wanna yehi hichpajini Wanna yehi hkotspalaxinwa. Kaptsholu, himtuklewatatshri hi hyotnekanu. Wan-hixatshri kihle yoptole nixanu.

¹⁸ Hirpakno hita, hixpakni nowhenene hiyrun-koxa nwuheneronephi — wane htshina Tsru Hixikatshriwa Hoyakalu ptowru potuko himukatatshri.”