2 Coríntios 4 - Bíblia

Kihler-potuko Tokantshi Katalu Pixka Hixatshri Piranapni

¹ Hiyáhoni hi wuhroka klu tshinanu Hoyakalu ruchinijyawaka tshinanwu xye kamrurtshi renekwu.

² Seyni halikaka ptowru hixatshri kamrurtshi yohimatkaluru hiyrun-koxa yokwihchinikanrewatatshri wuknokatka. Hi wyokwijrewata hiyrun-koxa hi pnuko wtshina hinkakleta Hoyakalu tokanuya. Seyni ptowru hohneruka halikakalutu pirana tshinyawaka wuphujeta. Kihle piranyehirune wixnawa ptowru yine hchinikanuya Hoyakalu hetanuya.

³ Klu tshinanu wunkakle pirana, kihle piranalu potuko hiwekkaklewatatshri pirana, himka phujewaka mwakatni, hamhatshine tshinanu tsonu halikaka yohimatatshrini.

⁴ Hi ralixluna Cristo klu tshinanu xye tshijne hoyakalute hektutu kkamhakleru himaletahchinikanutna. Hi ritshitna rumrekhaxyawakna hma mexyawakanupluna katalu, kihle piranalu potuko hiwekkaklewatatshri pirana, Cristo hoyaknu pirana. Cristo waleni Hoyakalu yáholu potuko.

⁵ Klu tshinanu wunkakle pirana hi hixako wipiranni; wunkakle Jesus Cristo Tsru Hixikatshriwa piranni hiyrunu hixa towrertshinwu Jesus tshinanu wunkaklewjeta.

⁶ Hoyakalu wla tshina: “Mapchahawak-yehi katalupni.” Wane potuko hixa hatawnaletatka halikaka pirana wihchinikanuya. Xyekni renejyawu himatkaltshi hatajnu Hoyakalu hoyaknu himatyehixikowakapa, yotshyahatatshri Cristo hojiya.

Hixa Kajpa Kamhikolu Pixkalunwu Kwenur-potuko Tenhohne Hichpajikatshri Hwahitokotexyawakwu Piranapni

⁷ Seyni hixa xye halukkaluru tenhohne hichpajikatshri himwatshinwu kajpa kamhikolu stono pixka hixatshinwu. Wane wixa rimaxikowaka tsru pixkontshi hi hixanni Hoyakalunni.

⁸ Ptowruko salewaktshi weta seyni hi rallitanwu. Hi wimatahchinikanuxnawa seyni hi mkahwakkanepwu.

⁹ Kamnitkalunwu seyni hi hiknokkalunwu. Wkotshipjetka wihchinikanuya seyni hi nikawnatshinwu.

¹⁰ Ptowru hohneruka hi howuklu wimane hiylaxikowakapa Jesus pixka rimathexikowakap-koxa Jesus hiwekle pirana, hixa wimaneya.

¹¹ Klu tshinanu wiwekka pchinika jhamlewaka wwahnapuwakata Jesus pirana tshinanu Jesus hiwekle koxa hiphujetkalurupni wimane himat-hipnatshri hetanuya.

¹² Hiyahokni ptowru hohneruka hipuktshi hetumhawu seyni wanepnawaka hixa riwekkakhonuka.

¹³ Hoyakalu tokanu yonatkaluru mitshikawlur-pirana wan-tshin-yonhata: “Nalixa hiyáhoni nyanumata.” Hiyáhoni hix-koxa himwalu walerutu walixle hchinikanu. Cristo walixa hiyáhoni wyanumata.

¹⁴ Klu tshinanu wimatlu Hoyakalu honra Wutsrukate Jesus hipuktshi yehi riwekkajyatkalu, hix-koxa hipuktshi yehi riwekkajinwu Jesus pixka. Hiyrun-koxa Hoyakalu Jesus yehi ranikanwu hixaymakananuko.

¹⁵ Xye ptowruka hakanhatka hixa hepixikowaka tshinanupa. Wale tshinanu Hoyakalu hihlenu himukatatshri potuko hapokyehitna hixolune yin-yehi. Hiyáhoni nyipa yine himalwutanru Hoyakalu hanjihohneruya, hpohixikowakapa Hoyakalu.

Walixle Kosek-hiweklexyawakapwu Piranapni

¹⁶ Hiyáhoni hi wuhroka halixletanu. Yáholu wimane himat-nikawna seyni hixa hitokote hwatshri rerotetka ptowru hohnekananuko.

¹⁷ Xye papko salewaktshijiji wetjereru pchini hohnejiji tsonu hkojwakanwu. Seyni xye salewaktshijiji hapnutpatka yohnika tsru potuko hoyaknutshi hikeklu hohne mnikawnakatupni.

¹⁸ Klu tshinanu hi wkahwakpirpotutlu hetjejrurkaka seyni ptowruka metkotkaka halikaka wkahwakpirata. Klu tshinanu ptowru hetjejrurkaka pchini tsonu nikawnanu. Seyni metkotkaka hikeklu hohne nikawnanu.