2 Coríntios 3 - Bíblia

Herotu Pirana Yokanru Piranapni

¹ Wla wtshinini hixlahe kahwaklu kihle piranyehi wtshinyehixinwa? Hixlahe xawaka hijhalu yonawahlo kapiranyehi wixyawakapa pimrine hixjexyawaka pixka hixa himukata yoptolhihlenuxyawakapwu hixa hyonre ho pnuko hichpakatshro yonawahlo?

² Hixakni wyonawahlenhi. Wajkaka yonatkalunhi. Hixni himatkalunhi hiyrun-koxa het-yonhatkalunhi ptowruneka yineya.

³ Halikakni rimathetka hixa Cristo yonrene pixka hixatshinhi hiyrun-koxa hanikatshinekwu hixa. Hi yonawahlewapha hyonaxika, hi sotlu tshrajiko hyonaxika seyni yine hajiko hyonaxika. Hoyakalu hiwekatshri Hiwejikaluru yonatlu.

⁴ Hoyakalu wmunanhiywaka tshinanu wane wtshina Cristo-ya.

⁵ Himka wpoyahota hixa nanwaka, hixa nanwaka pa hixanu wkahwajnawakwa seyni Hoyakalukni wpoyahokakjeru.

⁶ Hiyrun-koxa Hoyakalu poyahotatshine rixkakwu herotu hkojiretlewleya. Xye hkojirexyawu hi Moisés yokanreru yonatkaluru ruchpajya seyni Hoyakalu Hiwejikaluru yokanre ruchpajya halikaka. Klu tshinanu Moisés hiykole yonatkaluru hipuktshi heneklewatatshrini seyni Hoyakalu Hiwejikaluru heneklewle hiwekkaklewata.

⁷ Moisés hiykole yonatkaluru yonrurni sotlu tshrajkaka hyonatka. Waneya yine renekka yonawahlo Hoyakalu hoyaknu hakanhayehitna. Moisés hoji katalu hyinuwaka hiwnaletatka wanepnawaka israel-nerune hi hakothatnutlu rethojixyawakluna Moisés. Hiyáhoni Moisés yokanreru yonatkaluru hipuktshi heneklewatatshri tsru hoyaknu rimapokyehitna yine,

⁸ hi psokananru xawaka royaknu Hoyakalu Hiwejikaluru kamrure.

⁹ Mitshikananu yokanruru yine jihyehitatshri tsru hikahwakkalurmakni. Hiyáhoni tsru hikahwakkalur-potni herotu yokanruru wpotukatjeru.

¹⁰ Klu tshinanu mitshikananu yokanruru hoyaknu tsru rixapa seyni xawakni hike potutkani wale, klu tshinanu yokanruru hepi rixinri psol-potuko tsrutkani wale royaknu.

¹¹ Klu tshinanu pchini tsonu hakotatshri hoyakawjejtapinri wane yohnik-hijhakalurni hoyaknutshi hikeklu hohne mnikawnakatu.

¹² Xyekni wkahwaka Hoyakaluya hiyáhoni tsru hchinikanwu wunkaklewaxyawaka.

¹³ Hi Moisés pixka hixatshinepwu, wale honukla hihoji ruchyata mkatshri samaya israel-nerune muhle hetlepotuxyawakanuplu hihoji hatnu. Hiyrunu hihoji hatnu hiwnakananumtatka.

¹⁴ Halikaka wanna hchinikanu katshpokka. Haté xawakni Hoyakalu tokanu yonatkaluru Jesus mapokkanuklunuwa pirana rethajekanaxinna israel-nerune, hihchinikanna hichyatka hatatjewa mkatshri sama Moisés hichyahojiwaklexinri ruchyahchinikanuxnawana. Xye hihchinikanna hichyale Cristo ralixini tsonna wale konanna.

¹⁵ Haté xawakni Moisés hiykole yonatkaluru rethaxinna Moisés hichyahojiwakletanru wanna hchinikanu ruchyajeta.

¹⁶ Seyni rumukata kochtshekota hichyahojru sama Tsru Hixikatshriwa Hoyakalu ruprotakyehixyawakapa yineru.

¹⁷ Hewi Tsru Hixikatshriwa htshinini, waleni Tsru Hixikatshriwa Hoyakalu Hiwejikaluru hkochtsheka. Hanuktalu Hoyakalu Hiwejikaluru wane koxlu ruchoxikowaka yineru hkachikanatjer-yehiya.

¹⁸ Ptowrunekwu hixa muchyahojitkanwu wuphujetlu Tsru Hixikatshriwa Hoyakalu hoyaknu hatajnu hanihapi pixka. Wekhitlu waleko royaknu hatajnu. Tsru Hixikatshriwa Hoyakalu ruchpajya xye hoyaknutshi, Hoyakalu Hiwejikalurukni. Tsru Hixikatshriwa Hoyakalu pixka rixkakwu. Hiyáhoni hoyakawaxikaluru hatajnu pnuteko hyakananumta.