1 Pedro 4 - Bíblia

Cristo Halixatshine Salewnajexyawaka Piranapni

¹ Cristo salewniywaka himaneya hixa tshinanu. Wale tshinanu halpokoxinwa xye pixkalutu chinikantshiyma. Klu tshinanu hix-mane saletkoklunu hektuntshi ruchokaka.

² Hiyáhoni xawakni wan-hixatshri yineru hi hijhalu himane het-sotanrewle romkahixyawaka, yineru hikchikhihlenrerumka hi romkahitanu. Seyni Hoyakalu hikchikhihlenreru rujha homkahreta riwekka pchinika.

³ Klu tshinanu wiwekle hiknohatshritka tshinanu wpoyahokakatkalu ptowru potuka malixkane halukanru. Waneklu papko womkahikanatlu hapoklewlu, mantshi het-sotanrewle, himri, hahsalu, tsru niklu hiyrunu hoyakalu minjene himtuklewatatshine kahwakpirlu womkahjekanatatka.

⁴ Hiyahokni wanna malixkane himyekatka tsru poyikowlu phuta hkamhaluna hixa hi hapaka wane hwajeta. Hiyáhoni hektutu htshinanwakjethina.

⁵ Wanna nanwaka hinkaklexinwa Hoyakalu hepomhinipna, ptowru yineru ho hiwekatshri ho hipnatshri mayxakle halpokohnaputatshri.

⁶ Wale tshinanu kihle piranalu potuko, hiwekkaklewatatshri pirana hipnatshine koxa runkakka. Wan-rixkana rukolujikowakapna yinni himaneymana seyni riwejinri riwejinna Hoyakalu tshinanu.

Hichinikkaklu Hixo Hektutu Himaletatshri Piranapni

⁷ Seyni hi howukatkalu ptowru potuko nikawniywakapa. Hiyáhoni wale tshinanu kahchinikanurunephi, hislahatshinephi hanjihohneru tshinanuya.

⁸ Seyni halikaka xye ptowruka yohnik-hijhakalurni hichinikajyawaka. Klu tshinanu hichiniklewlu hixo hektuntshi hitukkakatshrini wale.

⁹ Yanamtatshine hapojini kihle yoptole hixanna. Muhjekakkanephi hapokatshine tshinanu.

¹⁰ Ptowru yineru Hoyakalu henekachale yoptotatshritka. Hiyáhoni wale tshinanu hepixkakanu hixa satkakhi henejikolu hyoptotanrutkaymako. Wan-hixjetatka klu tshinanu Hoyakalu henekachale hijhakalur-potuko hislahatshinetkahi.

¹¹ Satu yineru hinkaklewaxinipa, Hoyakalu tshinyawaka pixka htshinanu. Pimrine repixjexini satu, himatkaltshi Hoyakalu henejyaluyma repixanna. Hoyakalu himalwuxikolupa ptowru potuko tshinanu, Jesus Cristo tshinanuya. Hoyakalu hiphujexikolni, towutatshrini hike rixiniko mnikawnakatupa. Amém.

Kihle Hchinikanuplu Cristo Tshinanu Salewnatshri Piranapni

¹² Nuchinikanune, hi himyekanu yahtaletlewlu chikolu hapokyehixiniphi, hyahtalexyawakaphi. Hi himyekanu wale pixkalutu yahtaletlewlu hapyehixiniphi.

¹³ Seyni hpoyikowatanu, klu tshinanu Cristo salewnale pixka hixa saletletkalunhi. Hiyáhoni Cristo hoyaknu hiphujexikolupa hix-koxa himwapotutanu, tsru himuwluyma potuko.

¹⁴ Cristo hiwaka tshinanu heyikkoklunu, himuwatatshinephi. Klu tshinanu Hoyakalu Hiwejikaluru hiyrunu royaknu hix-yehi rawatka.

¹⁵ Hiyahokni hapnokatkoklunu hi hiylalewlu, hi tshowhuwlu, hi hektutu hkamhale tshinanni hi pimrine hyotnexyawaka tshinanu rapnokatka.

¹⁶ Seyni satu yineru hapnokatka Cristo romkahle tshinanu hi hpatewatanu. Halikaka Hoyakalu himalwutanu Cristo homkahle tshinanu salewnatshinhi.

¹⁷ Klu tshinanu rapokpapkolutatka hikolukanuwnalu hapojyawaka. Hiyrunu hyinuwakanu Hoyakalunerune yehiya. Hiyáhoni xawakni hix-yehi hyinuwajini hikolukanuwnalu ha hi pso hapnokatlukananhe retanna Hoyakalu tokanu kihle piranalu potuko hiwekkaklewatatshri pirana malixkane?

¹⁸ Hiyrunu potukaluneko kyapreru riwekkajikowakna, ha hi pso yaprenukananru riwekkajikowakapna Hoyakalu malixkane, hektuntshi kkamhaklerune?

¹⁹ Hiyáhoni xawakni hixa salewnatshinhi Hoyakalu halujyawaka tshinanu, hiwekle henekanru Hoyakalu ruslahyawakaplu. Klu tshinanu walekni hiyakotatshri himat-hislahatshri kihleru wkamhaleru tshinanu.