1 Pedro 3 - Bíblia

Raluk-hixlexikowaka Jeji, Hhanunroyma Piranapni

¹ Hiyáhoni hixa suxonhi waneko pixka haluk-hixletna hhanurune, hyijnakotanru satkaka hixako hhanuru. Waneyakni satu hnurtshi, hmalixkanuklunru Hoyakalu tokanu, ralixkakka hhanunro hixjexyawaka tshinanu. Hi tunkakle tshinanni.

² Ralixkakna jejine rexinipna hhanunrona Hoyakalu kahwakpiraxikolu potuka kamhale rixinipna suxone.

³ Suxone makawhihlenuxyawaka hi himanna hihlexikolni, hi kamapjiwutsluyma, hi ouro kamhikaluruymako, hi mkatshriymako.

⁴ Seyni tohchinikanu, wala hitokote hwatshri metkotu hihlexikolu, mimat-hitsruhkatni. Xye chinikantshi tuhlexinwa, jimatleropni, hwachatatshropni. Wla hixatshri hchinikanu halukkaluru potuko Hoyakalu hetanuya.

⁵ Klu tshinanu waneko pixka rixa hihlerexnanwana potukalonni suxonni Hoyakalunni mitshikawlonni, Hoyakalu munanhatshinni. Hyijnakotatkana wannako hhanurna.

⁶ Sara-ni pixka, tyijnakotlu Abraão-ni. Tutsrukate ttshinru Abraão-ni. Hixa suxonhi wanna pixkalunetkahi, kihleru hkamhini, hma pijyawakanupa, hma mimyejyawakanupa.

⁷ Waneko pixka hixanu hixa hnurtshine, himwahihlenutana hhanunrone himatjemluyma. Halukkalone pixka hixanna suxone. Himatna kayaho mixkonutna wanna himaneyna. Hiweklu Hoyakalu henekachaxyana yoptotatshinepa jeji, hhanunroyma tshinanu, wan-hixanu hanjihohnere hma mimalexikowakanupa Hoyakaluya.

Kihle Hiwekle Menu Halukatshine Piranapni

⁸ Hiyáhoni xawakni ptowrunekhi pa hchinikanurunephi. Hetwamonkakanu. Hichinikkakanu moletkakatshine pixka. Kchinikanurunephi. Himatletkakatshinephi, mayohonephi.

⁹ Hi hektutuyma papnutanru hektutu pkamhikjeru. Hiyrun-koxa hi yanhakluyma papnutanru yanhaklu. Seyni halikaka kihlewaka hanjiyehitanna. Klu tshinanu himatanru htshanixkoklunu, htshanixka kihlewaka hyoptoxyawakapa.

¹⁰ Hiyáhoni katuktako hamotlu kihle hiwekle menu hiyrunu rujhinri hix-hohne kihleru rexyawaka, rujhalu ruslahanruxyawaka, hektutu hma tshinyawakanu hiyrunu hinama ruslahanu yokwijru hma tshinyawakanupa.

¹¹ Rujhalu hektutu hkatjixini. Raluklu kihlewaka hkamhiywaka halikaka. Rujhalu kihlewaka rawyawaka hiyrunu romkahpotuxyawaklu.

¹² Klu tshinanu Tsru Hixikatshriwa Hoyakalu hetjetna potuka kamrurerune hiyrunu hyijnakjetlu ranjihohnerna. Seyni Hoyakalu kamnitna hektutu kamhatshine.

Salewaktshi Kihleru Kamhikolu Tshinanu Piranapni

¹³ Hiyáhoni hanurnihe kihleru kamhatshri himtukatshri?

¹⁴ Seyni hsalewnini kihleru hkamhaleru tshinanu, hpoyikowatanu. Wanna hamlenu hi hpikanu. Hiyrunu hi hkojwakahchinikanutanu wanna tshinanu.

¹⁵ Tsru Hixikatshriwa Hoyakalu pixkalunephi ptowru chinikantshiya. Ptowru mayohnutshi hiyrunu ptowru kahwakpirlu chinikantshiyma halpokotanu hinkaklexyawakaplu hixa himwaleru hmunanhaleru pirana ptowru yine hepomhakjene tshinanu.

¹⁶ Homkahitanru powra hchinikan-menu waneyakni pimrine hektuwaka htshinanwakaxiniphi hiyrunu hektu kamhatshine hkahwakkoklunu, seyni kihleru hkamhaleru Cristo tshinanni, hpatewatanhonukna hjihyehichatjene.

¹⁷ Seyni Hoyakalu halujiniplu hsalewniywaka hixa, kihle potlu hsalewnanu kihleru hkamhaleru tshinanu. Seyni hi kihleru hektutu hkamhale tshinanu hsalexikowaka.

¹⁸ Klu tshinanu pa katapka Cristo koxa salewnatka hektuntshi tshinanu. Hiyáhoni kihleru kamhatshri salewnatka hektutu kamhatshri tshinanupa. Wan-rixa Cristo ranijyawakapwu Hoyakalu nwaka. Waneyakni Cristo ruylaxikolu himane tsonu seyni riwejinri hiwekkakhonuklu.

¹⁹ Xye riwekkakjer-honuka himukatle tshinan-koxa samentshi kachitkalurkaka nwaka hyatka Cristo. Wane runkaklewyehixyana samentshine kachitkalune.

²⁰ Wannani mitshikawlunni, hektuwaka kamhatshinni, Noé-ni klu papko hiwekatshinekananni. Klu tshinanu Hoyakalu mchiretannutni hkahwakachatmaka tsro kanawa kamhako pchinika. Waneklu papko hi hixo yine hiwekkaka. Oito yine tsonu hiwekkaka hahyekachalu tshinanuya.

²¹ Xye pirana batiz-lu yaholuni. Xawakni wale koxa hiwekkakwu. Hi mantshi himtuklewatatshri hiknojikolu hiwekkakwu seyni Jesus Cristo hipuktshi hichpajikatshri hiwekkakwu. Ruphujetlu potuka chinikanurunwu Hoyakalu hetanuya.

²² Jesus Cristo tenhohne yatshritka. Hoyakalu potukle sreta htuplata. Wane rutakka hiwejikalune Hoyakalu towrene tenhohne hajene htowuxyawaka, tsru towutatshine tenhohne hajene hiyrunu tenhohne himukatle koxa htowutatka.