1 Pedro 2 - Bíblia

Sotlu Hiwekatshine Pixkalune Piranapni

¹ Hiyáhoni xawakni ptowru hixatshri hahnantshi, ptowru yokwijrewlu, ptowru hixachatatshri, ptowru sotanuhonutshi, tokantshi ptowru hixatshriko hiknokanu.

² Hematlune pixka tnutsh-ha hepixlewatatshri hijhapotutatshine, Hoyakalu tokanu wiwejinri hepixatshri hijhapotutanu htseruwniywakapa.

³ Hiyáhoni xawakni Tsru Hixikatshriwa Hoyakalu hepixle tshinanwu himathetatshinetkahi.

⁴ Hiyáhoni wyanwakatanru hatatjewa sotlu hiwejikaluru wapokanwakatanu. Halikaka malukkotumkani yineya seyni Hoyakalu nurrerni wale hiyrunu hijhakalur-potni wale.

⁵ Hix-koxa sotlu hiwekatshine pixkalunhi. Hoyakalu Hiwejikaluru panathi. Sacerdote-nhi Hoyakalu kotspalenhi, henekachalurkaka henekjetatshinephi Hoyakalu tshinanupa, Hoyakalu halukanru Jesus Cristo tshinanuya.

⁶ Klu tshinanu xye koxa htshina Hoyakalu tokanu yonatkaluru: “Hetanu, Sião tshinikowaka nutakanru sotlu hijhakaluru pixkalut-potu, psolupjiko poyehiwkakatshri. Sotlu nuretkaluru halukalur-potu. Hiyrun-koxa ptowru potuko halixatshri hi hmahijerutanu.”

⁷ Hiyáhoni hijhakalur-potni wale sotlu hixa halixatshinhi tshinanu. Seyni malixkane tshinanu: “Kpanawaklerune malukkotu rikahwakluna sotlu seyni hepixlewatatshri potukni, psolupjiko poyehitatshrini wale.”

⁸ “Sotlu hitspetkalurukni wale, kojwakahchinikanrewatatshri Hoyakalu tokanu hitspexikatshineya klu tshinanu hmajnakowjetna. Hiyrun-koxa Hoyakalu haluklu wan-rixikowakapna wan-hixatshine malixkane.

⁹ Seyni hixa halixatshinhi Hoyakalu nurrenhi, hineruneko hixyawakapa, Tsru Hixikatshriwa Hoyakalu sacerdote-tenhi, yine potukalunetkahi, Hoyakalunuko hixyawakapa. Hoyakalu nuretatkahi hiphujexyawakaplu rixa hihlehchinikanrexyawakhi, mapchahawaka hichpajyawakapa, wale nwaka katawak-potuko nwaka wwiywakapa htshanixikowaka.

¹⁰ Mitshikananu hi Hoyakalu hayinetenhi seyni xawakni Hoyakalunerunetkahi. Mitshikananu hixa hi himathetatkalu Hoyakalu hetwamonre hanu rixa seyni xawakni Hoyakalu hetwamonre yoptotatshinhi.

Cristo Halixatshine Hixa Hiweklexyawakapa Piranapni

¹¹ Nuchinikanune potu, hixa hi hewi tshijne hajenekhi hiyrunu hi xye tshijne hitukatshinhi hiyáhoni nanjipotuthi hasujinri hektuntshi mantshi halukanru, yineru hiwekle kamnitatshri.

¹² Yine malixkane hetanu, potuka hiweklerunephi. Yáholu hektutu kamhatshine htshinjetanhi seyni kihleru hkamhaleru tshinanu wanna yehi hkamhajexinri tshinanu, Hoyakalu hapojinri hohnepa rimalwutanruna.

¹³ Hyijnakotanru ptowru tokantshi htowuxikolu pirana, yine towuxikolu Tsru Hixikatshriwa Cristo homkahlu tshinanu, towutatshri ho tsru phuru, ptowru yokanatatshriko,

¹⁴ ho tsrukakalunecha rixinna, hyijnakotanna. Klu tshinanu pohirtshine rutakkana wanna, hektutu kamhatshine rapnokaxyawakapna hiyrunu kihleru kamhatshine rimalwuxyawakapna.

¹⁵ Klu tshinanu Hoyakalu haluklu wan-hixikowaka. Waneya wan-hixatshinhi, kihleru hkamhaleru tshinanu wanna mchinikanune hike mimatkane tokanu hitshrokkakanu.

¹⁶ Mimaletkonhi seyni hi hektutu hetachatkalunephi mimaletkone hixyawaka tshinanu seyni halikaka Hoyakalu towutlene pixka hixinwa.

¹⁷ Ptowru yineru hkahwakpiratanu. Moletkakatshine Cristo tshinanu hichinikanu. Hoyakalu hpikanu. Towutatshri hkahwakpiratanu.

Halixatshri Cristo Yapkakle Rixyawaka Piranapni

¹⁸ Towretshine hyijnakotanna htowutjene ptowru kahwakpirluyma. Hi htowutjene kchinikanurune tsonu hyijnakotanu seyni wanna htowutjene mpotukane koxa hyijnakotanu.

¹⁹ Klu tshinanu kihle hchinikanru Hoyakalu satu yineru Hoyakalu ruchinikanretle tshinanu hsalewniywaka, hike mkamhakatuko saletkoklunu.

²⁰ Yineru hsalewnini hmajnákonu tshinanu, rakotachaxiniphutlu hanhe rixa hepixletanru? Halikaka Hoyakalu hikchikhihlenutlu kihle hchinikanurune hixyawaka hsalewnini, yáholu kihleru hkamhaleru tshinanu hsalewnini.

²¹ Klu tshinanu xyekni htshanixikolu. Cristo hixyawaka pixka, hsalewna hixa tshinanu. Hiyáhoni xye chinikantshi rekhitwu, womkahixyawakaplu.

²² Cristo hikeklu hektuwatatka. Hiyrun-koxa hi satukna tokantshi yokwirewatatshri hichpaknamaxyalu.

²³ Hektutu htshinatkaluna seyni hi ruhitatka. Hsalewninimkatka seyni hi rujha hapnuretna. Seyni halikaka Hoyakalu, hetamayxaklerewatatshri potukalu hmunanhatka.

²⁴ Cristo, waleko himaneya hahmuna skita hoho ranikhektunutwu. Hipnatshine pixka wixyawakapa hektuntshi tshinanu seyni halikaka wiwekanu kihleru wkamhiywakapa. Wuhletkatka Cristo kotshipjexikolu tshinanuya.

²⁵ Klu tshinanu carneiro-ne pupjetatshine pixka wixakanata. Seyni xawakni carneiro hislahatshri pixkalutu, yineru hiwejinri towutatshriko nwaka wsatkakkatka.