1 João 4 - Bíblia

Hoyakalu Pirana Hinkaklewatatshinemka Hiyrunu Hoyakalu Halixatshine Piranapni

¹ Nuchinikanune, hi ptowru hiwejikaluru tshinikatshriwa halixanu seyni hyahothapkatanru himathexyawakaplu ho Hoyakaluymalutlahe ho hike. Klu tshinanu hixo Hoyakalu pirana hinkakletatshinemka xye tshijne hakanhiyatka.

² Wla hixa himathetletanru Hiwejikaluru Hoyakaluymalutu. Katukta wan-tshinanru Jesus Cristo hapokatka himaneyma potuko, rawya Hiwejikaluru Hoyakalu yehi hichpajikatshri.

³ Seyni hanuruktako hiwejikaluru Jesus Cristo hi halikaka rapokatka himaneya potuko tshinatshri, wale hi Hoyakalu yehi hajerni, seyni halikaka Cristo kamnitatshrikni wale. Hixa jempiranyehitatkalu xye pixkalutu hiwejikaluru hapojyawakapa hiyrunu xawakniko xye tshijne rawatka.

⁴ Mturune, Hoyakalunune wanna hallitatka. Klu tshinanu hixa himwaler-potu himukatatshri xye tshijne hwatshri yohnikayalutni wale.

⁵ Wanna xye tshijne hajenni. Wale tshinanu xye tshijne hchinikanu pirana hkochtshekna. Hiyrunu xye tshijne hajene hislahtokanutna.

⁶ Seyni hixa Hoyakalununwu hiyáhoni Hoyakalu himathetatshine hislahtokanutwu. Seyni Hoyakalunune minje hi yijnakotwu. Wane wixa himathetletlu Hiwejikaluru halikakalutu hiyrunu hiwejikaluru pupjetatshri wimatheta.

Hoyakalukni Hamotlewlu Piranapni

⁷ Nuchinikanune, wuchinikkakanu klu tshinanu hichinijikolu Hoyakalu yehi ruchpajya. Katukta hamotkaka Hoyakalu matkaklerutkani hiyrunu Hoyakalu rimatheta.

⁸ Seyni katukta hi hamotlewata hi rimathetlu Hoyakalu klu tshinanu Hoyakalukni hamotlewlu.

⁹ Wan-rixa hekhireta Hoyakalu ruchinijyawakwu klu tshinanu xye tshiji hyokanatlu Hiwhene satupkalutu wiwejyawakapa wale tshinanu.

¹⁰ Xyekni hamotlewlu. Himka wamotatkalu Hoyakalu seyni wale hamotatkawu hixa. Hiyahokni hyokanatlu Hiwhene Cristo rumukata wukolukanuwnalkaka ramtakahchinikankajyawakapa.

¹¹ Nuchinikanune, Hoyakalu hamoxyawakwu pixka wixa hichinikkakletanu.

¹² Hi satuknako yineru hetawalu Hoyakalu, hikeklu. Seyni wuchinikkajiniklunu hixaymalu Hoyakalu hiyáhoni Hoyakalu hamotle hiphujetka hixaya.

¹³ Xye tshinanu wimata waleymatkawu hiyrunu hixaymatkalu Hoyakalu klu tshinanu renejyatkawu waleko Hiwejikaluru.

¹⁴ Wetlu hiyrunu wuphujtatlu Wuru Hoyakalu yokanatlu Hiwhene xye tshijne hajene hiwekkaklewatatshri rixyawakapa.

¹⁵ Katuktako pohitlu Jesus, Hoyakalu whene rixyawaka, Hoyakalu waleymalu hiyrunu Hoyakalu hwalu.

¹⁶ Wimatlu hiyrunu walixlu Hoyakalu hamotwu hixa. Hoyakalukni hamotlewlu. Hamotlewlu hwatshri Hoyakalu hwatshrini hiyrunu Hoyakalu waleymalu.

¹⁷ Xye tshinanu Hoyakalu hamotle tserutkatka hixaya. Wan-hixatshinwu kihle hchinikanurunepwu jemahchinikanyehixikolu hohne hapojiniklunupa. Klu tshinanu Hoyakalu hixyawak-potuko pixka wix-hixa xye tshijiya.

¹⁸ Hamotkaklu hwiywaka hi rawa hamlehonutshi. Hamlehonutshi salewaktshi hikahwaklu seyni halikak-potu hamotlewlu hakaklu hamlehonutshi. Jhamleholu hi kihleylu hamotlewlu.

¹⁹ Wamotlu Hoyakalu klu tshinanu wale hapka hamotatkawu hixa.

²⁰ Satu wane tshininiklunwa: “Namotlu Hoyakalu”, seyni rahnanuxinri Cristo tshinanu hmoletanru, kayloklerni wale. Klu tshinanu katukta hi hamotlu Cristo tshinanu hmoletanru, retler-potuko, hi rumukata hamotletlu Hoyakalu, metkot-potuko.

²¹ Hixa rawyawu xye Hoyakalu towuxyawu: Hoyakalu hamotatshri tshinikatshriwa, Cristo tshinanu hmoletanru ramotanu.