1 João 3 - Bíblia

Hoyakalu Whenene Piranapni

¹ Hetanu, hi pso hamotlukananu rixwu Wuru Hoyakalu, Hoyakalu whenene wtshinikowaka. Halikaka Hoyakalu whenetkawu. Hiyahokni xye tshijne hajene hi himathetwu klu tshinanu hi rimathetatkaluna Wuru Hoyakalu.

² Nuchinikanune, xawakni halikakni Hoyakalu whenenetkawu. Wanepnawaka hi wimatjemkakatka hanu potu hixatshinektapwu. Seyni wimata, ruphujewniniklunupa Cristo wale pixka potuko wixanu, klu tshinanu wetpotutanru rixyawak-potuko.

³ Ptowru yineru Cristo munanhatshri, powralu rixinwa. Cristo powranu pixka rixanu.

⁴ Katukta hektuwaka hkamhini, yonruru tshinyawaka hpupjexya. Klu tshinanu hektuntshi kamnitlu yonruru pirana.

⁵ Hiyrun-koxa hixa himata Cristo hinatka wektunu hkonyawakapwu. Hiyrunu hektuntshi hi rawya Cristo.

⁶ Ptowru yineru Cristo-ymalutu hi hektuwaka hkamhajeta. Halikaka hektuwaka kamhatshri katuktako, hi retjetlu Cristo hiyrun-koxa hi rimathetlu.

Hoyakalu Whenene Hiyrunu Kamtshi Whenene Piranapni

⁷ Mturune pixkalune, hi hitshitanru satu yokwijexyawakhi: Klu tshinanu potukalu kamhatshri waleni potukalu. Cristo potuknu pixka rixa wale yineru.

⁸ Ptowru yineru hektuwaka kamhatshri, kamtshinerutkani. Klu tshinanu hyinuwaklekananuko hmajnakowata kamtshi. Hiyáhoni xye tshinanukni ruphujewnapa Hoyakalu Whene, hnikaxyawakaplu kamtshi kamrure.

⁹ Ptowru Hoyakalu matkakleru hi hektuwaka hkamhajeta klu tshinanu Hiwejikaluru Potukalu rawya. Hiyáhoni hi rumukata majnakowleta klu tshinanu Hoyakalu whenetkani.

¹⁰ Wane wixa himathetletanna Hoyakalu whenene, kamtshi whenen-koxa: Ptowru yineru potuknutshi mkamhakatu, ho Cristo tshinanu hmoletanru hma muchinikkanuklunru katuktako, wale hi Hoyakalu matkaklerni wale.

Wamotkajyawaka Piranapni

¹¹ Klu tshinanu xyekni mitshikawluru tokantshi hyijnakotanru, wamotkajyawaka.

¹² Hi Caim pixka wixanu, wale kamtshineru hiyáhoni repuru Abel-ni ruylatatka. Haklu tshinanhe ruylatlu? Klu tshinanu waleko hkamrure hektun-tshinanni hiyrunu himolni kihle kamrure rixle tshinanu.

¹³ Hiyáhoni nomolene, hi himyekanu xye tshijne hajene hahnanuxiniklunhi.

¹⁴ Wimolene wuchinikanrexyawaka tshinanu wimathexnawa hipuktshi wuchpajyatka hiweklu wjihlokatka. Klu tshinanu katukta hi hichiniklu himole, wale hipuktshikowalu.

¹⁵ Katukta hahnanutjetlu himole, wale jiylalewaklerni. Hiyrunu hixa himata, jiylalewakleru hi rawya hiweklu mnikawnakatupa.

¹⁶ Xye tshinanukni wimathetlu hichiniklewlu. Klu tshinanu Cristo, riwekle ruknoka hixa tshinanu. Hiyáhoni hix-koxa wumukata wiwekle hamtakleta wimolene tshinanu.

¹⁷ Katukta himwalu rejnunkate xye wiwejinri pchinika hepixatshri hiyrunu Cristo tshinanu hmoletanru mahaxikatshri retmaka seyni hi ruchiniklu, wan-hixatshri yineru hi himwalu Hoyakalu hichiniklewle.

¹⁸ Nowhenene pixkalune, hi wtokanu tsonu ho winru tsonu hichinikkajini seyni wuchinikkakanu wkamrureya hiyrunu halikakalutuyma.

¹⁹ Wane wixini wimatanu halikakalunwu hiyrunu wapnanuhchinikanutanu Hoyakalu hetanuya.

²⁰ Wihchinikanu jihyehixinipwu, halikaka Hoyakalu wihchinikanu yohnikalutni. Ptowru potuka rimata Hoyakalu.

²¹ Seyni nuchinikanune, wihchinikanu mjihyehitkanuklunwu waneklu kihle hchinikanwu Hoyakalu hetanuya.

²² Hiyahokni kluneruktako wanjixinri, walemyo wyoptoxinri klu tshinanu htokanu womkahjeta hiyrunu rukchikhihlenutanru wkamhajeta.

²³ Hiyrunu xyekatkani tokantshi hyokanrer-pirana; hiwhene, Jesus Cristo hiwaka walixyawaka hiyrunu wmoletanune Cristo tshinanu wamotkajyawaka, htshin-towutlexyawakwu pixka wixanu.

²⁴ Katukta Hoyakalu tokanu homkahita Hoyakaluymalu hiyrun-koxa Hoyakalu himwalu wale. Wimata Hoyakalu hix-yehi rawa, klu tshinanu renekwu waleko Hiwejikaluru.