1 Coríntios 9 - Bíblia

Paulo Towutlewle Hiyrunu Rimatkalnu Piranapni

¹ Hi he numukata wan-hixletatshrino? Hi he nuretkalurno? Hi he netlu Wutsrukate Tsru Hixikatshriwa Jesus? Hi he nkamrurenhi hixa Tsru Hixikatshriwa Jesus-ya?

² Himka pimrine tshinanu nuretkalurno seyni hixa tshinanu halikakni. Klu tshinanu hixakni ntowuxikolu nimaxikolenhi Tsru Hixikatshriwa Jesus tshinanu.

³ Pimrine reyiknona. Wane ntshin-hihretna nepomsatjene.

⁴ Hi he nitshitka nnijyawaka, nuryawaka nkamrure nenejikolu tshinanu?

⁵ Hi he numukata haniklekananumtlo sato suxo Cristo homkahitatshro pimrine nuretkalune hixyawaka pixka? Cristo hepurune hixyawaka pixka? Hiyrun-koxa Pedro pixka?

⁶ Hita hiyrun-koxa Barnabé tsonrahe hijhalu hkamrurewaxyawaka wnijyawakapa, wmakawaxyawakapa?

⁷ Kathe pa kata soldado-tapa waneya wale nanwaklahe wenuxnawa yineru? Kathe hsana hitakatshriko waneyapa hi hnikanru? Kathe pratshi katsohatatshriko waneya hi ruratnuhatanro?

⁸ Xye pirankaka ntshina yapkakleta wane potuko htshina Moisés yonreru.

⁹ Moisés yonreru mitshikawlur-pirana wan-tshina: “Hi postuptotanru boi hitaklu tataji pjiplokkajiniplu.” Boi-ne ruchinikanrexyawaka tshinanrahe wane htshina Hoyakalu?

¹⁰ Ho hixa tshinanukla wane htshina Hoyakalu? Halikaka hixa tshinanu wane htshina. Hiyáhoni hitataji hitakatshri hiyrun-koxa hitaklu hamatshri pixkakaklune klu tshinanu wanna hepi kahwaklu honantshi psoji wannanuko hkayaxyawakna hkamrurna tshinanu.

¹¹ Hiyáhoni xawakni hitataji Hoyakalu yehi hichpajikatshri pirana wutajinri hix-yehi, hi he xawaka wumukata yoptoletanru wmahaxinri xye tshijne hajeru hix-yehiya?

¹² Pimrinemka himukata wan-hixleta hix-yehiya, hi he xawaka wane pnute wumukata hixleta hixa? Wanepnawaka hi wumukaxyawaka wixjeta. Seyni ptowru potuko wakotachata wma mimalexyawakanuplu kihle piranalu potuko hiwekkaklewatatshri pirana, Cristo pirana.

¹³ Hixlahe xawaka himatlu Hoyakalupji kamrurewaxikatshine nikjetlu Hoyakalupji hiylajexikalurkaka. Hiyrun-koxa hixa himatlu nikalni altar hoho hiylaxikalurni psojni hyoptotna altar yehi kamrurewaxikatshine.

¹⁴ Waneko pixka rixa hitakletna Tsru Hixikatshriwa Jesus, kihle piranalu potuko hiwekkaklewatatshri pirana hinkakletatshine, hmahaxinrina hkayaxyawakapna kihle piranalu potuko hiwekkaklewatatshri pirana runkaklexyawakna tshinanu.

¹⁵ Seyni hita hikeklu wane nixa. Xye pirana hi nyonatlu wan-hixyapno hit-koxa. Kihlemkano nupniywakhapkatka. Satukna yineru malecha hma mixinutupa nkamrure kihleru.

¹⁶ Klu tshinanu nunkaklexinri kihle piranalu potuko hiwekkaklewatatshri pirana, hi ntserpiranawaxinrini. Halikaka ntowutka nunkaklexyawaklu. Hektu potukno nma munkakletkanuklunru kihle piranalu potuko hiwekkaklewatatshri pirana!

¹⁷ Klu tshinanu hitako nalujyawaka nkamhakmaka nwenuxikolumka nujhanu. Seyni ntowuxikoluyma nkamhiywaka tshinanru xye kamrurtshi renekno Hoyakalu.

¹⁸ Hiyáhoni klunernihe nwenuxikolu? Waleni npoyikowle kihle piranalu potuko hiwekkaklewatatshri pirana nunkaklexyawaka hiyrunu hike nujhayehita nwenuxikowaka xye nkamrure tshinanu.

¹⁹ Hichotkalurno. Hike yinerumka towutno. Wanepnawaka ptowruneko towrerno klu tshinanu wane nixa heneklexnawa hixolune yine nehchinikankajyawakapa.

²⁰ Hiyáhoni judeu-ne tshinanu, judeu-neru pixka nixnawa, judeu-ne nehchinikankajyawaka tshinanupa. Hiyrun-koxa Moisés yonreru pirana homkahitatshine tshinanu, Moisés yonreru homkahitatshri pixka nixnawa, nehchinikankajyawakapna. Himka nmunanhanru Moisés yonreru pirana.

²¹ Hiyáhoni judeu mixkane yiminno hi Moisés yonreru nkochtsheka niwejinri tshinanu. Wane nixa judeu mixkane nehchinikankajyawakapa. Himka Hoyakalu hiykole nmajnakowaxya klu tshinanu Cristo hiykole hwikatshrino.

²² Hihroka halixletatshine tshinanu hihrokatshri pixka nixnawa hihrokatshine naluk-hikchikletkal-tshinanu. Ptowruneka tshinanu, ptowrukakako nixnawa, satkaka numukata hiwekkaklexyawakapa.

²³ Kihle piranalu potuko hiwekkaklewatatshri pirana tshinanu, xye ptowruka nkamha. Naluka yoptoletanu halixatshineymapa Hoyakalu hihlenu wanna tshinanupa.

²⁴ Hixa himatlu hasuklu kamhatshine pirana. Hasuklu kayaxikatshri tsonu yoptotanru rumlujikolu. Wan-hixa hasuklepotutanu hyoptoxyawakaplu himlujikolu.

²⁵ Ptowruneko hasuklu kaypiraxikatshine ruslahmanexnawana. Wanna halikaka wan-rixna klu tshinanu satu sahyi hyochmakjiwuxikolupnina, rimathexikowakapa hasuklu kayaxikatshri rixyawaka. Halikaka wan-hixatshri sahyi nikawnanu pa hohne. Seyni hixa Hoyakalu homkahitatshinwu yoptolerupa satu sahyi hikeklu hohne mnikawnakatupni, rimaxikowaka kayatatshinwu wixyawaka.

²⁶ Halikaka hita wane nixa hasuklemta, npoyehitahchinikanuta hasuklu hichinixyawaka napojyawakapa. Hiyrun-koxa yahotkaklu pirana pixka nixa. Hi malechawaka hiylakatshri pixka nixa.

²⁷ Seyni nsaletmanexnawa. Ntowutmanexnawa. Pimrine nunkaklewyehixinixka hiwekkaklewatatshri pirana, hit-koxa nma mahijeruxyawakanupa.