1 Coríntios 8 - Bíblia

Mayawletshicha Heneknijituxikowaka Piranapni

¹ Xawakni mayawletshicha heneknijituxikowaka pirana nkochtshekanu. Hehe, hixa ptowrunekwu hixo pirana wimata. Hiyáhoni wimatkale tshinanu tsru hchinikanu wixnawa. Seyni pimrine wuchinijyawaka tseruwnakaklu halixlewlu.

² Ho satu kahwajnawa pa hixanu rimata hike rimata rumukata himatletanrukmaka.

³ Seyni Hoyakalu himatlu ruchinikjeru.

⁴ Hiyáhoni mayawletshicha heneknijituxikowaka pirana wimatlu wale mayawletshicha wale hikeni. Mayawletshichani. Wimatlu Hoyakalu satupkalutu. Wale tsonni.

⁵ Klu tshinanu wanena hoyakalune tshinkalune tshijiko hwatshine hiyrun-koxa tenhohne hwatshinemka. Wan-rixkalukni hixo hoyakalune hwaklukni híxona hitsrukatshi tshinkalune.

⁶ Seyni hixa tshinanu waneru satupkalutu Hoyakalu. Waleni Wuru Hoyakalu ptowru potuko hiyakotatshri. Wiweka wale halujyawaka wkamhiywaka. Hiyrun-koxa Wutsrukate Hoyakalu satupka. Waleni Jesus Cristo. Ptowru potuko hkamhaka Jesus Cristo tshinanuko. Haté hix-koxa hwa Jesus Cristo tshinanu.

⁷ Seyni xye pirana halikakalutu hi rimata satkaka yineru. Satkaka hasruhlu mayawletshicha hpijyawakna hiyáhoni haté xawakni hnijinna hkahwakluna mayawletshicha nijitu hnikna. Mchikohalixlene kahwaklu mayawletshicha nijitu himtuka hiweklehotna.

⁸ Halikaka hi nikkaluru tshinanu wkayehiklu Hoyakalu. Wnijini ho wma nikkanuklunu psokakluni. Hi hkaykakanwu hiyrunu hi ramtakkakanwu.

⁹ Wanepnawaka nujrethi. Xako hi hihrokatshinephi hi hitspehchinikankakanu hixa himatkalewle tshinanu.

¹⁰ Klu tshinanu nijittshi mayawletshicha henekachaluru pirana hihrokahchinikanutatshri hexiniklunupyi, pixa jimatkaleryi, nikjexikowaka ptuplaxiniklunu mayawletshichapjiya, hi he hkojwakahchinikanutanu hihrokahchinikanutatshri pnijiniplu mayawletshicha henekachaluru?

¹¹ Pimatkalewle tshinanu ramhanuna hihrokahchinikanutatshripni. Waleni pimole Cristo tshinanu hiyrun-koxa wale tshinanu rupna Cristo.

¹² Wane pixini, pimole Cristo tshinanu pektuwanwakata pumtukahchinikanutlu hiyáhoni Cristo-ko pektuwanwakata.

¹³ Hiyáhoni nikkaluru hitspehchinikankajiniplu Cristo tshinanu nmoletanru hikeklu hohne nnikanutkalu nikalhitu nma mumtujyawakanuplu nomole.