1 Coríntios 7 - Bíblia

Hnunrotshine, Hnurtshine Hiykoxikolu Piranapni

¹ Xawakni hixa yonyehixyano pirana nkochtshekanu. Kihlepotlu jeji suxo hma yotnexyawakanu.

² Seyni hapoklewlu tshinanu satkaka jeji hijhalo waleko hhanunro rimwiywakapa. Hiyrun-koxa satokaka suxo hijhalu walako thanuru timwiywakapa.

³ Hnurtshine haluklu hhanunrone halujyawaka romkahixyawakna. Waneko pixka tixanru suxo thanuru.

⁴ Wala suxo hi towutmanexinwa wala nanuko seyni halikaka thanuru towutleropni. Waneko pixka rixa thanuru. Hi htowutmanexinwa seyni hhanunro halikaka towutmanetanru.

⁵ Wanna hepi, jeji hhanunroyma hi htshipetmankajinna ho pchinhohnejiji tshinanu tsonu mimaletkonepni ranjihohnexyawakna tshinanu tsonu. Waneyakni himumkakakanutnaka Satanás myahtalexyawakanupna hmakoxikowakanupna tshinanu.

⁶ Seyni pchinhohnejiji htshipetmankajyawakna jeji hhanunroyma pirana hi ntowuxikolni wale pirana. Wale hitshitkaluru piranni.

⁷ Nalukmaklu ptowruneko halixatshineko hita pixkamka rixanna hi khanunrophi, hi khanuruphi. Seyni satkaka wan-rixa Hoyakalu henejyalu. Satu wane potuk-hixa. Satu pnuko hixa.

⁸ Wane ntshinna mhanunrone hiyrun-koxa hipnahnurutatshrone wane ntshina. Hita pixka rixhohnekanatanmakna.

⁹ Seyni hma makotkanuklunupluna wan-rixyawakna hhanunrowhapkatanna, hhanuruwhapkatanna. Klu tshinanu kihleru halikaka hanunrowhapkaxyawakna, hanuruwhapkaxyawakna hma kaheknanuwaxyawakanupna.

Hnunrotshi, Hnurtshi Hma Muchoxikowakanu Piranapni

¹⁰ Satu yokanruru waneyno hixa himwakakatshine tshinanu. Halikakni hi hitako nanikpiranachalerni seyni Tsru Hixikatshriwa Cristo yokanrerni. Suxo khanururo hi hichohnurutanu.

¹¹ Tuknokahnuruxinipa, mhanuruthohnekananpatkani ho wannako hihlekakanu. Hiyrun-koxa jeji hi hichohnunrotanu.

¹² Waneya wane pnute hita wan-tshina, hi Tsru Hixikatshriwa Cristo wan-tshina: Cristo halixatshri malixkato hnunroxini taluk-himwalhohnekanaxinri, hi ruchotanro.

¹³ Hiyrun-koxa suxo Cristo halixatshri hmixkanuklunu thanuru raluk-hohnekanaxinro, hi tuchotanru thanuru.

¹⁴ Klu tshinanu hnurtshi malixkatu hihlehchinikanutka Hoyakaluya hhanunro halixatshro tixini. Waneko pixka tixa hnunrotshi malixkato hihlehchinikanutka Hoyakaluya thanuru halixatshri rixini. Wane hmixkanuklunna hwuhenenna hi ruhlehchinikanutkana Hoyakaluya. Seyni xawakni ruhlehchinikanutkana Hoyakaluya.

¹⁵ Malixkatu haluk-hicholexinro hhanunro Cristo halixatshro hyachatanu malixkatu. Wan-rixini malixkatu hike rixa halixatshine tshinanu ho jeji ho suxo. Hoyakalu honra tshanixatkahi kihle hwachale hixinripa.

¹⁶ Klu tshinanu pixa suxyi halixatshroyi hi pimatlu phanuru malixkatu xawaka palixkakanu, waneko pixka rixa jeji halixatshri ho phanunro malixkato xawaka palixkakanu.

¹⁷ Seyni riwejinri Tsru Hixikatshriwa Cristo heneksaxya tshinanhi satkakhi hixa wanekananuko hixa hiwekletanutka Hoyakalu tshanixiniklunutkahi pixkako hixhohnekanatanutka. Wane nixa hasrukletna ptowruneka Cristo halixatshine hapatjetatshin-yehkaka.

¹⁸ Satu yineru judeu-neru jiprojhaptojimtatatshri htshanixkoklunutka Hoyakaluya hi rujhalu mjiprojhaptojimtatkotu pixka rixyawaka. Hiyrun-koxa ho pa neruko mjiprojhaptojimtatkotu htshanixkoklunutka Hoyakaluya hi rujhalu hjiprojhaptojimtaxikowaka.

¹⁹ Jiprojhaptojru hike repixa Hoyakalu hetanuya hiyrun-koxa hma jiprojhaptojimtatkanuklunu yineru hike repixa Hoyakalu hetanuya. Hepixlewatatshri potni Hoyakalu yokanatanru homkahixikolu.

²⁰ Hanukta rixakanatatka yineru Hoyakalu tshanixinixkalu waneko rixanutka.

²¹ Hiyáhoni towutachatkaluryi pixakanaxini ptshanixkoklunutka, hike rixa seyni pumukata hichpaklexiniplu ptowuxikolu puchpakanu halikaka.

²² Klu tshinanu towrertshicha htshanixka Tsru Hixikatshriwa Hoyakaluya hiyáhoni mtowretkotuko hiyrun-koxa Hoyakalunutkani. Waneko pixka rixa towrertshicha mixkatu htshanixkoklunutka Cristo towrerni wale.

²³ Hixa kwenuru hanjixikalunhi. Hi yine towutanunephi.

²⁴ Cristo tshinanu nmoletanune, hanukta hixakanata satkakhi htshanixkoklunu Hoyakaluya, waneko hixanu Hoyakalu hetanuya.

Maklojine Hiyrunu Mhanunrone Hiyrun-koxa Hipnahnurutatshine Piranapni

²⁵ Maklojine jejine mapokmanetanunewa tshinanu, Tsru Hixikatshriwa Cristo hike hyokanaxyano seyni Hoyakalu hitakno halixatshine ninoxyawaka halikaka pirana hinkakletatshrino, waleko retwamonre tshinanu, hiyáhoni wane nixa himatjemletlu xye pirana.

²⁶ Hitaho kihleru xye papko kaheknanuwle tshinanu hanukta rixakanata jeji waneko rixanu.

²⁷ Suxlahe pimwa? Hi pujhanru puchoxyawakaplo. Mhanunrotu pixinrahe? Hi pujhanro suxo.

²⁸ Seyni phanunrowaxini hi hektuntshini wale. Hiyrun-koxa hi hektuntshini makloji thanuruwaxini. Seyni himatanu hnunrowatatshri ho hnuruwatatshro hsalewnamanetanna. Xye salewnalu pirana tshinanu wane ntshina hixa hma salewniywakanumkapa.

²⁹ Cristo tshinanu nmoletanune, wane ntshina, hi hohohneru Cristo hapojinripa. Hiyáhoni khanunrolune mhanunrone hiwekle pixka rixanna.

³⁰ Tshiyahatatshine mtshiyahatkane pixka rixanna. Ho himuwatatshine mpoyikowatkane pixka rixanna. Maronewatatshine malechayalune pixka rixanna.

³¹ Xye tshijne hajerkaka hikamrurewatatshine hi wan-hixatshine pixka rixpotukanatanna. Klu tshinanu xye hohne hixjexyawaka nikawnanu.

³² Naluk-hepixletmakhi hma kojwakahchinikanuxyawakanupa. Klu tshinanu jeji mhanunrotu hijhahchinikanuxinwa hanu pot-xawaka rumukata homkahretlu Nutsrukate Tsru Hixikatshriwa halukanru.

³³ Seyni khanunrolu haluk-himatletanru xye tshijne hajerkak-pirana hanu pot-rumukata kamhaleta hhanunro halujyawakako.

³⁴ Hiyáhoni wan-hixatshri hepi hchinikanru. Suxo mhanuruto hiyrun-koxa suxo jeji mapokmanetanutowa Tsru Hixikatshriwa halukanru pirana tuchinikanretjeta. Rujhaluna suxone powra rixyawakna himaneymana hiyrun-koxa riwejinriyna. Seyni suxo khanururo thanuru halujyawaka pirana tuchinikanretanu tpoyikowkajyawakaplu thanuru.

³⁵ Wane ntshina hiykolethi klu tshinanu naluk-hepixlethi. Hi naluklu nkotspehchinikanuxyawakhi. Seyni naluklu halikakalutu potukalu pirana homkahixyawakapa hiyrun-koxa Tsru Hixikatshriwa Hoyakalu halujyawaka henejinwa ptowru hmixkonuyma.

³⁶ Xyekni ntshina hiykoletna mhanunrone. Satu mnukawa hnunrowpiratatshri hyokmanahchinikanuxini, hmaklojite hma hnunrotpiraxyawakanu wla ntshina hiykoletlu. Hyokmanahchinikanuxinixnaka mhanunrotu klu tshinanu hi rukchikhihlenutlu tuchochaxikowaka makloji ho ralukpotutawalo hiyrun-koxa raluk-hnunrotlexinro hiyáhoni wane ntshina kihleru hhanunroxyawaklo. Wan-hixatshri hi hektuntshi hkamha.

³⁷ Seyni hmixkowahchinikanuxini hihchinikanuya hma hnunrowaxyawakanu klu tshinanu hi rujhalu hanunrowaxyawaka hiyrun-koxa rakotlu mhanunrotu rixachaxyawaka hiyáhoni kihleru hma hnunroxyawakanro hmaklojite.

³⁸ Hiyáhoni katukta hmaklojite hhanunrota kihleru hkamha. Seyni katukta hmaklojite hi hnunrota kihler-potu hkamha.

³⁹ Suxo tiwekahnurutka pchinika tinanchitka. Seyni tupnahnuruxinixka waleni towre tuchpajyatka. Hiyáhoni tumukata hnurutletlu talukanru katuktako. Seyni Cristo halixatshri tsonupni halikaka.

⁴⁰ Seyni hitaho tma hnuruwatkanuklunupa tumuwatanu. Hiyrun-koxa nkahwaklu Hoyakalu Hiwejikaluru himwano hit-koxa.