1 Coríntios 6 - Bíblia

Wla Raluk-hixletna Halixatshine Hapatjetatshine Hikolukanuwnalkaka Tshinanu Piranapni

¹ Klu tshinanhe hixa tskala hwatshri halixatshri hikolukanuwnalu kamhatshri hixa hijhahchinikanjixyehitlu tsrukakalune malixkane yehi seyni hi potukalune Cristo halixatshine hijhahchinikanjixyehitlu hikolukanuwnalkaka tshinanu?

² Hi he himata xawaka hixa Cristo halixatshinhi potukalunhi psol-tshijne hajeneko hikolukanuwnalkaka tshinanu hixa hijhahchinikanyehjixkona? Psol-tshijne hajeneka tshinanu hixa hijhahchinikanyehjixkona. Hiyáhoni kluneru tshinanhe xawaka hi hixako himukata hijhahchinikanyehretlu hikoluklu mpomuklukanutpotu tshinanu?

³ Hi he himatlu haté hiwejikalune Hoyakalu towrerune tenhohne hajene tshinanu wujhahchinikanyehjixko? Hi he wane pnute wujhahchinikanyehjixanna xye hohne hajeru hikoluklukaka?

⁴ Hiyáhoni hixa hijhahchinikanyehjixiniplu jikolukanuru xye hohne hajeru tshinanu seyni haklu tshinanhe hixa hi hitakna rujhahchinikanyehixikowakna Cristo halixatshine mpomujhakon-potu Cristo halixatshine hapatjetatshine yehiya?

⁵ Hixa patetjexnawa! Hi he rawa satu hix-yehi jimatkaleru himat-hichinikanuwyehrewatatshri hixa halixatshine hapatjetatshine yehiko?

⁶ Wane. Wanepnawaka Cristo hiwaka moletkajikatshinepnawakhi hijhahchinikanyehjixlu. Hiyrunu malixkane hijhahchinikanyehjixlu.

⁷ Hixa hikolukakjeta hixkakluko hiyáhoni hixa pupjeta. Hi he xawaka kihlepotlu hetachaxyawaklu jikolukanurkaka? Klu tshinanu kihle potlu htshowhuwachaxinixka.

⁸ Seyni hixa hi wan-hixa. Hixa himtukkakjeta hixkakluko. Cristo hiwaka tshinanu moletkajikatshinekhi wan-hixa.

⁹ Hi he himatlu hektutu kamhatshri hi Hoyakalu pohirewaxyawaka hyoptotanu? Hi hyokwijexinwa. Hi kapoklewakleruneko, hi mayawletshicha homkahitatshineko, hi jimopatakleruneko, hi suxonkaklu yamankakjetatshineko, hi jejineko perepnakakjetatshineko.

¹⁰ Hi katshowhuruneko, hi ksotanuholuneko, hi jimekleruneko, hi jejnuhimakleruneko, hi ktshowhuwakleruneko, hi hyoptotanruna Hoyakalu pohirewaxyawaka.

¹¹ Mitshikananu satkakhi hixa wan-hixjekanatatshinhi. Seyni hixa hektuntshi herojikatka, Hoyakalu yoptolenetkahi, hi jihyehitkalunetkahi Hoyakaluya, Wutsrukate Jesus Cristo tshinanu hiyrun-koxa Hoyakalu Hiwejikaluru tshinanu.

Hoyakalu Himalwuxikolu Mantshiyma Piranapni

¹² Hiyáhoni satuko wan-tshinanu: “Kluneruktako naluka kamhaletanu, nkamhanru.” Hehemka seyni hi ptowru potuko paluka kamhaletanru hepixanyi. Numukata wan-tshinreta: “Hehe, numukata nalukanru ptowru potuko kamhaletanu.” Wanepnawaka hi nitshitanru nkamhaleru towuxyawakno.

¹³ Satukotnaka wan-tshinanu: “Nikkaluru nosatu tshinanupa hiyrun-koxa sattshi tshinanu rawa nikkaluru.” Wanemka seyni Hoyakalu pa hohne nikatanru nosatu hiyrun-koxa nikkaluru. Wimane hi hapoklewlu tshinanni seyni wimane Hoyakalu yokanrerupni. Tsru Hixikatshriwa Hoyakalu wimane hyapa wale halukanru hkamhiywakapa.

¹⁴ Hoyakalu hiwekkakatkalu Tsru Hixikatshriwa Jesus hiyrun-koxa hix-koxa riwekkakanu waleko hpixkonuyma.

¹⁵ Hi he himata hixa hix-mane Cristo psojitni? Kihlehohihe Cristo mane psojite kapoklewaklero mane nipxakkajyawaka? Hike.

¹⁶ Hiyrun-koxa hi he himatlu katukta kapoklewaklero hapokmanexini, pa manepka rixatka walayma? Klu tshinanu wane potuko htshina Hoyakalu tokanu yonatkaluru mitshikawlur-pirana: “Hepikananna, pa manepka rixkakna.”

¹⁷ Hiyáhoni katukta Tsru Hixikatshriwa Hoyakalu hipxakanu satupkalututkani hiwejikaluruya.

¹⁸ Hasujinri hapoklewlu. Ptowru pimri hektuntshi yineru kamhanru wimane malekate hwatshrini. Seyni hapoklewatatshri waleko himaneko hmajnakowaxya.

¹⁹ Hi he himatlu wimane Hoyakalu Hiwejikaluru hwiywakni hixa himane hitokote hiwejikatshrini, Hoyakalu henejyawu? Wale waneyhi Hoyakalu tshinanu. Hi hixanukni hixa.

²⁰ Klu tshinanu kwenuru hanjixikalunhi. Hiyáhoni Hoyakalu himalwutanu himaneyma.