1 Coríntios 5 - Bíblia

Halixatshri Hapoklewaxinri Piranapni

¹ Xawakni ptowruneko pohitlu hapoklewlu pirana hix-yehiya. satu jeji hima ruru hnunroko rimwajeta. Wane pixkalutu hektutu haté malixkatu heyikpotutlu.

² Wanepnawaka hixa halixkoxnawa! Seyni hixamka hijhalu hwamonuwpotuxyawaka hiyrun-koxa wan-hixatshri hijhalu hixa tskala hkotspalaxikowaka.

Hektuwaka Kamhatshri Salexikolu Piranapni

³ Klu tshinanu hita yáholu hi hix-yehi nwapotuta seyni hixa nimwa nohchinikanuya. Hiyáhoni hatatjewa hix-yehi nwapotuta, njihyehitatkalu xye tsru hektutu kamhatshri Tsru Hixikatshriwa Jesus hiwakaya.

⁴ Hixa hapatjexinipa wane nwanu hita nohchinikanuya. Hiyáhoni Wutsrukate Jesus yokanre tshinanu Hoyakalu hitshithi.

⁵ Satanás renekko, wale saletmanetanru seyni riwejinri hiwekkakko Tsru Hixikatshriwa Jesus hapojinipa.

⁶ Hi kihleru halixkoxnawakwa. Hix-hetko jematkalu wane htshinyawakna yine: “Psotsonujiji chitshponatshri psolujpako hchitshponkaka.”

⁷ Hiyáhoni hixa hijhalu hiknojyawaklu kchitshponkaklewakleru mitshikawluru. Waleni hektuntshi. Wan-hixinpatka powraphi psoluyako. Waneyakni herotujpa chitshponatshri myapjetkone pixkalunpatkahi. Wan-hixatshinetkahi xawakni. Klu tshinanu ralpokotka poyikowlu hohne, Páscoa hohne, klu tshinanu Cristo carneiro whene pixkalutni ruylatka hixa kachrijru.

⁸ Hiyáhoni wuchinkapanru Páscoa hohne hi nikkalurujpa chitshponatshri yapjetkaluru pixka hixatshinepwu, waleni hektuntshi hiyrun-koxa ptowru hektutu tserutatshri. Seyni wuchinkapanru Páscoa hohne hatatjewa hijpa myapjetkotu pixkalunepwu, waleni wiwekle powralu hiyrun-koxa halikak-potu.

⁹ Mitshikananu yonawahlo nyokananwakathi nuykothi kapoklewakleruneyma hma yanjexyawakanupa.

¹⁰ Seyni hi ptowrun-potuko xye psol-tshijneko hajene kapoklewakleruneyma ntshina. Hiyrun-koxa hi ptowru ksotanuholuneyma, hi ptowru katshowhuruneyma, hi ptowru mayawletshicha kkahwakpirakleruneymako ntshina. Klu tshinanu wan-hixinipa, hixa hijhalu xye psol-tshijneko hichpajyawaka.

¹¹ Seyni xawakni nyonanwakathi hi hepiretanru moltshi tshinkaluru Cristo tshinanu kapoklewakleru rixini ho ksotanuholu rixini ho mayawletshicha kkahwakpirakleru rixini ho jejnuhimakleru rixini ho jimekleru rixini ho katshowhuru rixini. Wan-hixatshriyma hi hnikanu.

^12-13 Katnohe hita njihyehixyawakapna malixkane, hix-yehi mwakane? Halikaka Hoyakalu jihyehjetna wanna. Seyni hixa Cristo halixatshinhi hapatjetatshinhi hi he hixa hijhalu hjihyehixyawakna hektutu kamhatshine hixa tskala hwatshine? Hiyáhoni Hoyakalu tokanu yonatkaluru mitshikawlur-pirana wan-tshina: “Xye hektutu kamhatshri hix-yehiya kahnete hyokanatanru.”