1 Coríntios 4 - Bíblia

Nuretkalune Cristo Pirana Hiphujetatshine Piranapni

¹ Hixa hijhalu Cristo-yma kamrurewatatshinwu hikahwajyawakwu. Hoyakalu pirana yohimakanatkaluru pirana hiphujetatshinwu.

² Xye pirana hislahatshine rujhaluna Royakalutna halujyawaka kamhatshine potuko rixyawakna.

³ Halikaka ho hixa hexyawakno ho hapatjehchinikanutatshine hexyawakno hike rixa. Haté hi hitako jihyehixnawa.

⁴ Klu tshinanu hikeni hektutu nuchinikanretleru nukolujnawakwa. Seyni hi koxa wane nma mixyawakanu tshinanu powrano. Nutakyahokjerni Tsru Hixikatshriwa Hoyakalu.

⁵ Hiyáhoni xawakni hike hikolukanuwnanu hma mapokkanuko pchini hipapkolu. Hkahwakanu Wutsrukate Cristo hapojinipa papkopa waneya ptowru pirana potuko rutakyahokanu. Ruphujetanru ptowru pirana yohimatkaluru pirana, ruphujetanru ptowru yineru hichinikanretanru pirana. Waneklu satkaka halixkotko Hoyakalu tshinanu.

⁶ Cristo tshinanu nmoletanune, hixa nasrujyawaka tshinanu xye hasruklewlukaka nutajnawa hiyrun-koxa Apolo. Hix-hepwu wyapkaklexnawa kajnakolune hixyawakapa yonatkaluru piranaya. Wane htshina: “Hixa hma malixkoxyawakanuplu satu yineru pimrine pnute.”

⁷ Kathe wan-hixkakyi halukkaluru potu pixyawaka pimrine pnute? Hi he Hoyakaluko henekatkayi ptowru potuko pimwaleru? Hiyáhoni klu pimalixkoxinwa pma yoptotanutu pixka?

⁸ Hixa ptowru potuko himwatshinetkahi! Phurunetkahi. Hixa phurunhi seyni hixa hike. Kihlemkahi phurune hixyawaka Hoyakalu yhaleya. Wan-hixatshinemkahi hixayma wpohirewatanumkatka.

⁹ Klu tshinanu hitaho Hoyakalu hitakwu hixa nuretkalunwu Cristo pirana hiphujetatshinwu hapkatatatshine pot-wixyawakatka. Hixa hatatjewa hiylajixkalunepwu ptowru hetanuya, hiwejikalune Hoyakalu towrerune tenhohne hajene hetanuya hiyrun-koxa yine hetanuya.

¹⁰ Cristo pirana tshinanu hike mimatkanwu seyni hixa jimatkalerunhi hixahoxnawa Cristo halixyawaka tshinanu. Hixni hihrokatshinwu seyni hixni hixkolunhi hkahwajnawa. Hixa kahwajnawa kahwakpiratkalunhi seyni hixa hike pikwu.

¹¹ Haté xawakni pa katkaka natshwu, wonunnahatewata. Mkatshri hiskatatshri wmakatjeta, kotshipjerunwu, pa pji pejnu wumkamxya.

¹² Wkamrurewpotuta. Wimyoko wkamrurewaxya. Yanhakkalunwu seyni wuhlewahchinikanyehlewata. Wyotnejetkamka seyni wakotachatlu.

¹³ Pa katkaka hektuwaka wtshinka seyni wuykotna. Malukkotu hiknokkaluru xye tshijne hajeru pixka wixa. Kaptshowaka hajeru malukkotu wkahwakka haté xawakni potuko.

¹⁴ Hi nyonanwakathi hixa nma patetjechaxyawakanuphi seyni nowhenene nalukanune pixka nixa hiykolethi.

¹⁵ Klu tshinanu yahmaklu mil Cristo pirana hasruklewatatshine himwinimka seyni halikaka hi híxona hirune. Klu tshinanu kihle piranalu potuko hiwekkaklewatatshri piranaya nwuhenethi Jesus Cristo-ya.

¹⁶ Hiyáhoni nanjithi hita pixka hixanu.

¹⁷ Wale tshinanu Timóteo tshinkaluru nyokananwakathi. Timóteo-ni noturu pixkalutu nalukanru potuko, poyahokakatshri Wutsrukate Jesus-ya. Wale hichinkapkakanhi nixjexyawaka Cristo Jesus-ya. Wane nixa hasruklewleta ptowru sretako ptowru potuko Cristo halixatshin-yehi hapatjexikowakaya.

¹⁸ Satkakhi hixa halixkoxnawa klu tshinanu hkahwakhetkotlu klanu nma yiywakanupa.

¹⁹ Seyni chinpotukawa hix-yehi nyanu, Tsru Hixikatshriwa hitshixinipno klanu nyanu. Waneya nimatanru ho tokantshichalhe ho halikaklahe Hoyakalu pixkonu halixkoxikatshinwa tskala hwa.

²⁰ Klu tshinanu Hoyakalu pohirewaxyawaka hi tokantshichani seyni himukatluni.

²¹ Hanuru pot-haluka? Ho kotshipjerewapiyma nyanwakaxyawakhi ho kihle hchinikanurno nyanwakaxyawakhi, hixako hichinikanretatshrino?