1 Coríntios 3 - Bíblia

Hoyakalu Hikamrurewatanune Piranapni

¹ Ha, Cristo tshinanu nmoletanune, mitshikananu hi numukata hiynumsalethi Hoyakalu Hiwejikaluru himwatshine pixkalune. Seyni naluk-hiynumsalethi hixa hatatjewa xye tshijne pirana tsonu homkahitatshine pixkalunhi. Hatewa mturune pixkalunhi Cristo halixle tshinanuya.

² Hitnutshha pixkalutu nuthi. Hi nikkaluru pixkalutu nenekhi klu tshinanu hixa hi himukatawalu. Hi koxa xawakniko himukatawalu.

³ Xye tshijne pirana tsonu homkahitatshine pixkalunhi. Klu tshinanu hix-yehi rawa hahxalu hiyrun-koxa yahotkaklu. Hi he xye pirana hekhitlu xye tshijne pirana tsonu homkahitatshine pixka hixatshinhi? Hiyrun-koxa hi he pimrine malixkane pixka hixjetatshinhi?

⁴ Klu tshinanu wane htshininna satkaka yine: “Hitni Paulo-ymalutno.” Satuko wan-tshina: “Hitni Apolo-ymalutno.” Hi he wan-tshinatshine xye tshijne pirana homkahitatshine pixka hixatshinpothi?

⁵ Klu tshinanu klunerni Apolo? Klunerni Paulo? Hixa Hoyakalu halujyawaka homkahitatshine tsonwu. Halikaka wunkakle tshinanu hixa halixlu Tsru Hixikatshriwa Cristo pirana. Hanuru kamrurtshiktako Hoyakalu henekanwu hixa satkaka wale wkamhanu.

⁶ Hita hitaklewata. Apolo hihaklu. Seyni Hoyakalu tseruwnakaklu.

⁷ Hiyáhoni hitaklu hitakatshri hikeni, hiyrunu hitaklu hihakatshri hikeni seyni Hoyakalu hitaklu tseruwnakakatshri wale halikaka potu hijhakalurni.

⁸ Hitaklu hitakatshri pixkalutu pirana hiyrunu hihakatshri pixkalutu piranni satupkalutu. Satkaka yoptotanru hkamrure wenru Hoyakalu henekanna satkaka hkamrurna tshinanupa.

⁹ Klu tshinanu Hoyakalu rikamrurewatwu. Hixni Hoyakalu hisanate pixkalunhi. Hoyakalu wane hkamrurewjexya. Hiyrun-koxa hixni Hoyakalupjinhi.

¹⁰ Hiyáhoni halukkalurni Hoyakalu henekachaxyano pimrine nepixyawaka tshinanu kamhapjikleru pixkalutno kihle hislahlewleru. Hita halpokotlu pantshi hwiywakapa. Satu wane hoho kamhapjixya. Seyni satkaka hislahinwa hanu potu rixa panawlexika pantshi hwiywak-hoho.

¹¹ Klu tshinanu Hoyakalu mitshikawako hitakatkalu Jesus Cristo pantshi hwiywaka rixyawaka. Hi satukna Jesus Cristo kachrijru hitakko.

¹² Satkaka ho ouro ho prata ho sotlu kwenuru halpokoxikowaka hoho hpanawaxya. Seyni pimrine ho hahmuna ho kotshkawale ho kchan-sure hpanatna.

¹³ Cristo jihyehrewaxini hohnepa rimathetpotutko hanu rixa kamruretatka satkaka yineru, ho kihleru hkamrure ho hektutla. Klu tshinanu tshitshmero waneklu hohne hakanhatshripa satkaka yineru kamrure hiphujetanu. Tshitshmero hekhitanru hiyrun-koxa retumhanru hanu potu rixatka satkaka yineru kamrure ho halikaklahe ho hike.

¹⁴ Pantshi kamhakaluru malhaknuklunupa tshitshmeroya waneya pantshi kamhatshri wenutko, rumutko.

¹⁵ Seyni hkamrure halhinipa ramtakanru hwenuxikolumkapa. Pantshi kamhatshri hiwekkakko wanepnawaka seyni hatatjewa tshitshmero hichpajikatshrini.

¹⁶ Hix-hetko himatjempiranatlu Hoyakalupji hixyawaka hiyrun-koxa hixa himatlu Hoyakalu Hiwejikaluru hixa hitokote hwiywaka.

¹⁷ Hiyahokni katukta himtukanru Hoyakalupji, Hoyakalu himtukanru wale. Klu tshinanu Hoyakalupji Hoyakalunni. Hiyrunu xye Hoyakalupji hixakni.

¹⁸ Hike yokwijexinwa. Satkaka jimatkaleru rikahwajinipwa, yine himatkaleya rujhalu mimatkatu rixyawaka yineru himatkaleya halikaka jimatkaler-potu rixyawakapa.

¹⁹ Klu tshinanu yine himatkale reyika Hoyakalu. Hiyáhoni wane htshina Hoyakalu tokanu yonatkaluru mitshikawlur-pirana: “Hoyakalu kachitna jimatkalerune hixacha himatkalewletatshine.”

²⁰ Wane htshinatnaka mitshikawlur-pirana: “Tsru Hixikatshriwa Hoyakalu himatahchinikanutna jimatkalerune mahijeru hchinikanutatshine.”

²¹ Hiyáhoni hi satukna yineru halixkowatanu klu tshinanu ptowru potuko hixanni.

²² Paulo, Apolo, Pedro, xye tshijne, hiweklu, hipuktshi, xye papko, hinatshripa, xye ptowruka hixanni.

²³ Cristo-nunhi hixa. Hiyrun-koxa Cristo Hoyakalunni.