1 Coríntios 2 - Bíblia

Jesus Cristo Cruz Hitakkaluru Piranapni

¹ Cristo tshinanu nmoletanune, hix-yehi nyinmitshi halikakalutu pirana, Hoyakalu pirana, yohimakanatkaluru pirana nunkakapyahmitshi, hi tokantshicha hihlenuyma nunkakhi, hi tokantshi himatkalewluymako.

² Klu tshinanu hike naluk-himatleta hixa tskalaya seyni Jesus Cristo piranapka, cruz rupniywaka piranapka nuchinikanreta.

³ Hixa tskala nwakanaxini hihrokakanatatshrino hiyrun-koxa hitatakakanatatshrino npikle tshinanu.

⁴ Nunkakle hiyrunu nasruklewle hi yine himatkale tokanuyma nasrukakanathi seyni hetkalurkakayma Hoyakalu Hiwejikaluru kamhanru hiyrun-koxa tsru pixkonuyma wunkaklewata.

⁵ Hiyáhoni hixa halixle hi yine himatkalnu tshinanu rixinripni seyni Hoyakalu hiyákole tshinanni.

Hoyakalu Himatkale Piranapni

⁶ Seyni halikaka himatkalewlu pirana wkochtshekleru waleni tsrune halixlewle tshinanu piranni. Hi xye tshiji hajene himatkale pirana wkochtsheka hi koxa yokanatkalune towuxikolu himatkalewle nikawnatshripa pirana wkochtsheka.

⁷ Seyni Hoyakalu himatkale pirana Hoyakalu tsonu himukata hiphujetlepiranaxnawa wale piranakni wkochtsheka, yine mimatyehitanutu pirana wkochtsheka. Hoyakalu xye tshijne hma muyakotkanuklunuwa hnuretlu xye pirana hixa halixatshinwu Hoyakalu hoyaknu wyoptoxyawakapa.

⁸ Hi satukna xye tshiji hajeru tsrukakalune himatlu xye pirana. Klu tshinanu rimatkamkaluna hi koxa cruz rutakanruna ptowru potuko Hixikatshriwa.

⁹ Hiyáhoni wane htshina Hoyakalu tokanu yonatkaluru mitshikawlur-pirana: “Hi satukna yineru hetjejetlu, hi satukna jemjejetlu, hi waleko ruchinikanretjejeta yineru ptowru potuko Hoyakalu halpokoxyana ruchinikjene.”

¹⁰ Hiyáhoni Hoyakalu hiphujetlu xye pirana Hoyakalu Hiwejikaluruya wimaxyawakaplu. Klu tshinanu Hoyakalu Hiwejikaluru ptowru potuko retjeta haté Hoyakalu tsonu himatanu hiyrunu Hoyakalu ralukleru rimata.

¹¹ Hixa yinwu, wiwejinri, wimane hitokote hwatshri tsonu himatjemlu ptowru potuko wihchinikanu. Waneko pixka rixa Hoyakalu. Waleko riwejinri tsonu himatlu ptowru potuko Hoyakalu hixahchinikanuxyawaka.

¹² Hixa hi xye tshiji hajeru hiwejikaluru wyoptota seyni wyoptotlu Hoyakalu Hiwejikaluru renekanwu. Waleko himatjemkakwu ptowru pirana potuko Hoyakalu hixa repixyawaka pirana.

¹³ Hiyáhoni wasruklewaxinri, hi yine hasruklewle wasrukanna, hi yine himatkalewle pirana wasrukanna. Seyni wasrukanna Hoyakalu Hiwejikaluru hasruklewle. Hoyakalu Hiwejikaluru hchinikanu himwatshine yine Hoyakalu hchinikanu wunkaklexya.

Hoyakalu Hiwejikaluru Hetjerewle Piranapni

¹⁴ Hoyakalu Hiwejikaluru mwikatu hi himukata yoptoletlu henekachalkaka Hoyakalu Hiwejikaluru henejyawu. Hi koxa psojikna rimatjemlu wan-hixatshri xye pirana. Halikaka pirana waleho jipukaleru piranni klu tshinanu Hoyakalu Hiwejikaluru tsonu hiphujetlu. Hoyakalu Hiwejikaluru himwatshri tsonu himukata himatjemletlu.

¹⁵ Hoyakalu Hiwejikaluru himwatshri ptowru potuko rimatheta hiyrunu Hoyakalu Hiwejikaluru mwikatu hi himathetlu wale yineru.

¹⁶ Hiyáhoni wane htshina Hoyakalu tokanu yonatkaluru mitshikawlur-pirana: “Kathe himatahchinikanutlu Tsru Hixikatshriwa Hoyakalu? Kathe hasruklu?” Seyni hixa Cristo hchinikanu wimwa.