1 Coríntios 16 - Bíblia

Judeia Hajene Tshinanu Hapatjetkaluro Tiyiro Piranapni

¹ Xawaknipa hapatjetkaluro tiyiro Jesus halixatshine potukalune Judeia tshijne hajene tshinanu pirana. Cristo halixatshine hapatjetatshin-yehkaka Galácia tshijne hajene nixakjixyawaka pixka potuko nixakjixhi.

² Ptowru domingo hohne hkanipretanru tiyiro psoji waneya himretanru. Satkaka yineru rumukata hikchiklexyawaka pso tiyiro rutakanu. Wan-hixinpatka hi nujhalu tiyiro napatjexyawakpatka hita hix-yehi napojinpatka.

³ Wane napojinpatka nyokanatanna hixa nuretanunetka Jerusalém poktshi nwaka hyiywakapna tiyiro henekachluro hixa henekachale ranijyawakapna. Yonawahlo koxa nyokanatanu kihle yoptole rixikowakapna pirana.

⁴ Hike mimaletkanuklunupno wane nyanu, hitaymapakna.

Paulo Corinto Poktshi Hyapiraxyawaka Piranapni

⁵ Macedônia tshijne nali yaplemxinpatka hix-yehi nyanutka. Klu tshinanu Macedônia nyapamtanu.

⁶ Pa katako hix-hohne hix-yehi nwanu. Pa katako hinapuklu psoluka niknokakanu hix-yehiya. Hiyáhoni wane nixini hetko hixa himukata hepixletanno nyinipa.

⁷ Klu tshinanu hi naluk-hiknohachalemtanhi. Tsru Hixikatshriwa Hoyakalu hitshixinipno nkahwaka hix-hohne nimwanhi.

⁸ Haté Pentecostes hohne tsonu hewi Éfeso poktshi nwanutka.

⁹ Klu tshinanu nukchiklu hewi híxona yine Hoyakalu pirana halukatshine. Numukata hinkaklewleta yahmaklu híxona nkamnitjene.

Timóteo Hiyrun-koxa Apolo Piranapni

¹⁰ Timóteo hix-yehi rapojinipa kihle yoptole hixanru. Klu tshinanu Hoyakalu kamrure hkamhajeta hita pixka.

¹¹ Hike xako heyikanru. Seyni halikaka hepixanru hyiywakaplu hita nwaka kihle hchinikanuruko. Klu tshinanu nkahwaka hita nwaka hsatojinpatka pimrine Cristo tshinanu hmoletanuneyma hsatokanutka.

¹² Xawaknipa wimole Apolo Cristo tshinanu pirana, hixo kata nanjitlu Apolo hix-yehi hyiywakapa pimrine hmoletanune Cristo tshinanuyma. Seyni xawakni potuko hi raluka wane yaletawa. Hiklukta rumukatanu wane hyanu.

Paulo Hiykolewle Piranapni

¹³ Hi himnanhinwa. Poyehi halixlephi. Hixko hchinikanurunephi. Hixkolunephi.

¹⁴ Ptowru potuko hkamhini, hichinikkakanu.

Estéfanas, Fortunato, Acaico Tshinkalune Piranapni

¹⁵ Hixa himatna Estéfanas hiyrun-koxa himolene. Wanna honukla mitshikananu Cristo halixatshine Grécia tshijneya hiyrun-koxa renejnawana repixyawakna Hoyakalu kotspalatanune. Hiyáhoni Cristo tshinanu nmoletanune, nanjithi

¹⁶ homkahixyawakapna nyi pixkalune hiyrun-koxa wanna ptowruneka repixjene wannayma kamrurewatatshine hchinikanu homkahitanu.

¹⁷ Numuwata Estéfanas, Fortunato, Acaico tshinkalune hapojyawaka tshinanu klu tshinanu nyi kamhiyno hixa mumukata kamhaletanutu.

¹⁸ Nyi hpoyikowkaknona hiyrun-koxa nimata hix-koxa hpoyikotna. Nyi pixkalunekni kihleru wuchinikanrexyawakna.

Haliklewlu Piranapni

¹⁹ Cristo halixatshine hapatjetatshine xkehkaka Ásia tshijne hajene halikhi. Áquila hiyrunu Priscila tshinkalune hiyrun-koxa Cristo halixatshine wannapji hapatjexikatshine halikhi Cristo hiwakaya.

²⁰ Ptowruneka hewi hajene moletkakatshine pejnu Cristo hiwaka tshinanu ralikanwakathina. Halikkakanu hixkakluko hamluruyma Cristo hiwakaya.

²¹ Xye nyonata nomyoyma potuko. Hitni Paulo-no halikhi.

²² Katukta hi hamotanru Wutsrukate Cristo, hiknokalurupni hixa tskalaya. Wutsrukate Cristo, punanu.

²³ Nanjitlu Wutsrukate Jesus henekachale hihlenu hixa tshinanupa.

²⁴ Nuchinikhohnekanathi hixa ptowruneka Cristo Jesus hiwaka tshinanu.