1 Coríntios 1 - Bíblia

¹ Hita, Paulo-no, nuretkalurno Hoyakalu halujyawaka tshinanu, Cristo Jesus pirana nuphujexyawaka. Hita, Cristo tshinanu nmoletanruyma Sóstenes tshinkaluruyma,

² nyonatlo twu yonawahlo hixa Hoyakalu homkahitatshine hapatjetatshinhi, Corinto poktshi hajenhi nwaka. Hixa ptowrunekhi Cristo-ymalunhi hixa halixle tshinanu, Hoyakalu kotspalatanune nuretkalunhi. Hiyrun-koxa twu yonawahlo yonatka pimrine ptowruneka psoluchako hapatjexikatshine Wutsrukate Jesus Cristo hapohchinikanutatshine tshinanu. Jesus Cristo wanna Hitsrukatni hiyrun-koxa hixa Corinto poktshi hajenhi Hitsrukatni.

³ Nanjitlu Hoyakalu, Wuru hiyrun-koxa Wutsrukate Jesus Cristo hiru renejyawakaphi Hoyakalu hihlenu renekachale hiyrun-koxa hapnanuhchinikanru Hoyakalu henekanwu.

Kihler-potuko Wyoptotanu Hoyakalu Henekle Cristo Tshinanu Piranapni

⁴ Ptowru hohnekananuko npoyahnutlu Hoyakalu renekachale hixa tshinanu, waleni Hoyakalu hihlenu henekachaxikolu Jesus Cristo kamrure tshinanu.

⁵ Klu tshinanu hixa Cristo-ymalunhi tshinanni ptowru potuko hepixika — hixa hepixka hyanumaxyawaka hiyrun-koxa himatjemle hepixika.

⁶ Hinkaklewlu Cristo pirana homkahpotutatshinhi,

⁷ haté hixa hi hmahaxyatka hi satukna kihler-potuko Hoyakalu henejyawu, hkahwakka pchiniklu hsatojyawaka Wutsrukate Jesus Cristo.

⁸ Hoyakalu poyehitahchinikanutanhi haté hihohne nikawninri papko, hi psojikna hjihyehitko Hoyakaluya Wutsrukate Jesus Cristo hohne hapojinipa.

⁹ Hoyakalu hi weyawata. Htshanixatkahi hituru Jesus Cristo Wutsrukateymalunhi hixyawakapa.

Hihjekaklu Cristo Halixatshine Hapatjetatshine Tskalaya Piranapni

¹⁰ Hiyáhoni Cristo tshinanu nmoletanune, nuykothi pa hchinikanerune htshintokanutanu. Hi hkotspalahchinikankakanu hixkakluko. Pa hchinikanurunephi ptowru potuyako. Pa halukkalunephi.

¹¹ Cristo tshinanu nmoletanune, nunkakka hixa pirana. Cloé-ne tshinkalune hinkakle tshinanu hix-hima yahotkaka hixkakluko.

¹² Wane ntshinhi, hixa satkakhi pnuk-tshina hiyáhoni satuko wan-tshina: “Hitni Paulo-ymalutno.” Satuko wan-tshina: “Hitni Apolo-ymalutno.” Satu: “Hitni Pedro-ymalutno”, satu: “Hitni Cristo-ymalutno,” htshina.

¹³ Cristo-lhe xawaka kanipretka? Paulo-klahe cruz hitakka hixa tshinanu? Ho Paulo hiwaka tshinanrahe h-batiza-tka?

¹⁴ Hoyakalu npoyahnuta hi satuknahi hixa n-batiza-ta. Ha Crispo tshinkaluru hiyrun-koxa Gaio tshinkaluru tsonu n-batiza-ta.

¹⁵ Hiyáhoni hi satuknahi hixa himukata wan-tshinretanu — Paulo hiwaka tshinanu n-batiza-tka.

¹⁶ Ha hehe, Estéfanas-pji hajen-koxa n-batiza-ta. Seyni nimatlu pimrine hi satukna n-batiza-ta.

¹⁷ Klu tshinanu Cristo hi yokanatno n-batiz-lewaxyawaka. Seyni hyokanatno kihle piranalu potuko hiwekkaklewatatshri pirana nunkaklexyawaka. Hiyrun-koxa hyokanatno nunkaklexyawaklu waleko hipirana hi yineru himatkalnu piranapni klu tshinanu kpixkonru Cristo cruz rupniywaka pirana. Wale pirana tsonni himukatatshri.

Cristo-kni Hoyakalu Pixkonu Hiyrun-koxa Hoyakalu Himatkalewle Piranapni

¹⁸ Cristo cruz rupniywaka hinkaklexikolu pirana mahchinikanune hinkakle pirana rikahwakka hamhatshine tshinanu seyni hixa hiwekkakhohnekanatkalunetkawu tshinanu Cristo hinkakle pirana Hoyakalu pixkonni wale.

¹⁹ Klu tshinanu Hoyakalu tokanu yonatkaluru mitshikawlur-pirana wan-tshina: “Hita nikatanru jimatkalerune himatkalewle. Nuknokanru kahchinikanurune hchinikanu.”

²⁰ Hanurhe jimatkaleru? Hanurhe ptowru pirana himatjematshri? Hanurhe jinkaklerune xye hohne hajene? Hi he Hoyakalu hekhitatkalu mahchinikanutni xye psol-tshijneko himatkalewle?

²¹ Hoyakalu rimatkalnu tshinanu hi ritshitna yine Hoyakalu rimatyehixyawakna yine rimatkalnu tshinanna. Seyni Hoyakalu hikchikahchinikanuxnawa riwekkajyawakapna hiwekkaklewatatshri pirana halixatshine. Pimrine mahchinikannutshi pirana rikahwakluna hiwekkaklewatatshri pirana.

²² Klu tshinanu judeu-ne hanjijetlu hetkalurkaka ralixyawakapna. Grego-nerune hijhalu himatkalewlu hiwekkaklewatatshrimka.

²³ Seyni hixa wunkakletjetlu Cristo cruz hitakkalurutka pirana. Xye piranak-koxa judeu-ne hitspekaka hiyrun-koxa judeu mixkane mahchinikannutshi pirana rikahwakluna hiwekkaklewatatshri pirana.

²⁴ Seyni ptowruneka Hoyakalu tshanixlene tshinanu, judeu-ne hiyrun-koxa judeu mixkane tshinanu Cristo-kni Hoyakalu pixkonu hiyrun-koxa Hoyakalu himatkalewle.

²⁵ Klu tshinanu ptowruka Hoyakalu mahchinikannu tshinkaluru yine hchinikanu pnuterutni. Yineho Hoyakalu ruhrokahotna, seyni yine mixkonu yohnikalutni wale.

Hiwekkakkalune Kamhanrupa Piranapni

²⁶ Hiyáhoni Cristo tshinanu nmoletanune, hichinikanretanru hanu hixahchinikanukanatatshinhi mitshikananu Hoyakalu tshanixinixkahi. Waneklu papko yine hetanuya hi hixo hixapa jimatkalerunhi, hi hixo himukata kamhaletatshinhi, hi hixo hixapa hijhakalunhi.

²⁷ Hiyáhoni yine jimatkalerune hpatetjexyawaka tshinanu, Hoyakalu nuretlu mahchinikannutshi pirana yineho xye tshiji hajeneya. Hiyrun-koxa himukatatshine hpatetjexyawaka tshinanu, Hoyakalu nuretlu malukkotu pirana yinehoya xye tshiji hajeneya.

²⁸ Yineho Hoyakalu nuretlu heyikkaluru. Wanna kahwaklu malukkotu piranni, mujhakotni. Hoyakalu wan-rixa ruknojyawakaplu xye tshijne hchinikanu hijhaleru.

²⁹ Hiyáhoni hi satukna yineru halixkoxikatshripwa Hoyakalu hetanuya.

³⁰ Klu tshinanu Hoyakaluko Cristo Jesus hipxakkakatkahi. Hiyáhoni walekni wimatkalewniya. Cristo tshinanu Hoyakalu potukatatkawu, Hoyakalunerune rixkakwu hiyrun-koxa Cristo tshinanu riwekkakwu.

³¹ Hiyahokni Hoyakalu tokanu yonatkaluru mitshikawlur-pirana wan-tshina: “Kalixkotlewakleru, Hoyakalu kamrure pirana ralixkotanu.”