Eber 1 - Mattup ki Taasuwa ere Aware

Raa yʼa ruutite tʼurzi kʼUlí

¹ Ti kaaga, Raa yʼan di ruutite taŋ ɓaadaŋ tʼurzi tuuku toŋ maŋ a moŋgiɗagiŋ tʼurzi nebiyagi.

² Wo ɗe a onniytagi kʼita eŋ, Raa yʼin rootiyto tʼurzi kʼUlí. Tʼurzi yode geŋ Raa yʼa ikkima sulɗi pay a kandaane wo a siiɗo, wo Raa yʼa ti yʼ ziipe yoŋ wede yi oola sulɗi pay geŋ a beezí.

³ Yo Ulo geŋ yi kaza gooliko ere meeda ki Raa, wo yoŋ geŋ miŋ Raa koyok. Wo kane sulɗi pay geŋ an lekkiyo tʼurzi kʼonamí ɗoŋ an dʼede toogo gen̰n̰o. Yoŋ yʼa tʼize munɗa wede i tʼîide ɗuwo an tʼise kamilen̰ tʼolɗikadaŋ a ɗaana Raa, maŋ yʼa-gili kʼawwa ki kandaane, yʼa-guune a ammade Raa goole a jiire pay.

⁴ Iŋkino maŋ ki kotto, yo Ulo geŋ yʼa tʼize goole a jiire maaleekiyagi pay, wo suma ere Raa yi ele gette todʼ tʼa jiire ɗoŋ ki kane.

Ulo Raa yi jiire maaleekiyagi

⁵ Ɗerec, Raa geŋ kuɗic a maaleeka soo toŋ yi-ki ruute ye, yʼa tʼeese: «Kee Ulo nuŋ me, wo ti aŋki ɗuwo an di suune nuŋ Meegá.» Wo soŋ yʼa tʼeese: «Nuŋ a yode nʼa tʼisa Meegí, wo yoŋ yʼa tʼisa a nuŋ Ulo me.»

⁶ Wo ɗe aame Raa yʼigibo Ulí yoŋ yi jiire sulɗi pay adda duniya geŋ, yʼa ruute, yʼede: «Kune maaleekiyagi Raa pay, kun ottilo a yode.»

⁷ Geŋ ono ɗoŋ Raa yi ruute ti kaaga a tukki maaleekiyagi, yʼede: «Kane maaleekiyagi geŋ yi diʼn isiyo aa maaye, wo ɗoŋ naabadí yi diʼn isiyo aa ilze kʼuwwo.»

⁸ Wo Raa yʼa ruute ti kaaga a tukkʼUlo, yʼede: «Keeʼŋ Raa, kʼa koona a kaakido mozikadá ki daayum, wo ti dalka moziko ette kʼa dokka ɗoŋzá a urzi wede ki diine.

⁹ Kee ki geyyiso munɗa wede ki diine, wo sulɗi ɗoŋ ulpi kiʼn azzuru. Kono kamo nuŋ Raa wede Raazá, ni ki biire ti diine laŋziyagá pay, nʼay di ƴirge egey kʼuŋsuwo a eedá, geŋ i-kaza ni ki ti ziipe mozigo.»

¹⁰ Wo yʼa ruute sey, yʼede: «Tʼume kʼeesiyo kee Galmeega Raa i ziipe siiɗo te, wo kandaane toŋ ki yʼikkima ti beezá.

¹¹ Kane geŋ an tʼeŋgila, wo kee ki lekkiyo ki daayum. Eyye, kane pay geŋ a latta aakede kalle.

¹² Siiɗo ti kandaane kʼa tiʼn damɓa aa wede yi damɓu kalle wede goole, kʼa tiʼn ŋaaƴa a kese. Eyye, kane geŋ kʼa tiʼn pelka an ki lekka a umayaŋ ye, wo ɗe kee daayum kee miŋ kee, ozzinagá i ki ɗaŋga ye.»

¹³ Wo Raa geŋ kaŋ soo toŋ, kuɗic yi-ki ruute ye a maaleeka tuuku toŋ, yʼa tʼeese: «Kʼedi ki-koona a ammidadó kino, bini ɗoŋ kʼaduzá nʼan isa aa munɗa ki bita ti ɗanɗi zoŋɗá.»

¹⁴ Wo kane maaleekiyagi geŋ, kane pay undiyagi ɗoŋ i naabiya ki Raa. Kane geŋ yiʼn akkisa kʼisiyo naabiyagi ki noogiyo kane ɗoŋ i tʼoona uttiyo.