Skutki 3 - O keriben pal e Devleskre bičhade 1936 (Morava)

III O Trito Šero

¹ Akanak o Petros h’o Janos avle jekhethāne andre kangeri, he ehas o čiros te pes mangen ke mro Devel, odova ehi, o eña andro d’ives.

² He ehas varehavo manuš, so has bango pal peskri daj, he anenas les, he thovenas les sako d’ives paš o kangerakro vudār, havo bučolas, Šukar, kaj te mangel o lōve e gāǧendar, have ǧanas andri kangeri.

³ He kana dikhelas e Petros h’e Janos har ǧan andre kangeri, mangelas lōve.

⁴ He o Petros dikhelas pre leste phusade jakhentsa e Janoha, he phend’as, Dikh pr’amende!

⁵ He denas pe lende trat’, he užārelas, kaj vareso lendar lela.

⁶ Pales o Petros phend’as, Nāne man somnakaj, nāne mange rup, ale so hi mange dava tut. Andro Nav e Ježišiskro Kristoskro andral e Nazareta, ušt’i! he phir!

⁷ He l’il’as leskro čāčo vast, he hazdiñas les upre, he najekvar leskre prre, he leskre tikne kokala andro prre ehas sast’ārde.

⁸ He adava xut’il’as upre, terd’il’as, ǧalas, he gēl’as lentsa andre kangeri, phirelas, xut’elas, he hašārelas mre Devles.

⁹ He savore manuša les dikhenas, har phirel he har hašārel mre Devles.

¹⁰ Jon ǧānenas, kaj odova ehi ada manuš, havo bešelas paš o šukar vudār a kangerakro te mangel o lōve, he phrāde lengre jakha angal odova, so leske pēl’as.

¹¹ He kana o bango manuš, havo ehas sast’ārdo, ikerelas e Petros h’e Janos, savore manuša prastil’onas jekhethāne ke lende andro anglūno vudār, havo bučolas e Salomonoskro, he dikhenas phrāde jakhentsa.

¹² He kana o Petros adava dikl’as, phend’as pāle ko gāǧe, Tumen, o Izraelskā manuša, soske pr’adava dikhen bāre jakhentsa, he soske den tumāre jakha pr’amende, har amen amāra zōraha te kerd’amas, kaj ada manuš phirel?

¹³ O Bāro Devel e Abrahamoskro, h’e Izākoskro, h’e Jakuboskro, o Devel amāre dadengro hašārelas peskre čhāves Ježišis, havones tumen phandl’an andre, he na pringārd’an les angal o Pilātos, kana jov les kamelas te mukel.

¹⁴ Tumen na prinǧārd’an e Devleskre čāče manušes, he kamenas te muken jekhe manušes, so mudārel.

¹⁵ He tumen našad’an e Najbārederes, havones mro Devel l’il’as avri e mūlendar, he amen sam, so’ dova dikl’am.

¹⁶ Oda manuš, so tumen dikhen he prinǧāren, pat’alas leskre Naveske, he odoleske ehi sasto; čāčes, o pat’aviben, so ehi paš leste, diñas leske najfeder sast’ipen angal tumende savorende.

¹⁷ Ak‐akanak, o phrala, ǧānav, kaj tumāre biǧānl’ipnaha kerd’an tumen oda būti, so kerde tumāre najbāreder manuša.

¹⁸ Akadala būt’a, have o Devel sikad’as angleder e mostar savore leskre Devleskre Manušendar, kaj e Kristos avel bāri dukh, ehi kerde.

¹⁹ Odoleske laǧan tumen! he irinen tumen, kaj te tumāre bilāče keribena t ’avena mukle, kana avela o d’ives e sast’āripnaskro angal mro Raj!

²⁰ He jov bičhavela e Ježišis Kristos, havo angleder ehas tumenge sikl’ārdo.

²¹ Havones lela o uprūno devel andro d’ives kana ǧana savore būt’a pāle, so phenelas o Devel e mostar savore Devleskre Manušengre kathar o anglūno d’ives har pes kerd’as e phuv.

²² Odoleske o Mojžišis čāčes phend’as e dadenge, O Bāro Devel lela upre vaš tumende tumāre phralendar jekhe Devleskre Manušes har mé. Tumen šunena savoro, so tumenge phenela.

²³ He avela auka, kaj sako manuš, havo na šunela akada Devleskre Manušes, avela našado e ǧenendar.

²⁴ Jō, savore Devleskre Manuša kathar o Samuelis, he odola, have aven pāle, adetsi have vakerenas, auka vakerenas angal odova.

²⁵ Tumen san o čhāvore kathar o Devleskre Manuša, he kathar i sovel, havi diñas mro Devel amāre dadenge, kana phend’as e Abrahamoske, He savore čhāvenge, so ’hi tutar, t ’avel baxt he sast’ipen.

²⁶ Mro Devel l’il’as upre peskre čhāves Ježišis angleder tumenge; bičhad’as les tumenge, kaj tumenge te del i baxt, he kaj sakones tumendar te paruvel kathar o bilāčo keriben.