Zacharie 6 - Ma Zhiklè

Kiki faɗ

¹ A i ceda gèɗ a zhiklè zaʼa, a i pu dai: i rka kiki faɗ, ta shkè auda te ndev zahi cèw: Za züdo.

² Plèshi a ma kiki nshèlèkuraʼa, ta teva; a ma kiki macecèwaʼa, ta madza;

³ a ma kiki mamakaraʼa, ta slekaɗaʼa; a ma kiki mafaɗaʼa, ta ndurtsotsoʼa.

⁴ A i hüno a i gaɗa na gol Zhiklè man a ngaɗkayè: Bi ga, skwi sa mè?

⁵ Gol Zhiklè a mʼmbeɗayè a ma: Tengaʼa ta hi a tsagi herkeda faɗ ara kozlar, te deɓ man ta zlatsa a sam di Bi Zhiklè herkeda tèlèba.

⁶ Plèshi mʼmadza ta dè a civèɗ kokwar man a géɗèʼa. Plèshi nslekaɗaʼa ta dè a civèɗ mvèng pats; plèshi ndurtsotsoʼa ta dè a civèɗ man a dukwaɗ,

⁷ a plèshi ntevaʼa ta dè a civèɗ man a nkèl pats. Ta woy a ta dè a ta shèwèlè a géɗ herkeda. Gol Zhiklè a ngaɗa: Vo-do, va-sawala a géɗ herkeda! A ta sawala a géɗ herkeda.

⁸ Te deɓaʼa a mbahayè, a ngaɗayè: Na haha, tengaʼa man to do a civèɗ man a géɗèʼa, to do a ngi kita ga, a ndav ga a mènèhai.

Ndo man nzlembaɗ na ‘skwi a fcè’

⁹ Ndo nzi pèc pècèk a ngaɗayè:

¹⁰ Co skwi mbalai te ri ndohi man ta shkè a deɓa te ɓèlè: Heldai, Tobija a Jedaeja, a ka da a gi Josias, kra Sophonie, man to do a pa, te deɓ man ta shkè ngwi te Babylone.

¹¹ Hul verzhègenè a guro te ri tengaʼa, a ka gu a skwi mpèɗè gèɗ bai, a ka fa na a gèɗ a Josué, ndo mvi skwi a Zhiklè mbiaʼa, kra Jotsadak,

¹² a ka gaɗa na: Zhiklè bi mbiaʼa a gaɗa: Na haha ndo man nzlembaɗ na ‘skwi a fcè’. Aman tʼhwaɗ sak na, skwi a fcè, a nengaʼa a da rèm gi Zhiklè.

¹³ A da rèm gi Zhiklè, a da gi a bai, a da nzi a géɗ sam nʼnzi bi na, a ngi bai. Ndo mvi skwi a Zhiklè a zhè a tsagi nengaʼa, te civèɗ ri mandai, a ta nzi a gumai, cèw ba.

¹⁴ Te mpèɗè gèɗ bai, sèi ta hér Heldai, Tobija a Jedaeja a Josias, kra Sophonie, te pa, te gi Zhiklè.

¹⁵ Ndohi man ta zhè a sam ndraʼa, ta da shkè, a ta rèm gi Ndo nzi pèc pècèk. A kin da suna, Zhiklè bi mbiaʼa a nzlindkayè. Skwi haha a da gai, aman kin fi gèɗ a ma Ndo nzi pèc pècèk, Zhiklè kinè a vava.