Zacharie 13 - Ma Zhiklè

Nlèlè iyam

¹ A pats nasa nlèlè iyam a zhè a sam ndohi gi David a ndohi Jérusalem, a pènè malai a skwi nlizhèʼa.

² A da gi a pats nasa, a i gedassa nzlembaɗ vrihai te kokwar, a ta hér ta asaɓai. Ndohi nhadka ma, a mèzhèɓ ambaɓiaʼa ba, i dzam ta te kokwar, Zhiklè bi mbiaʼa a gaɗa.

³ Aman te deɓaʼa ndo nhadka ma a slèmbèɗè, bab na a mam na man ta yau, ta gaɗa: Da nza a nshèffe ɓai, te man ka cèkèl ma a nzlembaɗ Ndo nzi pèc pècèk! Bab na a mam na ta da kéɗèʼa, aman a hodko ma.

⁴ A da gi a pats nasa, ndohi nhèdè ma tèlèba, hori a da gi a di ta, man mèzhèɓ nhèd ma a shkè a géɗ tengaʼa; a ta vi bkwi a va ara maslaka, a ta cèkèl ma azɓai.

⁵ Aman staɗ staɗ tèlèba a gaɗa: I ndo nhadka ma ka ɓai, i ndo mpizhè. Gi dau ga a zhè, daga man i wudahai.

⁶ Aman ta jhèɗèʼa: Vovi mblè a ri mè? A gaɗa: Mblè man a kalkay a va te gi ndohi ga.

⁷ Tsakwal, kala na va a ndo nwèr skwi ga, a ndo man ndo ga, Zhiklè bi mbiaʼa a gaɗa. I tsi ndo nwèr skwai, a tambakihi ta venda gèɗ ta, a i gedas ta, man wuɗi ta azɓai.

⁸ Te kokwar tèlèba, man ndohi makar, cèw a bèzl ta, a jèkè staɗ; Ndo nzi pèc pècèk a gaɗa.

⁹ Tengaʼa man ta nza, i woya a i wosl ta a vogwa ara man ta wèsl verzhègenè a guro. Ta da tsi ri a nzlembaɗ ga, a i cè ntsi ri tengaʼa. I gaɗa: Ta ndohi ga, a tengaʼa ta da gaɗa: Ndo nzi pèc pècèk, Zhiklè nga.