Zacharie 1 - Ma Zhiklè

Mizlinè Zacharie

¹ Te mvi bi Darius macecèwaʼa, a ki matsamakaɗaʼa, Ndo nzi pèc pècèk a mbezda na ma nengaʼa a ma Zacharie, ndo nhadka ma, kra Bérékia, kra Iddo, a ngaɗa na:

² Ndo nzi pèc pècèk a ngu ndav kumba a géɗ babhi kinè.

³ Gar haha gaɗa ta: Zhiklè bi mbiaʼa a goɗ ar haha: Va-menkaɗa deɓa a sam ga, a i woya a i dè a deɓa a sam kinè, Zhiklè bi mbiaʼa a gaɗa.

⁴ Kin gu ara babhi kinè ɓai, man ndohi nhadka ma ta njè ta ma zlèzlèa: Zhiklè bi mbiaʼa a goɗ ar haha: Vajèkeda civèɗ kinè man ambaɓai, a mizlinè kinè man ambaɓai! Aman ta gu mèdègèɗ, ta fu gèɗ a ma ga ɓai, Ndo nzi pèc pècèk a gaɗa.

⁵ Ani babhi kinè ta tema? Ndohi nhadka ma ta nzi a nshèffè a mèdèp ɗè?

⁶ Aman ma ga, a skwi man i basla na gèɗ a va a i gaɗa ta ndohi mizlinè ga, ndohi nhadka ma, nʼnga ta babhi kinè ɓi ɗè? A ta menkaɗa deɓa a ta gaɗa: Skwi man Zhiklè bi mbiaʼa a nhur a da ga nga, ara civèɗ nga, ara mizlinè nga, nʼnga nga arsa a vava.

Plèshi ta rka na di a Zacharie

⁷ Te mvi bi Darius macecèwaʼa, a ki kula a géɗèa staɗaʼa, mʼmèn 24, a ki Shebat, Ndo nzi pèc pècèk a mbezda na ma nengaʼa a ma Zacharie, ndo nhadka ma, kra Bérékia, kra Iddo, a ngaɗa:

⁸ A vaɗ haha i rka skwi te nshunè: ndo ngiɗè a deɓ plèsh ntevaʼa, nzlatsa tʼhwaɗ wof ɗawai, nte loloh, a pleshi te deɓ nengaʼa, ntevaʼa, mbombertak, a nslekaɗaʼa.

⁹ I gaɗa: Bi ga, plèshi haha, plèshi mè? Gol Zhiklè a ngaɗkayè: I woya a i ngra ka.

¹⁰ A ndo man a nzlatsa tʼhwaɗ wof ɗawai a ngaɗa: Ndohi plèsh man Ndo nzi pèc pècèk a nzlinde ta, a ta shèwèlè a géɗ herkeda.

¹¹ Ta hüno a ta gaɗa na gol Ndo nzi pèc pècèk, man a nzlatsa tʼhwaɗ wof ɗawai: Nga sawala a géɗ herkeda. Na haha, herkeda a nza tètèʼa.

¹² Gol Ndo nzi pèc pècèk a ngaɗa: Zhiklè bi mbiaʼa, Jérusalem a kokwarhi Juda ta da se ka te va a ngèmè? Ka gu ndav a géɗ tengaʼa mvi 70 ma.

¹³ Ndo nzi pèc pècèk a ngaɗa na ma nhènèkèa a gol nengaʼa man a ngaɗkayè, a bidèʼa.

¹⁴ A gol Ndo nzi pèc pècèk, man a ngaɗkayè, a ngaɗayè: Boho a wuɗai! Zhiklè bi mbiaʼa a goɗ ar haha: I gi srak kumba a géɗ Jérusalem, a géɗ Sion;

¹⁵ aman i gi ndav kumba a géɗ ndohi nte deɓa man ta sassaya di ta a sam ga. I woya a i ga ta matakwan a ndohi Israel kètè genè; aman tengaʼa ta ga ta matakwan holholaʼa.

¹⁶ Gar haha Ndo nzi pèc pècèk a gaɗa: Jérusalem a siyè te va zaʼa. Ta da rèm gi ga te pa zaʼa, ta da liv ma kuma nengaʼa zaʼa. Zhiklè bi mbiaʼa a gaɗa.

¹⁷ Boho a wuɗai a vaʼa arsa! Zhiklè bi mbiaʼa a gaɗa: I da pshè ta ma kokwarhi ga dai. Ndo nzi pèc pècèk a da bidè Sion dai, a da ngècè Jérusalem auda zaʼa.

Dromhi a ndohi mviɗè skwai

¹⁸ A i ceda gèɗ a zhiklè, a i pu dai: Na haha, dromhi faɗ.

¹⁹ A i gaɗa na gol Zhiklè man a ngaɗkayè: Dromhi haha, dromhi mè? Nengaʼa a mbeɗayè a ma: Tengaʼa dromhi man ta dzar ta ndohi Juda, Israel a Jérusalem.

²⁰ Te deɓaʼa Ndo nzi pèc pècèk a ngray ndohi mviɗè skwi faɗ.

²¹ I gaɗa: Ta shkè a ta gi mè? Nengaʼa a mbeɗayè a ma: Dromhi man ta dzar ta ndohi Juda, a ta slambaɗda gèɗ te deɓaʼa asaɓai; a ndohi mviɗè skwai haha ta shkè a ta viɗka ta a pa, ta prosloma ta dromhi ndohi herkeda, man ta zlatsedeka ta drom a va ndohi Juda, aman ta dzar ta.